VARHOMA 1
1
Ta ku xeweta.
1Mina Pawulo, nandza wa Yesu Kriste, ndzi nga vitaniwa ku va muapostola, ndzi hlawuriweke ku tivisa Evhangeli, 2leyi Xikwembu a xi yi tshembisile vanhu khale, hi vaprofeta va xona, ematsalweni layo kwetsima, 3loko xi ringanisa hi n'wana wa xona, Yesu Kriste, Hosi ya hina, la nga huma erixakeni ra Davhida, hitlhelo ra nyama, 4kambe a kombisiwa hi matimba, hi ku pfuka ka yena eku feni, leswaku i n'wana wa xona hitlhelo ra Moya lowo Kwetsima; 5a nga yena loyi hi nyikiweke ha yena tintswalo ni vuapostola, leswaku exikarhi ka matiko hinkwawo, vanhu va yingisa hi ku pfumela vito ra yena, 6valavo mi hlayiwaka exikarhi ka vona, n'wina lava vitaniweke hi Yesu Kriste;
7Eka n'wina hinkwenu mi nga le Rhoma, varhandziwa va Xikwembu mi vitaneriweke ku kwetsima: tintswalo ni ku rhula a swi ve na n'wina swi huma eka Xikwembu, Tata wa hina, ni le ka Hosi Yesu Kriste!
Ta rirhandzu ra Pawulo; ri n'wi susumeta ku endzela Varhoma.
8Ndzi sungula hi ku khensa Xikwembu xa mina ha Yesu Kriste, hikwalaho ka n'wina hinkwenu, hikuva ku pfumela ka n'wina ku twarile ematikweni hinkwawo. 9Hikuva Xikwembu lexi ndzi xi tirhelaka emoyeni wa mina eEvhangelini ya N'wana wa xona, hi yona mbhoni ya mina loko ndzi ku: A ndzi tshiki ku mi anakanya, 10a ndzi tshiki ku kombela emikhongelweni ya mina leswaku, loko ku ri ku rhandza ka Xikwembu xi ndzi humesela riendzo leri katekeke ra ku ta eka n'wina, 11hikuva ndzi navela ngopfu ku mi vona leswaku ndzi mi pfuna hi ku nyika kun'wana ka Moya, mi ta tiyisiwa hakona; 12hileswaku loko ndzi ri eka n'wina, hi chavelelana hi ku pfumela loku hi nga na kona swin'we, n'wina na mina.
13Kutani, vamakwerhu, a ndzi swi rhandzi loko mi nga swi tivi leswaku ndzi kanerile hakanyingi ku ta eka n'wina, ndzi ta kha mihandzu yin'wana exikarhi ka n'wina, kukota leswi ndzi swi endleke ematikweni man'wanyana; kambe ndzi hlulekile ku fika sweswi. 14Ndzi ni nandzu eka Vagriki ni ka Vabarbara, eka lavo tlhariha ni ka lavo rivala. 15Kutani sweswi, loko ndzi ri mina, ndzi tilunghisele ku vula Evhangeli, ni le ka n'wina lava nga eRhoma.
Leswi Pawulo a nga ta dyondzisa swona.
16Kunene a ndzi na tingana ku vula Evhangeli, hikuva i matimba ya Xikwembu ya ku ponisa mani na mani la pfumelaka, ku sungula hi Muyuda, ku yisa eka Mugriki. 17 Hikuva ku hlavuteriwile eka yona, ku lulama ka Xikwembu, ku hume eku pfumeleni, ku yisa eku pfumeleni, kukotisa leswi tsariweke leswaku: “La lulameke u ta hanya hi ku pfumela.”
Misava hinkwayo yi onhakile.
18Hikuva vukari bya Xikwembu bya tikombisa hi le tilweni, ku ba xisandzu, ni ku homboloka hinkwako ka vanhu lava khotselaka ntiyiso eku hombolokeni; 19hikuva leswi nga tiviwaka swa Xikwembu swi vonakisiwile erivaleni eka vona, hikuva Xikwembu xi va kombisile swona. 20Hikuva leswi nga voniwiki swa Xikwembu, ma nga matimba ya xona lama nga heriki, ni vukwembu bya xona, swi vonake ngopfu, ka ha ri mpfhuka misava yi tumbuluka, loko ku tsundzukiwa mitirho ya xona, ku va leswaku va pfumala ku tilandzula. 21Hikuva, hambi va tivile Xikwembu, a va xi dzunisanga leswaku i Xikwembu, naswona a va xi khensanga; kambe va hundzukile swahava emiehleketweni ya vona; ni timbilu ta vona leti pfumalaka vutlhari ti nyamisiwile. 22Va ri va tlharihile, kasi va hundzuke va rihuhu; 23kutani ku kwetsima ka Xikwembu lexi nga boriki, va ku hundzule xifaniso lexi fanisaka munhu la bolaka, ni tinyanyana, ni swiharhi swa mune wa milenge, ni swikokovi.
24Hikwalaho-ke, Xikwembu xi va nyiketile eku naveleni ka timbilu ta vona ni le thyakeni; kutani va tionhile va ri vona emirini ya vona; 25va nga valavo lava hundzuleke ntiyiso wa Xikwembu mavunwa, va gandzela, va va va tirhela leswi vumbiweke, a nga ri Muvumbi la vongiwaka hi masiku ni masiku. Amen!
26Hikwalaho, Xikwembu xi va nyiketile eku naveleni loku nga ni tingana, hikuva exikarhi ka vona, vavasati va hundzurile mukhuva wa vona wa ntumbuluko, ku endla lowu nga lulamangiki. 27Na vona vavanuna, va tshikile ku endla ni wansati hi mukhuva wa kona, kutani va hisiwile hi ku navelana, vavanuna va endla ni vavanunakulobye leswi yilaka ku vuriwa, kutani va tikumele hakelo leyi faneleke ku lahleka ka vona.
28Kutani leswi va nga ka va nga ringetanga ku tiva Xikwembu, Xikwembu xi va nyiketile emoyeni lowu solekaka va ta endla leswi nga fanelangiki. 29Va tele ku homboloka hinkwako, ni lunya, ni mona, ni vuciva, ni ku kanganyisa; va tele ku tshohoka, ni ku dlaya, ni ku kanetana, ni ku xisa, ni ku kucetela; 30i vahlevi, i valumbeti, i vavengi va Xikwembu, i varhukani, i vatiarisi, i vatikurisi; lava pfuxaka swo biha, lava nga yingisiki vatswari va vona; 31va hungukile, a va na nomu lowu tshembekaka, a va na rirhandzu, a va na tintswalo; 32volavo, hambi va tivile ku lerisa ka Xikwembu leswaku lava endlaka swo biha leswo tano va lulameriwa hi rifu, a va endli leswo ntsena, kambe va engeta va yimela ni lava swi endlaka.
Currently Selected:
VARHOMA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.