Esra 1
1
Strongfala toktok blong King Saeras
1Long fas yia wea King Saeras blong Pesia hemi rul ovarem Babilonia,#1:1 King Saeras blong Pesia hemi tekova long taon long Babilon long 539 B.K., an long datfala yia, hemi stat fo rul ovarem bikfala kingdom blong Babilonia. Yawe hemi waka insaet long tingting blong king ya fo mekem wanfala toktok. Olketa sekretri blong hem i raetemdaon disfala toktok, an hemi sendem mesij ya go long evri ples long bikfala kingdom blong hem, mekem olketa ridimaot long olketa pipol. Yawe hemi duim diswan, mekem Mesij blong Yawe wea Profet Jeremaea bin talemaot, fo kamtru.#Jeremaea 25:10-11; 29:10. Toktok ya hemi olsem,
2“King Saeras blong Pesia nao hemi tok olsem: Yawe, God blong heven, hemi mekem mi fo rul ovarem evri kantri long disfala wol. An hemi siusim mi tu fo bildimbaek moa disfala Tambuhaos blong hem long taon long Jerusalem, wea hemi stap long kantri long Jiuda.#Aesaea 44:28; 45:13. 3!Letem God blong Israel hemi stap wetem olketa pipol blong hem! Eniwan long olketa hu i laekem fo gobaek, olketa save gobaek long Jerusalem fo bildimbaek moa disfala Tambuhaos blong Yawe, God blong Israel, wea olketa wosipim long Jerusalem. 4Sapos eniwan long olketa ya hemi stap long wanfala ples, olketa narafala pipol long ples ya mas helpem olketa fo gobaek. Bae olketa mas givim silva an gol long olketa, an olketa samting wea i nidim long rod, an olketa animol fo karim olketa samting ya. An bae olketa save givim tu olketa spesol ofaring falom wanem olketa laekem fo go long Tambuhaos blong God long Jerusalem.”
5Long datfala taem, Yawe hemi waka insaet long tingting blong plande pipol fo gobaek an bildimbaek moa Tambuhaos blong hem. So olketa ya, olsem olketa hed long laen blong Jiuda, an olketa hed long laen blong Benjamin, an olketa prist an olketa Livaet, i mekredi fo gobaek long Jerusalem. 6Olketa narafala pipol hu i stap kolsap long olketa ya long datfala ples i helpem olketa. Olketa givim olketa samting wea i wakem long silva an gol, an olketa samting wea bae olketa nidim long rod, an olketa animol fo karim olketa samting ya, an olketa narafala gudfala samting tu wetem olketa spesol ofaring falom wanem olketa laekem.#Eksodas 3:21-22; 11:2-3. 7An King Saeras tu hemi tekemaot moa olketa tambu samting wea King Nebukadnesa hemi bin tekemaot from Tambuhaos blong Yawe long Jerusalem fo karim go long Babilon, an putum long haos blong olketa god blong hem. King Saeras nao hemi tekem olketa samting ya an givim gobaek long olketa. 8King ya hemi talem Mitredat, hu hemi man fo lukaftarem seleni blong king, fo tekemaot olketa tambu samting ya. An Mitredat hemi kaontem olketa samting ya long ae blong Sesbasa, hu hemi lida long traeb blong Jiuda, nao hemi givim olketa gobaek long hem. 9Olketa samting ya wea hemi kaontem hemi olsem: 30 gol besin, an 1,000 silva besin, an 29 narakaen besin, 10an 30 gol baol, an 410 silva baol wea i semkaen olsem olketa gol baol, an 1,000 narafala samting.
11Namba long olketa samting ya wetem olketa narafala gol an silva samting wea Sesbasa hemi tekem, hemi kasem 5,400. Sesbasa hemi tekem olketa samting ya, long taem wea hem wetem olketa narafala pipol blong Israel i goaot from Babilonia, an gobaek moa long Jerusalem.
Currently Selected:
Esra 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.