2 YOHANE 1
1
Muapostola u tsakela lava rhandzanaka.
1Nkulukumba eka Kiria, la hlawuriweke, ni ka vana va yena, lava ndzi va rhandzaka entiyisweni, ndzi nga ri mina ntsena kambe ni hinkwavo lava tivaka ntiyiso, 2hikwalaho ka ntiyiso lowu tshamaka eka hina, wu nga ta tshama wu va eka hina hilaha ku nga heriki:
3Tintswalo ni ku tsetselela, ni ku rhula a swi ve na n'wina; mi swi nyikiwa hi Xikwembu Tatana, na Hosi Yesu Kriste, N'wana Tatana, entiyisweni ni le rirhandzwini.
4Ndzi tsakile ngopfu loko ndzi kumile vana va wena van'wana va fambaka entiyisweni, hilaha hi amukeleke ku lerisa ka Tatana. 5Kutani sweswi, wena Kiria, ndza ku khongela, swi nga ri leswaku ndzi ku tsalela ku lerisa lokuntshwa, kambe hi loku ngi mi ri na kona ka ha ri eku sunguleni, hileswaku hi rhandzana.
6Kutani lexi rirhandzu ri nga xona, hileswaku hi famba hi ku lerisa ka yena. Hi kuloku ku lerisa hilaha mi ku yingiseke hakona ka ha ri eku sunguleni, leswaku mi famba hakona.
Vadyondzisi va mavunwa.
7Hikuva vaxisi lavo tala va tile emisaveni, lava landzulaka leswaku Yesu Kriste u tile hi nyama; la vulaka sweswo, hi yena muxisi ni Antikriste. 8Tivoneleni, leswaku mi nga tshuki mi lahlekeriwa hi leswi mi swi tirheleke, kambe mi amukela hakelo leyi teleke.
9Un'wana ni un'wana la hambukaka la nga tiyiseriki edyondzweni ya Kriste, a nga na Xikwembu; la tiyiselaka edyondzweni ya Kriste, yena u na Tatana ni N'wana.
10Loko un'wana a ta eka n'wina, a nga tisi dyondzo leyi, mi nga tshuki mi n'wi amukela etindlwini ta n'wina, na swona mi nga tshuki mi n'wi xeweta; 11hikuva la n'wi xewetaka, u hlangana ni mitirho ya yena leyo biha.
12Ndza ha ri ni timhaka leto tala, kambe a ndzi rhandzi ku mi tsalela tona hi papila ni inki, hikuva ndzi tshembile ku mi endzela, ni ku vulavula na n'wina hi nomu, leswaku ku tsaka ka hina ku hetiseka.
13Vana va makwenu wa muhlawuriwa, va ku rungula.
Currently Selected:
2 YOHANE 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.