San Juan 20
20
Jesús cuerayevɨsa
1Domingu pɨpe María Magdalena oso tuvɨpave pɨ̃tu vɨtemiseve. Ahe osepia ita tuvɨpa rovapɨsa ndahe irise güendave ihãi. 2Evocoiyase ahe cuña oña oso Simón Pedro upe, cheu avei aipo ehi:
—¡Vɨraso tuvɨpa sui yande Yar yuvɨreco! ¡Ndoroicuai que vo catu omondo yuvɨreco! —ehi.
3Evocoiyase Pedro rese oroña oroso tuvɨpave. 4Che rumo aña catu Pedro sui. Che rane evocoiyase ayepota tuvɨpave. 5Aivɨro tẽi, turucuar güeraño rumo asepia aheve. Ndaiquei rumo ipɨpe. 6Ipare Pedro oyepota che raquɨcuei, oique voi tuvɨpa pɨpe. Ahe avei osepia turucuar imama agüer tẽi. 7Iyavei osepia turucuar ñaca mamasa. Ndahei eté setecuer mamasa rese tui; ahe rumo co cotɨ ité ipoquesa tuprɨ ou. 8Evocoiyase che avei aique; asepia ẽgüe ehi vahe. Ahese aroya voi eté. 9Ore rumo ndorosenducua vɨtei eté icuachiaprɨ: “Ocuerayevɨra omano vahe pãhu sui” ehi vahe. 10Ipare oroyevɨpa oroso ore rẽtave.
Jesús oyemboyecua María Magdalena upe
11María rumo, ore raquɨcuei ou vahe, opɨtaño ité tuvɨpa ɨpɨve, oyaseho. Oyasehoseve oivɨro iri tuvɨpa pɨpe, 12ahese osepia ñuvɨrío Tũpa rembiguai iturucuar morochí vahe oguapɨ yuvɨnoi sehõgüer rupagüerve. Ñepei oguapɨ oĩ ñaca rupagüer cotɨ, ambuae ipɨ rupagüer cotɨ. 13Ahe Tũpa rembiguai oporandu yuvɨreco chupe:
—Cuña, ¿mahera vo ereyaseho? —ehi.
Ahe aipo ehi:
—Esepia, che Yar rehõgüer vɨraso yuvɨreco iyavei ndaicuai que vo catu omondo yuvɨreco —ehi.
14Aipo oheseve, oyemboyere, osepia Jesús aheve secoise; “Jesús co secoi” ndehi eté rumo chupe. 15Evocoiyase oporandu María upe:
—Cuña, ¿mahera vo ereyaseho? ¿Ava vo ereseca? —ehi chupe.
Ahe omoha ‘co mbahe mitɨ rẽta rãrosar revo’ oya viña, aipo ehi chupe:
—Nde ererasose sehõgüer, emombehuñomi tẽi cheu que vo eremondo. Aheve taso seca —ehi chupe.
16Evocoiyase,
—¡María! —ehi chupe.
Ahe aipo hese, oyemboyere, aipo ehi hebreo ñehe pɨpe chupe:
—¡Rabuni! —ehi (‘Porombohesar’ ohesave).
17Evocoiyase María upe,
—Erepocoi rene che rese. Esepia, ndayeupi vɨtei che Ru recosave. Esoño, emombehu che reroyasar upe: “Jesús oyeupira Vu Tũpa recosave” erera chupe. Che Ru, pe Ru avei; che Tũpa, pe Tũpa avei —ehi.
18Evocoiyase María Magdalena ou imombehu: “Asepia yande Yar” ehi iyavei opa omombehu mbahe semimombehu oreu.
Jesús oyemboyecua güemimbohe upe
19Ahe arɨ pɨpeve, domingu pɨpe, pɨ̃tuse, ore ore ñemonuhasave oroyeoquenda tuprɨ judío rerecuareta sui ore sɨquɨyepave. Ahese Jesús oique ore pãhuve. Ore mboavɨrave.
—¡Peico tuprɨ! —ehi oreu.
20Aipo ohe pare, omboyecua opo, oɨque avei oreu. Ahese orerorɨvete yande Yar repiase oroico. 21Ipare aipo ehi iri:
—¡Peico tuprɨ! Inungar che Ru che mbou, ẽgüe ahe aveira co che pẽu —ehi oreu.
22Ichui ore peyu:
—Peipɨsɨ Espíritu Santo —ehi—. 23Peñeroise que ava upe, ahese ahe oipɨsɨra ñeroisa; napeñeroise rumo que ava upe, ahe evocoiyase ndoipɨsɨi chira ñeroisa —ehi oreu.
Tomás osepia yande Yar icuerayevɨse
24Ñepei ore mboetasa rumo Tomás icõi vahe, ndipoi eté ore pãhuve Jesús oyemboyecuase oreu. 25Ipare ore aipo orohe chupe:
—Orosepia yande Yar —orohe.
Tomás rumo aipo ehi:
—¡Too! Acoi asepiase voi eté quɨravo cuarer ipo rese iyavei amoinguese che cuã quɨravo cuarer pɨpe iyavei amoinguese che po yɨque cutu agüerve, ahese ramo aroyara —ehiño oreu.
26Ocho arɨ pare, ore oroñemonuha iri oɨ pɨpe oroico. Aheve ramo Tomás secoi ore pãhuve. Yepe oroyeoquenda tuprɨ ité viña, Jesús rumo oiqueño ité ou ore pãhuve, ore mboavɨrave aipo ehi:
—¡Peico tuprɨ! —ehi oreu.
27Ipare aipo ehi Tomás upe:
—Esepia che po, emoingue nde cuã quɨravo cuarerve; embou ave nde po, emoingue avei che ɨque cutu agüerve. “Tachequerẽhɨ eme seroya ãgua” nderei chira cheu; ¡che reroya eve! —ehi.
28Evocoiyase Tomás aipo ehi:
—¡Che Yar Tũpa! —ehi chupe.
29Ahese aipo ehi Tomás upe:
—¿Cũritei che reroya che repiase eve cute? ¡Avɨye catu ava che repiaẽhɨ pɨpe che reroya vahe! —ehi chupe.
Co icuachiaprɨ Jesús reroya ãgua
30Jesús oyapo setá ambuae poromondɨisa ore rovaque. Ahe rumo ndaicuachiai co cuachiar pɨpe. 31Co rumo aicuachía ‘tovɨroya Jesús, Poropɨ̃sɨrosar, Tũpa Rahɨr secosa; ipɨpe tovɨreco tecovesa yuvɨreco’ che yapave.
Currently Selected:
San Juan 20: gyr
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.