Leta blong Jeremaea 1
1
1Hem#Jeremaea 29:1. ya nao kopi long leta wea Jeremaea hemi raetem, an sendem go long pipol blong Jerusalem. Long taem ya, king long Babilon hem no tekem olketa yet from kantri blong olketa. Insaet long disfala leta, hemi mesij blong God fo olketa.
Pipol blong Jerusalem bae i stap fo longtaem long narafala kantri
2Bikos yufala pipol blong Jerusalem i sin tumas long ae blong God, bae king Nebukadnesa long Babilon hemi tekem yufala go long Babilon. 3Bae yufala go an stap longtaem tumas long dea, samting olsem sevenfala jeneresin. Bihaen, bae God hemi tekem yufala kambaek moa from Babilon.
4Taem yufala stap long Babilon bae yufala lukim olketa pipol i karim an wakabaot wetem olketa kaving god wea olketa wakem long silva, gol an stik. Olketa wosipim olsem god blong olketa, bikos olketa fraet nogud fo eni nogud samting hemi kasem olketa. 5-6Yufala mas lukaot, nogud yufala falom wei blong olketa ya. Yufala no letem laea god blong olketa fo mekem yufala fraet taem yufala lukim olketa hiden pipol i karim olobaot an wosipim olketa. Yufala mas tok olsem long yufala seleva, “O Lod, yu seleva nomoa mifala mas wosipim.” 7Enjel blong God bae hemi stap wetem yufala long dea, an bae hem nao hemi gadem yufala.
Olketa kaving god ya i nating garem paoa
8Olketa hu i mekem olketa kaving ya long silva an gol, olketa nao i wakem tang blong olketa kaving god ya. Olketa i no tru god, bikos olketa nating save tok. 9Pipol wakem hat long gol, an putum long hed blong olketa kaving god blong olketa, hemi olsem gele wea hemi laekem fo werem olketa nambawan samting. 10Samfala taem olketa prist save stilim olketa silva an gol from laea god ya, an yusim fo olketa seleva. 11Olketa save givim tu long olketa juri woman hu i stap long tambuhaos. Olketa pipol save mekem olketa kaving ya wea olketa wakem long stik, silva an gol, fo werem kaleko olsem olketa laef pipol. 12Nomata olketa god ya wea olketa wakem long stik, silva an gol, i werem papol kaleko olsem king, no enisamting save stopem olketa fo rasta o eniwan nomoa hemi save brekem olketa. 13Taem dast long tambuhaos hemi kavarem olketa, narafala man nao mas klinim olketa. 14Nomata olketa holem stik olsem jaj, bat olketa nating save panisim eniwan hu hemi rong agensim olketa. 15Samfala taem olketa save holem sap naef fo faet an aks, bat pipol save spoelem olketa nomoa long taem blong faet an olketa man fo stil save tekem olketa nomoa. 16Evrisamting ya hemi somaot nomoa olketa ya i no tru god. Yufala mas no wosipim olketa.
17Olketa kaving god wea i stap insaet tambuhaos blong olketa i yusles nomoa olsem baol wea hemi brek finis. Ae blong olketa, hemi fulap finis long dast from lek blong olketa pipol taem olketa kam insaet long tambuhaos. 18Olketa prist i satem strong olketa doa blong tambuhaos mekem olketa man fo stil no save go insaet. Olketa prist i lokem olketa samting insaet long strong haos olsem man hemi stap long prisin hemi redi fo olketa kilim hem dae bikos hemi duim nogud samting fo king. 19Olketa prist i laetem plande lam raonem olketa kaving god ya, bat olketa nating lukim nomoa eniwan long olketa laet ya. 20Nomata olketa waet anis i kaikaim olketa olsem wea olketa i kaikaim stik long tambuhaos, an kokoros hemi kaikaim finis kaleko blong olketa, bat olketa nating save nomoa long enisamting. 21Ae blong olketa i doti long smok blong faea insaet long tambuhaos. 22Olketa flaefoks an olketa narafala bed i kam an sidaon long olketa, an olketa puskat tu sidaon long hed blong olketa. 23Olketa samting ya i somaot klia dat olketa i no tru god. So, yufala mas no wosipim olketa.
