Rome Whutꞌenne 1
1
Paul be ꞌudustlꞌus Rome tsꞌe ooba ꞌálhaꞌ hoontꞌohne butsꞌó kꞌe yanguz-i
1Si Paul Sizi Gri be ꞌulhna-un, ꞌen ba za whelꞌaꞌ-un ꞌústꞌoh. Ndi khuni unzoo-i dune dósniꞌ huba, Yakꞌusda ꞌudun nésunilhti whe ꞌustꞌoh. 2Tube ꞌudaꞌ whe ndi Yakꞌusda be ꞌudustlꞌus lubeshi ooghu hooloh-i, ꞌi Yakꞌusda be nus hóoꞌenne bugha netsꞌú yoozi, ꞌinkꞌez ndi Yakꞌusda ooghuni ꞌi neba ꞌukꞌe híyinguz. 3Yakꞌusda netsꞌú hoozi-un duYeꞌ ghun, ꞌen Sizi Gri neMoodihti ꞌuntꞌoh. ꞌEn lerwe David ye kédinzut. ꞌEt huwa dune ꞌúntꞌoh tꞌétsꞌonínzun. 4Yakꞌusda cha unli. Yakꞌusda ye ulhtus-i gha dazsai ꞌinkꞌez dunadija. ꞌEt whe Ndoni whunénilhtan ꞌen Yakꞌusda ooYeꞌ ꞌúntꞌoh. 5ꞌEn ye únzoo-i, ꞌi gha whelꞌaꞌ-un usdli ꞌinkꞌez ooba ꞌustꞌen. Khuni unzoo-i ndi yun kꞌut tsꞌiyanne dune budutásnelh highuni hiyólhchoot ha, ꞌinkꞌez booziꞌ gha ookꞌuneꞌ tsꞌootꞌen, 6ꞌenne butoh nohni cha Sizi Gri ooduneꞌ sahliꞌ.
7Nohni Rome dilhtsꞌine, Yakꞌusda nohkꞌentsiꞌ ꞌinkꞌez Yakꞌusda oochꞌeꞌne#1:7 Mbene la Sizi Gri hikꞌúneꞌ ꞌutꞌenne, ꞌenne Yakꞌusda oochꞌeꞌne hinli. nohúlhtsi. NeBá Yakꞌusda ꞌinkꞌez Sizi Gri neMoodihti nohgha ininꞌai whe nohdzi dóghel ꞌinkꞌez Yakꞌusda ye únzoo-i nohbulh óotꞌeꞌ ha.
Paul mbene la ooba ꞌalha ꞌuhoontꞌohne Rome tsꞌe butsꞌun nutiyalh hukwaꞌ ninzun
8ꞌUdechoo nohdutásnelh, yun kꞌut nduhuhoolcho whe dunene nohbulh ꞌuhuditsꞌo Sizi Gri tsꞌun be ꞌalha ꞌuhoontꞌoh-i ghun. ꞌEt huwa nohni nohghun Sizi Gri gha sYakꞌusda nohba musi dusni. 9Syughi be Yakꞌusda ba neꞌustꞌen, ꞌuyoonne ndi khuni unzoo-i budúsni ooYeꞌ ghun. ꞌInkꞌez oonalh ꞌunohdúsni, ꞌahoolhyiz nohba tenadusdli, ꞌaw ꞌetsul lheꞌduzisni. 10ꞌInkꞌez Yakꞌusda ooduskut, ꞌet nduwhútanelh hukwaꞌ ninzun de, ꞌet de la nohtsꞌu tóosyaꞌ.
11Tube nohtisꞌelh hukwaꞌ nuszun Sizi Gri be ꞌutꞌen bunóh huntistun ha. ꞌI gha la ulhtusne oohleꞌ ꞌinkꞌez ꞌaw oochꞌaz naóolhyeh ꞌaítꞌoh. 12ꞌAw nohni za íloh, nohba ꞌalha ꞌuhoontꞌoh-i ꞌinkꞌez si cha be ꞌalha ꞌuhoontꞌoh-i, ꞌi be la ꞌalhgoh nusúznootꞌi. 13Sulhutsinke ꞌet tꞌewhunoohzeh hukwaꞌ nuszun, lhat nohtsꞌu tísyalh wheni lhadústꞌih ꞌet hoontsꞌi ꞌaw oosneh aitꞌoh. Ntsꞌenꞌa la ꞌuyoonne ꞌudun yun kꞌut whutꞌenne dahája la, ꞌet la ndóhneh, si sgha la tsꞌiyawh Sizi Gri tsꞌu naóolhyeh ha.
