Singsing blong Trifala Yangman 1
1
Prea blong Asaraea
1Trifala#Daniel 1:6-7; 3:23. yangman ya, Hananaea, Misael an Asaraea, i stat fo wakabaot raon insaet long bikfala faea ya, an trifala singim olketa singsing go long God an preisim Lod. 2Nao Asaraea hemi stanap kuaet insaet long faea ya an hemi prea bikfala olsem:
3“O Lod, yu nao God blong olketa olfala grani blong mifala, mifala preisim yu an wosipim yu. Hemi fitim fo mifala mekhae long nem blong yu olowe. 4Wei wea yu duim olketa samting fo mifala hemi stret an gud an tru. 5Hemi stret nomoa taem yu letem trabol fo kasem Jerusalem, holi taon ya blong olketa olfala grani blong mifala. Hemi fitim fo yu panisim mifala bikos mifala nao i sin. 6Mifala no obeim yu, an mifala tane baeksaet long yu, an mifala nao sin. 7Mifala no duim evrisamting wea yu talem mifala fo duim. Sapos mifala bin obeim olketa lo blong yu, ating bae mifala stap gudfala nomoa. 8Bat hemi stret nomoa fo yu jajem mifala an panisim mifala. 9Yu bin givim mifala go long enemi blong mifala hu i no falom lo blong yu, hu i les long yu an hu i no stret. An yu bin givim mifala go long wanfala king hu hemi barava nogud tumas long disfala hol wol. 10Distaem, mifala evriwan hu i wosipim yu, mifala filnogud an sem tumas. Hemi had tumas fo mifala fo talem enisamting nao.
11“Fo mekem evriwan mekhae long yu, plis no brekem agrimen wea yu mekem wetem mifala, an no lusim mifala olowe. 12Yu no tekemaot sore blong yu fo mifala. Gohed fo kipim promis wea yu mekem wetem Ebraham hu yu lavem tumas, an wakaman blong yu Aesak, an Jekob hu hemi dadi blong olketa holi pipol blong yu long Israel. 13Yu bin promis fo givim plande grani long olketa, wea bae olketa plande olsem sta long skae, an sanbis long saet si. 14Lod, distaem mifala no plande nao, olketa narafala traeb i plande moa winim mifala. Evriwea mifala stap, mifala stap nomoa long sem bikos long sin blong mifala. 15Mifala no garem nao eni king, o profet, o eni lida. Mifala no garem eni tambu haos wea mifala save bonem sakrifaes, o ofarem eni gif o insens wea hemi smel naes, an mifala no garem eni ples moa wea mifala save mekem ofaring go long yu, mekem yu sore kam long mifala. 16Mifala hambol an kam long yu wetem sore fo olketa sin blong mifala. Plis akseptem mifala olsem taem mifala tekem kam plande man sipsip an buluka, an 1,000 smol sipsip wea i fat, fo sakrifaesim go long yu. 17Plis akseptem sore blong mifala olsem sakrifaes blong mifala fo yu tude, mekem mifala save obeim yu long ful haat blong mifala, bikos no eniwan hemi trastem yu, bae hemi stap long sore. 18-19Distaem, wetem ful haat blong mifala, mifala promis fo obeim yu, fo wosipim yu, an prea go long yu. Plis yu sore an kaen long mifala, an yu no letem eniwan moa fo meksem long mifala. 20Lod, sevem mifala long wanfala mirakol blong yu, mekem evriwan save tinghae long nem blong yu.
21“Plis yu mekem evriwan hu i spoelem mifala fo sem nogud. Tekemaot bik nem blong olketa, an aotem paoa an strong blong olketa. 22An letem olketa save dat yu nao Lod an God, an yu nao yu rul ovarem disfala wol.”
23Olketa wakaman blong king hu i bin torowem trifala man ya insaet long faea, i gohed fo putum oel, drae gras an strong wud insaet long faea ya mekem hem laet bikfala. 24Flem blong faea ya hemi goap kasem tuenti-faev mita. 25Hemi bonem tu olketa man blong Babilon hu i stap kolsap long faea ya. 26Wanfala#Tobit 5:4. enjel blong Lod hemi kamdaon insaet long faea ya long ples wea trifala yangman i stap long hem. Enjel ya hemi muvum flem blong faea from trifala ya. 27So, trifala yangman ya i filim olsem wanfala kol win nomoa hemi blou kam, an faea ya hemi nating hotem olketa o bonem olketa nomoa.
Singsing blong trifala yangman
28Nao insaet long bikfala faea, trifala yangman ya i stat fo singsing tugeta fo preisim God olsem:
29“Preisim yu Lod,
God blong olketa olo grani blong mifala.
30Letem mifala mekhae long holi nem blong yu,
an tinghae long yu olowe.