24Olketa kaving god ya wea olketa wakem long gol mekem olketa luknaes, olketa no save saen seleva sapos no eniwan hemi klinim olketa. Taem pipol wakem olketa god ya long gol olketa putum go long faea, bat olketa god ya nating save filim enisamting. 25Nomata pipol baem olketa long bikfala seleni, bat olketa nating laef nomoa. 26!Yufala lukim, olketa yusles nomoa! Olketa nating save wakabaot seleva. Pipol nomoa save karim olketa olobaot. 27Sapos wanfala long olketa hemi foldaon, olketa hu i lukaftarem bae i sem tumas, bikos olketa nidim man tu fo stanemap moa. Taem wanfala hemi stanemap wanfala long olketa long wanfala ples, hemi nating save muv. Sapos hemi no stanap stret, hemi had tumas fo hemi mekem hem seleva fo stanap stret. An fo givim gif long olketa, hemi olsem nomoa sapos yu givim gif long man dae. 28Olketa prist i salem olketa samting wea pipol i ofarem long olketa, bat yusim seleni ya fo olketa seleva. An waef blong olketa prist ya i putum solt long olketa samting wea olketa sakrifaesim mekem olketa save yusim moa bihaen. Olketa nating searem nomoa wetem olketa pua an olketa hu i nidim help. 29Nomata olketa woman hu i lukim mun o bonem pikinini, olketa save letem olketa fo holem nomoa olketa samting wea olketa sakrifaesim. Olketa samting ya i somaot klia dat olketa i no tru god. So, yufala mas no wosipim olketa. 30?Hao nao bae eniwan save kolem olketa god taem olketa letem olketa woman fo mekem ofaring fo olketa samting ya wea olketa wakem nomoa long stik, silva an gol? 31An olketa prist save sidaon nomoa insaet long tambuhaos wetem ravis kaleko, olketa sevem nomoa hed blong olketa an no kavarem nomoa, olsem long taem olketa sore. 32Olketa krae an singaot bikfala frant long olketa laea god ya olsem man hemi krae long taem blong dae. 33Olketa prist ya i tekemaot kaleko from olketa god an givim go long waef an pikinini blong olketa. 34Nomata eniwan hemi helpem o spoelem olketa god ya, hemi had tumas fo olketa duim enisamting fo sensimbaek. Olketa no garem eni paoa fo mekem wanfala fo kamap king, o fo daonem hem. 35Olketa no save mekem eniwan fo kamap ris o givim hem eni seleni. Sapos eniwan hemi mekem kontrak wetem olketa bat hemi no duim, olketa no save fosim hem fo peimbaek.
36Olketa kaving god ya no save sevem eniwan from dae an no save helpem eniwan from paoa blong enemi blong hem. 37Olketa no save mekem blaen man fo lukluk moa, o sevem eniwan from trabol. 38Olketa no save sore long olketa wido o helpem olketa wea mami an dadi blong olketa i dae finis.
39Evrisamting ya olketa wakem nomoa long stik an kavarem olketa nomoa long silva an gol. Olketa nating garem eni paoa. Olketa i samting nating nomoa olsem ston wea olketa tekem kam from olketa maonten. Evriwan hu i wosipim olketa bae pipol i meksem long olketa. 40?Hao nao eniwan save talem olketa samting ya nao i god o kolem olketa god?
Krangge pipol nao wosipim olketa kaving god
Olketa blong Babilon seleva nao i no save tinghae long evri god blong olketa.
41Taem#Aesaea 46:1. olketa lukim eniwan no save toktok, olketa tekem go long tambuhaos an askem Bel fo mekem hem toktok moa, olsem wea Bel hemi save long enisamting. 42Nomata olketa pipol i luksave dat god blong olketa hemi nating save helpem olketa, bat olketa gohed krangge nomoa fo wosipim. 43I no long wei ya nomoa olketa krangge, olketa woman tu i gohed fo sidaon saet long rod fo bonem insens an mekem olketa seleva fo kamap olsem juri woman. Sapos wanfala man hemi kam an tekem wanfala fo slip wetem, taem disfala woman hemi kambaek bae hemi tokpraod long narawan saet long hem an talem hem hemi nating luknaes olsem hem. Dastawe nao no eni man hemi tekem hem fo slip wetem. 44Evrisamting abaotem olketa kaving god ya hemi nating tru. ?Sapos hemi olsem, hao nao olketa pipol ya olketa tingim an olketa kolem olketa god olketa samting nating ya?
