2 Jon 1
1
1Mi lida long sios, mi raet go long yu gudfala woman wetem olketa pikinini blong yu.#1 “gudfala woman wetem olketa pikinini blong yu” Diswan hemi minim nomoa sios long wanfala ples wetem olketa pipol long sios ya. Mi lavem yufala tumas. Hemi no mi seleva nomoa, bat evriwan hu i save long tru toktok nao, olketa lavem yufala.
2Ya, mifala lavem yufala bikos disfala tru toktok hemi stap long yumi evriwan an bae hemi stap wetem yumi olowe. 3Taem yumi save long wei blong tru toktok an wei blong lav, God Dadi blong yumi wetem Jisas Kraes San blong hem, tufala bae kaen tumas long yumi an sore long yumi an bae tufala mekem yumi fo stap long piis.
Tising blong Kraes
4Mi hapi fogud taem mi herem dat samfala long olketa pikinini blong yu i gohed fo falom tru toktok, olsem wea God Dadi blong yumi hemi bin talem yumi fo duim. 5Gudfala#Jon 13:34; 15:12, 17. woman, mi wande talem yu dat yumi mas lavem yumi evriwan. Disfala lo hemi no niufala lo wea mi raetem fo yufala. Nomoa. Stat kam bifoa, yumi save finis long diswan. 6An disfala lav, hemi minim wea yumi mas gohed olowe fo obeim olketa lo blong God. An disfala lo blong hem, hemi olsem yufala herem finis taem yufala stat fo biliv, wea yufala mas stap long wei blong lav.
7Plande pipol hu i gohed fo laea, i bin goraon long evri ples finis. Olketa man ya i no biliv dat Jisas Kraes hemi bon kam wetem bodi olsem yumi. Eniwan olsem, hemi man fo laea an hemi enemi blong Kraes. 8So yufala mas lukaot, nogud yufala lusim olketa samting wea mifala#8 “mifala” Samfala olfala kopi long Mektu Jon olketa sei,“yufala”. hadwaka fo hem. Moabeta yufala tekem evrisamting wea God hemi redim fo yufala.
9Eniwan hu hemi no falom tising blong Kraes bat hemi adem go enikaen samting moa long disfala tising, God no save stap wetem hem ya. Bat eniwan hu hemi gohed strong fo falom tising blong Kraes, God Dadi wetem San blong hem bae tufala stap wetem hem. 10So sapos eni tisa hemi kam long yufala#10 “sapos eni tisa hemi kam long yufala” Long taem ya samfala Kristin tisa olketa goraon long olketa deferen ples an tisim Gudnius long olketa sios. Bat samfala tu olketa no tisim stret tising abaotem Kraes. an hemi no falom disfala tising blong Kraes, yufala mas no tekem hem go long haos blong yufala. An nomata fo welkamem hem, yufala mas no duim tu. 11Bikos eniwan hu hemi welkamem man olsem, hemi somaot dat hemi joen wetem datfala man long olketa ravis waka hemi duim.
Las toktok
12Mi garem plande samting fo talem go long yufala, bat mi no wande raetem long disfala leta. Mi laekem tumas fo kam long yufala an fo stori gud wetem yufala, mekem yumi save hapi tumas.
13Olketa pikinini blong gudfala sista blong yu,#13 “Olketa pikinini blong gudfala sista blong yu” Diswan hemi minim olketa pipol long sios long ples wea Jon hemi stap long hem. i talem halo go long yufala.
Currently Selected:
2 Jon 1: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.