31Letem mifala singim olketa singsing fo yu olowe,
an letem mifala preisim yu insaet long Tambuhaos.
32Long ples wea yu sidaon long tron blong yu
antap long olketa enjel,
an luk kamdaon long wol blong olketa man dae,
letem evriwan preisim yu an mekhae long yu olowe.
33Letem evriwan preisim yu taem yu sidaon
long tron blong yu olsem king.
Letem evriwan singim olketa singsing
fo mekhae long yu olowe.
34Letem evriwan preisim yu long heven antap.
Letem evriwan singim olketa singsing fo yu olowe.
35Yufala evrisamting wea hemi mekem, preisim Lod.
Singsing fo preisim hem an mekhae long hem olowe.
36Skae antap, preisim Lod.
Singsing fo preisim hem an mekhae long hem olowe.
37Evri enjel, preisim Lod.
Singsing fo preisim hem an mekhae long hem olowe.
38Evri wata antap long skae, preisim Lod.
Singsing fo preisim hem an mekhae long hem olowe.
39Evri paoa long antap, preisim Lod.
Singsing fo preisim hem an mekhae long hem olowe.
40San an mun, preisim Lod.
Singsing fo preisim hem an mekhae long hem olowe.
41Evri sta long antap, preisim Lod.
Singsing fo preisim hem an mekhae long hem olowe.
42Ren an moning diu, preisim Lod.
Singsing fo preisim hem an mekhae long hem olowe.
43Evri win, preisim Lod.
Singsing fo preisim hem an mekhae long hem olowe.
44Faea an hot blong hem, preisim Lod.
Singsing fo preisim hem an mekhae long hem olowe.
45Bikfala kol an bikfala hot, preisim Lod.
Singsing fo preisim hem an mekhae long hem olowe.
46Snou an moning diu, preisim Lod.
Singsing fo preisim hem an mekhae long hem olowe.
47De an naet, preisim Lod.
Singsing fo preisim hem an mekhae long hem olowe.
48Delaet an tudak, preisim Lod.
Singsing fo preisim hem an mekhae long hem olowe.
49Aes an tukol, preisim Lod.
Singsing fo preisim hem an mekhae long hem olowe.
50Drop long kol wata an snou, preisim Lod.
Singsing fo preisim hem an mekhae long hem olowe.
51Laetning an olketa blak klaod, preisim Lod.
Singsing fo preisim hem an mekhae long hem olowe.
52Letem wol ya preisim Lod.
Singsing fo preisim hem an mekhae long hem olowe.
53Evri maonten an olketa hil, preisim Lod.
Singsing fo preisim hem an mekhae long hem olowe.
54Evrisamting wea i grou, preisim Lod.
Singsing fo preisim hem an mekhae long hem olowe.
55Evri leik an olketa riva, preisim Lod.
Singsing fo preisim hem an mekhae long hem olowe.
56Evri springwata, preisim Lod.
Singsing fo preisim hem an mekhae long hem olowe.
57Evri bikfala fis preisim Lod,
an evrisamting long si.
Singsing fo preisim hem an mekhae long hem olowe.
58Evri bed wea i flae, preisim Lod.
Singsing fo preisim hem an mekhae long hem olowe.
59Evri buluka an wael animol, preisim Lod.
Singsing fo preisim hem an mekhae long hem olowe.
60Evri pipol long wol, preisim Lod.
Singsing fo preisim hem an mekhae long hem olowe.
61Evri pipol long Israel, preisim Lod.
Singsing fo preisim hem an mekhae long hem olowe.
62Evri prist blong hem, preisim Lod.
Singsing fo preisim hem an mekhae long hem olowe.
63Evri wakaman blong hem, preisim Lod.
Singsing fo preisim hem an mekhae long hem olowe.
64Evri pipol hu i tinghae long hem, preisim Lod.
Singsing fo preisim hem an mekhae long hem olowe.
65Evriwan hu i hambol an holi, preisim Lod.
Singsing fo preisim hem an mekhae long hem olowe.
66Hananaea, Asaraea an Misael, preisim Lod.
Singsing fo preisim hem an mekhae long hem olowe.
Hemi bin sevem mifala from ples blong olketa man dae.
An sevem mifala from paoa blong dae.
Hemi bin tekem mifala kamaot from faea wea hemi bone.
An sevem mifala from faea ya.
67Tengkiu long Lod bikos hemi gud tumas.
Lav blong hem fo yumi hemi stap olowe.
68Evriwan hu i wosipim Lod, preisim hem.
Singsing fo preisim God
hu hemi hae winim evri narafala god.
An tengkiu long hem,
bikos hemi lavem yumi olowe.”
Currently Selected:
Singsing blong Trifala Yangman 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.