45Olketa pipol hu i wakem olketa kaving ya i wakem falom tingting blong olketa seleva. So, olketa kaving god ya i samting nating nomoa. 46Olketa pipol hu i mekem olketa kaving god ya bae i dae nomoa. ?So, hao nao olketa save mekem olketa god? 47Taem olketa pipol olsem i dae, olketa nating lusim enisamting gud bihaen fo olketa pikinini blong olketa. Laea an sem nomoa olketa lusim bihaen. 48Taem faet o eni trabol hemi kam, olketa prist save plan fo wea nao bae olketa go haed wetem olketa kaving god blong olketa ya. 49Olketa kaving ya i nating garem eni paoa long taem wea faet an trabol hemi kam. ?Sapos olsem, hao nao olketa pipol no save luksave olketa kaving ya i no tru god? 50Olketa kaving god ya i haf stik nomoa wea olketa kavarem nomoa long silva an gol. Wanfala de bae hemi kamaot klia wea olketa kaving ya i no tru god. 51Bae evri kantri an evri king i save dat olketa kaving god ya i haf stik wea man nomoa hemi wakem. Olketa nating garem eni paoa olsem tru God hemi garem. 52Eniwan i save luksave nomoa olketa kaving god ya i nating tru.
53Olketa kaving god ya i nating save mekem eniwan fo kamap king o save mekem ren kamdaon. 54Olketa nating save talemaot tingting blong olketa seleva, o stretem enisamting wea hemi rong. Olketa barava yusles nomoa olsem bed wea i flae raon long skae. 55Sapos wanfala tambuhaos hemi bone, olketa prist bae ranawe fo sevem olketa seleva, taem olketa kaving god ya olketa wakem long stik an olketa kavarem long silva an gol, bae i stap nomoa fo bone olsem wanfala haf faeawud. 56Olketa nating save faet wetem olketa king o wetem enemi blong olketa. ?Sapos olsem, hao nao olketa pipol no save luksave olketa kaving god ya i nating tru?
57Olketa kaving god wea pipol i wakem long stik an kavarem long silva an gol, i no save sevem olketa seleva from olketa man fo stil. 58Olketa kam an aotem kaleko from olketa kaving god ya, an aotem tu olketa silva an gol long olketa, an tekem go evrisamting ya. Olketa laea god ya i no save duim enisamting fo stopem olketa. 59Enisamting stat long wanfala strong king go-go kasem wanfala baol wea olketa wakem long graon, olketa samting ya i gud winim moa disfala laea god. Doa hemi satem olketa samting insaet long haos an pos hemi holemap haos, olketa evrisamting ya hemi gud, bat disfala laea god ya i barava yusles nao.
60God hemi givim kam san an mun an olketa sta fo olketa givim laet fo yumi, an olketa obeim hem. 61Laetning an bikfala win i olsem tu. Taem laetning hemi flas braet long skae, pipol save lukim kam farawe, an win hemi save blou go long eni ples wea hemi laekem. 62Taem God hemi odarem olketa klaod fo kavarem hol wol ya, olketa obeim nao. 63Taem God hemi sendem kamdaon faea from heven fo bonem evri maonten an bus, faea ya hemi duim nao wanem God hemi odarem hem fo duim. Olketa kaving god ya i nating save duim enisamting olsem. 64?Waswe nao, yumi kolem olketa olsem god, samting olketa nating save helpem yumi o spoelem yumi? 65Yufala save nao olketa no god ya, so no wosipim olketa.
66Olketa god ya i nating garem paoa ova olketa king. Olketa no save mekem trabol fo kasem olketa o blesim olketa. 67Olketa nating save som eni saen long skae mekem evri pipol save lukim. Olketa nating save saen braet long skae olsem san o mun. 68Nomata olketa wael animol i gud winim olketa kaving god ya. Olketa save ranawe an sevem olketa seleva from samting wea hemi kam fo spoelem olketa. 69So, hemi barava klia nao wea olketa god ya i no tru. Yufala mas no wosipim olketa.
70Olketa god blong olketa ya wea olketa wakem long stik an kavarem long silva an gol, i olsem nomoa olketa samting wea olketa putum long gaden blong kon fo mekem olketa bed i fraet, bat olketa nating save gadem nomoa enisamting. 71Olketa nating save ronem olketa bed, olketa olsem nomoa ropnil long gaden, evri kaen bed nomoa save sidaon long rop blong hem. Olketa laea god ya i olsem nomoa ded bodi wea olketa torowe go aotsaet long dak ples. 72Olketa nambawan papol kaleko wea olketa werem bae i roten nomoa. Evri waet anis nao bae kaikaim olketa kaving ya, an olketa barava yusles nomoa fo eniwan. So, yumi save nao olketa ya i nating olsem wanfala god. 73Hemi gud tumas fo stretfala man hu hemi no garem eni kaving god olsem, bikos no eniwan bae hemi meksem long hem.
Currently Selected:
Leta blong Jeremaea 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.