Judit 1
1
King Nebukadnesa faetem King Arpaksad
1Taem Nebukadnesa hemi king ovarem Asiria hemi stap long bikfala taon Nineve an Arpaksad hemi king ovarem Media an hemi stap long Ekbatana 2Arpaksad hemi bildim bikfala wolston raonem Ekbatana, hemi teti-tu mita hae, tuenti-tu mita tik wetem kat ston an saes blong olketa ston kolsap wan an haf mita tik, an kolsap tri mita long. 3Olketa taoa long evri geit hemi fifti mita hae, an faondesin blong olketa taoa hemi teti mita tik. 4Evri geit hemi teti-tu mita hae, an eitin mita waed, hemi fitim ful laen blong ami fo goaot fo faet.
5Taem Nebukadnesa hemi king long Asiria fo tuelfala yia, hemi statem faet wetem Arpaksad long levol graon raonem bikfala taon long Rages. 6Plande long olketa narafala traeb tu olketa helpem Arpaksad. Samfala traeb ya i stap long olketa maonten, an samfala i stap falom trifala riva Taegris, an Yufretis, an Hidaspes, an samfala i stap long levol graon wea king Ariok long Elam hemi rul ovarem. Plande pipol tu olketa helpem olketa long Kaldia.
7-8So King Nebukadnesa long Asiria hemi sendem toktok go long Pesia an long olketa kantri long west fo olketa kam an helpem hem. Olketa kantri ya nao: Silisia, an Damaskas, an Lebanon, an Antilebanon, an evriwea long si saet, an Kaamel, an Gilead, an not long Galili, an levol graon long Jesreel.
9-10Hemi sendem tu toktok go long olketa pipol long Samaria, an evri ples olketa stap kolsap long Samaria, an olketa hu i stap long Jodan Riva go kasem bikfala taon long Jerusalem, an long Betani, an Kelous, an Kades go kasem long Gosen. Hemi sendem tu toktok go long olketa biktaon long Ijip, olketa ya nao Tapanes, Rameses, Tanis, Memfis, an falom Nael Riva go-go kasem baondri blong Itiopia. 11Evriwan long olketa pipol i stap long olketa ples ya olketa les fo herem toktok blong Nebukadnesa, an no laekem fo helpem hem fo go faet. Bikos olketa tingim bae hem no winim disfala faet ya, olketa no fraetem Nebukadnesa an olketa tok spoelem olketa man wea i tekem kam nius ya, an talem olketa fo go baek nating.
12Olketa samting ya nao hemi mekem Nebukadnesa hem kros tumas, an hemi suea strongfala, bae hemi kilim olketa pipol olketa les fo falom wanem hemi laekem. Hemi suea bae hemi kilim dae evri pipol long Silisia, Damaskas, Siria, Moab, Amon, Jiuda, an Ijip, an olketa pipol stap long Mediterenian Si go kasem pasis blong Pesia.
13Taem Nebukadnesa hemi kasem mekseventin yia, long waka blong hem olsem king, hemi kolem olketa ami blong hem, an hemi go faet wetem Arpaksad. An Nebukadnesa hemi winim olketa ami blong Arpaksad wetem olketa hos man blong hem. 14So Nebukadnesa hemi tekem nao olketa taon long lan long Media, an hemi kam tu long Ekbatana, an tekem evri taoa, an evrisamting fo salem. Hemi barava spoelem nao naesfala biktaon ya. 15Hemi holem tu king Arpaksad long olketa maonten long Rages, an hemi kilim hem dae.
16Bihaen Nebukadnesa an ami blong hem, olketa go baek long Nineve, wetem evrisamting wea olketa tekem long faet ya. An olketa res fo fofala mans an olketa mekem wanfala bikfala fist.
Currently Selected:
Judit 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.