Sirak 9
9
Advaes abaotem olketa woman
1No#Nambas 5:12-15. joles long waef blong yu wea yu lavem tumas,
nogud yu tisim hem ravis wei fo duim baek long yu.
2No letem woman fo bosim yu,
nogud hemi tekova long paoa blong yu.
3No stap kolsap long waef blong naraman,
nogud hemi spoelem tingting long yu.
4No kaban wetem
olketa woman
hu i save singsing long klab,
bae olketa save trikim yu.
5No lukluk tumas long yang gele,
nogud olketa fosim yu fo peim bikfala braed praes.
6No letem yu seleva
fo olketa juri woman,
nogud yu lusim evrisamting wea yu onam.
7So, no go lukluk olobaot falom olketa rod,
o goraon long olketa dak kona long taon.
8Taem yu lukim wanfala woman
wea hemi luknaes tumas,
yu luk go deferen long hem.
No tingting strong abaotem luknaes blong woman
hu hemi no waef blong yu.
Plande man i foldaon finis long luknaes blong woman.
Strong tingting olsem save hot olsem faea insaet long man.
9Yu no go kaikai seleva
wetem waef blong naraman,
o go dring wetem hem.
Hemi isi tumas fo yu kavetem hem,
an strong tingting blong yu fo hem save spoelem yu.
Fo frengud wetem narafala pipol
10No lusim olketa olo fren blong yu,
bae hemi had tumas fo faendem niuwan olsem olketa.
Gudfala fren hemi olsem waen,
hemi kamap gud moa
taem hemi stap fo longtaem.
11No joles taem yu lukim
wanfala nogud man
hu hemi garem gudfala samting,
bikos yu no save nomoa
watkaen nogud samting nao bae kasem hem.
12No hapi long olketa samting
wea olketa nogud pipol i hapi long hem.
Yu mas save dat pipol olsem
bae trabol hemi kasem long hol laef blong olketa.
13Sapos yu stap farawe long man
hu hemi save kilim yu dae,
bae yu no save fraet.
Bat sapos yu go kolsap long hem,
yu mas lukaot, nogud hemi kilim yu dae.
Yu mas save dat yu wakabaot nomoa
midol long olketa trap,
an hemi isi nomoa fo kasem yu.
14Yu mas savegud long olketa
hu i stap raonem yu,
an falom nomoa advaes blong olketa waes pipol.
15Yu mas stori nomoa
wetem olketa waes pipol,
an stori nomoa abaotem Lo blong God
hu hemi hae tumas.
16Yu mas siusim olketa stret
pipol fo kaikai wetem yu,
an yu mas filpraod taem yu tinghae long Lod olowe.
17Man hu hemi save long waka blong hem,
pipol tokhae long hem,
an lida hu hemi waes,
hemi soaot long toktok blong hem.
18Man hu hemi tok tumas
an hemi save tok olobaot,
evriwan nomoa save fraetem hem an les long hem.
Currently Selected:
Sirak 9: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.