YouVersion Logo
Search Icon

Nambawan Singsing 1

1
1“Nambawan Singsing Winim Evri Narafala Singsing”, blong King Solomon.#1 Kings 4:32.
Fas Singsing
Yang woman hemi tok
2Daling blong mi,
mi laekem tumas fo yu gohed nomoa fo kisim mi.
Lav blong yu fo mi hemi barava suit tumas
winim nambawan waen.
3Mi laekem tumas smel blong disfala oel
wea hemi smel naes tumas long bodi blong yu.
An nem blong yu tu hemi here naes
olsem suit smel blong disfala oel.
Hem nao olketa gele save laekem yu tumas.
4Yu olsem king blong mi nao.
Plis yu tekem mi.
Yumitufala kuiktaem go
fo stap insaet long rum blong yu.
Bae yumitufala barava hapi tumas,
bikos mi barava lavem yu an yu lavem mi tumas
winim evrisamting long disfala wol.
Hemi fitim fo evri gele nomoa save laekem yu.
5Olketa woman blong Jerusalem,
mi blak ya, bat mi luknaes tumas.
Nomata mi blak olsem olketa haostent long drae eria long Kedaa,#1:5 “Kedaa” Long eria long Kedaa long bifoa, olketa wakem kaleko long nambawan hea blong nanigot wea hemi blak o dak braon. An olketa wakem tu haostent blong olketa long disfala kaleko.
bat mi luknaes tumas olsem olketa nambawan kaleko ya
fo mekem haos blong king hemi luk barava spesol.
6Plis no lukdaon long mi bikos mi dak skin.
Kala blong mi hemi deferen olsem,
bikos olketa brata blong mi i kros long mi
an mekem mi fo lukaftarem plantesin grep insaet long hot san.
Dastawe nao mi no save lukaftarem gud bodi blong mi seleva.
7Daling blong mi,
plis yu talem mi, wea nao oltaem yu tekem go olketa sipsip blong yu fo kaikai,
an wea nao olketa res long hem taem san hemi hot.
Hemi no fitim fo mi wakabaot seleva
fo lukaotem yu long ples wea olketa fren blong yu i lukaftarem sipsip blong olketa.
Yang man hemi tok
8Daling blong mi,
yu barava luknaes tumas winim evri narafala woman.
Sapos yu no save long ples wea olketa sipsip ya i stap long hem,
yu mas falom rod blong olketa,
mekem olketa nanigot blong yu save kaikai
kolsap long olketa haostent blong olketa man fo lukaftarem sipsip.
9Daling blong mi,
taem man hemi luk long yu hemi mas laekem yu nao,
olsem olketa man hos wea i pulum kaat fo faet blong king long Ijip,
i no save stap kuaet taem olketa lukim mere hos.
10Olketa iaring blong yu wea hemi hangdaon long fes
hemi luknaes tumas,
an nekles wea hemi stap raonem nek blong yu
hemi barava luknaes tu.
11Bae mi wakem iaring long gol fo yu
wea mi dekoretem long lelebet silva.
Yang woman hemi tok
12King blong mi,
taem yu leidaon long longfala sea#1:12 “longfala sea” Long kastom, long bifoa kam, olketa risman nao i yusim diskaen longfala sea fo leidaon lelebet long hem taem olketa kaikai long fist. blong yu,
oel wea hemi smel naes long bodi blong mi
hemi fulumapem rum ya nao.
13Daling blong mi,
mi barava laekem yu tumas.
Taem yu leidaon wetem mi
yu olsem wanfala samting wea hemi barava smel naes tumas,
hemi stap midol long tufala susu blong mi.
14Daling blong mi,
bodi blong yu hemi smel naes tumas olsem olketa flaoa insaet gaden ya long En-Gedi.#1:14 “En-Gedi” Disfala ples En-Gedi hemi wanfala barava naes ples insaet long drae eria raonem Ded Si. Bikfala springwata hemi stap long ples ya, so plande tri an gudfala wata nao hemi stap long hem. Lukim 1 Samuel 23:29—24:1.
Yang man hemi tok
15Daling,
yu barava luknaes tumas long mi.
Ae blong yu
hemi barava luknaes tumas, olsem kurukuru.
Yang woman hemi tok
16Daling,
yu barava luknaes tumas long mi.
Mi hapi tumas long yu.
Bae yumitufala go leidaon long gudfala gras ya,
17andanit long olketa sida tri an olketa paen tri.
Olketa sida tri ya bae i olsem haos blong yumitufala,
an olketa paen tri ya bae i olsem ruf long haos ya.

Currently Selected:

Nambawan Singsing 1: SIDC

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy