Hagae 1
1
Olketa mas bildimbaek moa Tambuhaos blong Yawe
1Long mektu yia wea Darias hemi king long Pesia, long fas de blong meksiks mans long hem,#1:1 ?mektu yia wea Darias hemi king long Pesia, long fas de blong meksiks mans long hem? Long datfala taem, meksiks mans long yia hemi mans long Elul long kalenda blong olketa pipol blong Israel, an hemi sem taem long yia olsem Ogus o Septemba long kalenda blong yumi. An fas de long disfala mans long mektu yia wea King Darias hemi rul ovarem Pesia hemi 29 Ogus 520 B.K. Yawe hemi talemaot Mesij blong hem long Profet Hagae, mekem hemi go talemaot long gavna blong Jiuda, Serababel, san blong Sealtiel, an long Haeprist Josua, san blong Jehosadak.#Esra 4:24—5:2; 6:14. 2Yawe hu hemi garem evri paoa, hemi tok olsem, ?Olketa pipol ya i talem dat hemi no taem yet fo bildimbaek moa Tambuhaos blong mi.?
3Yawe hemi talem Profet Hagae fo go talemaot Mesij blong hem olsem, 4?Olketa pipol blong mi. ?Waswe nao yufala slip long olketa nambawan haos, bat Tambuhaos blong mi hemi stap nogud? 5Yufala mas luksave long olketa samting yufala du-duim. 6Yufala gohed fo plantem staka kaikai long olketa gaden blong yufala, bat lelebet kaikai nomoa yufala garem. Yufala gohed fo kaikai, bat kaikai ya hemi no inaf fo yufala. Yufala gohed fo dringim waen, bat waen ya tu hemi no inaf fo mekem yufala hapi. Yufala garem kaleko, bat olketa kaleko ya hemi no inaf fo mekem yufala hot. Olketa wakaman i gohed fo wakahad fo garem seleni, bat seleni wea hemi tekem hemi no inaf. Hemi olsem seleni ya hemi lus long hol long basket blong olketa.?
7Hem nao wanem Yawe hu hemi garem evri paoa hemi talem, ?Yufala mas luksave long olketa samting yufala du-duim. 8Distaem yufala mas go long bus fo katem olketa timba, an kambaek fo bildim moa Tambuhaos blong mi. Long wei olsem, bae mi save hapi, an bae yufala save mekhae long mi.
9?Evritaem yufala gohed fo weit nomoa fo olketa gaden blong yufala fo garem plande kaikai, bat lelebet kaikai nomoa i grou long olketa ya. Taem yufala tekem kam olketa kaikai ya long haos blong yufala, mi mekem win fo bloum aot olketa kaikai ya. ?Waswe nao hemi olsem? Mi Yawe mi talem stret long yufala nao: Mi duim olsem bikos yufala wakahad fo bildim olketa haos blong yufala, bat Tambuhaos blong mi hemi stap nogud. 10Dastawe mi no sendem kam ren fo mekem olketa gaden blong yufala fo grou gudfala. 11Mi mekem evri ples long kantri blong yufala fo kamap drae tumas. So olketa ples antap long maonten, an olketa ples fo wakem gaden, an olketa plantesin blong grep, an olketa plantesin blong olketa oliv tri, olketa evriwan i kamap drae fogud. Trabol ya hemi kasem olketa pipol an olketa animol, an hemi kasem tu evri waka blong yufala.?
Olketa pipol obeim toktok blong Yawe
12Nao Serababel, san blong Sealtiel, an Haeprist Josua, san blong Jehosadak, an olketa pipol hu i stap long dea i barava herem toktok blong Yawe hu hemi God blong olketa. Olketa obeim mesij wea Yawe, God blong olketa hemi bin sendem Profet Hagae fo talemaot. An olketa pipol i fraetem Yawe.
13Den Hagae, hu hemi spesol mesenja fo blong Yawe, hemi talemaot disfala mesij olsem, ?Yawe hemi tok olsem: Mi nao mi stap wetem yufala.?
14Nao Yawe hemi mekem Gavna Serababel, an Haeprist Josua, an olketa people long dea fo tingting strong long mesij ya. So olketa stat fo bildimbaek moa Tambuhaos blong Yawe hu hemi garem evri paoa. 15Olketa statem waka ya long mektu yia blong King Darias, long mektuenti-foa de blong meksiks mans.#1:15 ?mektu yia blong King Darias, long mektuenti-foa de blong meksiks mans? 21 Septemba 520 B.K.
Currently Selected:
Hagae 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.