EZEKIELE 1
1
Ta ku vitaniwa ka Ezekiele.
1Hi lembe ra makume manharhu, hi siku ra vuntlhanu ra n'hweti ya vumune, loko a ndzi ri exikarhi ka lava yisiweke evukhumbini, enambyeni wa Kebara, matilo ma pfuleka, kutani ndzi vona mahlori ya Xikwembu. 2Hi siku ra vuntlhanu ra n'hweti, hi lembe ra vuntlhanu ra ku bohiwa ka hosi Yoyakini, 3rito ra Yehovha ri fika eka Ezekiele, n'wana Buzi, muprista etikweni ra Vakalediya enambyeni wa Kebara; exivandleni lexi, voko ra Yehovha ri va ehenhla ka yena.
4A ndzi languta, kutani ku huma en'walungwini emheho leya matimba, ni papa lerikulu, ni ndzilo lowukulukumba lowu nga voninga hi matlhelo hinkwawo; exikarhi ka wona a ku vonaka xilo lexi nga fana ni koporo leyi vangamaka swinene. 5Exikarhi kambe, a ku humelela leswi fanaka ni swivumbiwa swa mune leswi hanyaka, leswi ngi swi ri ni xiyimo xa vanhu. 6Xin'wana ni xin'wana a xi ri ni mimombo ya mune; kambe xin'wana ni xin'wana a xi ri ni timpapa ta mune. 7Milenge ya swona a yi lulamile, ni mikondzo ya milenge ya swona a yi fana ni swinyondzwana swa rhole, kutani swi vangama kukotisa koporo leyi vangamisiweke. 8A swi ri ni mavoko ya vanhu ehansi ka timpapa ta swona, ematlhelweni ya mune ya swona, hinkwaswo swa mune a swi ri ni mimombo ya swona ni timpapa ta swona. 9Timpapa ta swona a ti hlangene, a swi nga rhendzeleki loko swi famba, kambe xivumbiwa xin'wana ni xin'wana xi famba emahlweni hi ku lulama. 10Xin'wana ni xin'wana a xi ri ni mombo wa munhu, xin'wana ni xin'wana a xi ri ni mombo wa nghala exineneni, xin'wana ni xin'wana a xi ri ni mombo wa homu eximatsini, kambe xin'wana ni xin'wana, a xi ri ni mombo wa gama. 11Mimombo ya swona ni timpapa ta swona a swi avene hi le henhla; xivumbiwa xin'wana ni xin'wana a xi ri ni timpapa timbirhi leti hlanganeke, ni timpapa timbirhi leti nga funengeta miri ya swona. 12Xivumbiwa xin'wana ni xin'wana a xi famba emahlweni hi ku lulama; laha moya wu swi fambisaka kona swi famba; a swi nga rhendzeleki loko swi famba. 13Loko xi ri xifaniso xa swivumbiwa, a xi fana ni makala lama vangamaka, ni mavoningo lama pfurhaka ngopfu; ndzilo a wu fambafamba exikarhi ka swivumbiwa leswi hanyaka, ndzilo lowu a wu vangama, ni rihati a ri huma endzilweni. 14Swi vumbiwa a swi tsutsuma swi vuya hi matlhelo hinkwawo kukotisa rihati.
15Kuteloko ndzi ri karhi ndzi languta swivumbiwa leswi, ndzi vona sondzo emisaveni ekusuhi na swona, emahlweni ka matlhelo ya mune ya swona. 16Nghohe ya masondzo ni xivumbeko xa wona a xi fana ni krisolita, ma fanana hi vumune bya wona; ntirho wa wona a wu ri lowu fanaka ni sondzo leri nghenisiweke exikarhi ka sondzo rin'wana. 17Loko ma tshinelela emahlweni, ma famba hi matlhelo ya wona ya mune, a ma nga rhendzeleki. 18Swirhendzevutana swa wona a swi tlakukile ngopfu, a swi chavisa, a swi tele hi mahlo ematlhelweni hinkwawo. 19Loko swivumbiwa swi famba, masondzo na wona, a ma famba ekusuhi; ni loko swivumbiwa swi titlakusa, masondzo ma titlakusa na wona. 20Laha moya wu swi fambisaka kona, a swi fanela ku ya hi matimba ya moya, kutani masondzo a ma titlakusa na wona hikuva moya wa swivumbiwa a wu ri emasondzweni. 21Loko swivumbiwa swi famba na wona masondzo ma famba ni loko swi tshama, na wona a ma tshama ni loko swi titlakusela ehenhla, masondzo ma titlakusa na wona, hikuva moya wa swivumbiwa a wu ri emasondzweni.
22Ehenhla ka tinhloko ta swivumbiwa a ku ri ni tilo leri fanaka ni kristala leri tlunyaka, a ri andlariwile ehenhla ka tinhloko ta swona. 23Ehansi ka tilo, timpapa ta swona a ti yimile, ti langutene; xivumbiwa xin'wana ni xin'wana a xi ri ni timpapa timbirhi tin'wana leti nga funengeta miri wa xona. 24Loko swi famba, ndzi twa pongo ra timpapa ta swona ri fana ni mpfumawulo lowukulu wa mati, wu fana ni rito ra Lowa matimba, ni huwa ya nyimpi leyikulu. Loko swi yima, swi wisa timpapa ta swona ehansi. 25A ku ri ni mpfumawulo ehenhla ka tilo leri ngi ri ri ehenhla ka tinhloko ta swona; loko swivumbiwa swi wisa timpapa ta swona ti rhula.
26Ehenhla ka tilo leri ngi ri ri ehenhla ka tinhloko ta swona, a ku vonaka xilo lexi fanaka ni ribye ra safiri leri nga ni nghohe ya xiluvelo; ehenhla ka xifaniso lexi xa xiluvelo, a ku vonaka xilo lexi ngi xi ri ni nghohe ya munhu. 27Kutani ndzi vona xilo lexi fanaka ni koporo loko yi vila, ku sukela eka lexi nga fana ni xisuti xa yena ku ya ehenhla, ni ku sukela kona ku ya ehansi, ndzi vona xilo lexi fanaka ni ndzilo, ni ku vonakala lokukulu ematlhelo hinkwawo. 28Tanihi ku saseka ka nkwangulatilo emapepeni hi siku ra mpfula, a ku sasekisile xisweswo ematlhelweni hinkwawo hi ku vonakala loku: A ku ri hlavutelo ya ku kwetsima ka Yehovha. Kuteloko ndzi swi vonile, ndzi wa hi mombo wa mina, ndzi ri karhi ndzi twa rito ra un'wana la vulavulaka.
Currently Selected:
EZEKIELE 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.