14Njan ꞌet ndósneh hubaꞌ hoontꞌoh, khuni unzoo-i, ꞌi Greek kꞌuyalhdukne ꞌinkꞌez ꞌutsꞌiz de haíndene cha, mbene la whuníhne cha kꞌus lhuhóonihne cha, ꞌenne hubodoosꞌeh ha. 15ꞌEt huwa nohni Rome whutꞌenne nohtsꞌu tísyalh wheni lhadústꞌoh, ꞌet de la khuni unzoo-i bunóhnoostun.
Khuni unzoo-i Sizi Gri ooghun ꞌi Yakꞌusda ye ulhtus-i ꞌuntꞌoh, ꞌi be dune hudutijis
16ꞌI khuni unzoo-i Gri ooghun ꞌaw hukwaya lhusdloh whe be yásduk. Yakꞌusda ye ulhtus-i ꞌuntꞌoh ꞌinkꞌez ꞌi gha Lizwifne kꞌus ꞌudun yun kꞌut whutꞌenne buba ꞌalha ꞌuhoontꞌoh de, ꞌet de hudutijih. 17Ndi khuni unzoo-i yunénilhtan ntsꞌenꞌa la neba ꞌalha ꞌuhoontꞌoh de za, nintaꞌ ꞌutsꞌutꞌih-un Yakꞌusda tsꞌiyawh neba gak whutilhtselh ꞌet huwa tsꞌihꞌun dune tsꞌuzdliꞌ. ꞌEt Yakꞌusda be ꞌudustlꞌus ꞌukꞌu nusguz ndutni, “Mbene la Yakꞌusda ooba ꞌalhaꞌ ꞌuntꞌohne ꞌet whe tsꞌihꞌun naꞌujane, ꞌenne ꞌilhiz hukhutinalh.”
18Ndi Yakꞌusda ye hunilchꞌoh-i yunénilhtan mbene la Yakꞌusda dulhyoh ꞌinkꞌez tankꞌus ítꞌelhne, ꞌenne ndi khuni ꞌalhaꞌ ꞌuntꞌoh-i tꞌehinínzun tankꞌus ꞌuhutꞌen whe yo hinilhtꞌi. 19ꞌInka dai la Yakꞌusda beꞌ ꞌutꞌen Yakꞌusda whunénilhtan, ꞌet huwa tsꞌiyanne tꞌeinínzun. 20ꞌAw Yakꞌusda yiꞌenne hooloh ꞌet hoontsꞌi dantꞌoh la tꞌehonínzun. Ndi yun ꞌuyínla ꞌandit whutsꞌun ndet la Yakꞌusda dátꞌen huwhunalhꞌen. ꞌEt huwa Yakꞌusda ꞌúntꞌoh ꞌinkꞌez ye ulhtus-i ꞌaw oola tunalhuhóoꞌoh tsꞌiyanne tꞌéhonínzun. Njan tꞌéhonínzun-un ꞌet huwa Yakꞌusda but huzyin de, ꞌaw tꞌéwhunuzúszun hudooniꞌ ꞌaítꞌoh.
21Yakꞌusda tꞌehinínzun ꞌet hoontsꞌi ꞌaw lhehidílhtiꞌ ꞌinkꞌez ꞌaw musi lhuhidúsni. ꞌEt huwa ꞌantsꞌi iloh te nuni hunuzut ꞌinkꞌez tankꞌus ꞌuhuninzun, ꞌet huwa ꞌaw tsꞌihꞌun unꞌa kꞌus tankꞌus ꞌúhoontꞌoh-un tꞌehonúszun. 22Whunihne dune naꞌhundunúdzun ꞌet hoontsꞌi ꞌaw tꞌe honínzun-un hooloh. 23Yakꞌusda ye díztiꞌ ꞌinkꞌez ꞌahoolhyiz khuna hitsꞌu ténadoodli hubaꞌ hoontꞌoh kꞌus ꞌet ꞌukꞌeltsi ꞌuhuyulhꞌen-i dune, dutꞌai, khuna-i, ꞌinkꞌez tlꞌughus te, ꞌohwhi yaidláh-i ꞌuntꞌoh, ꞌi ꞌohwhi ookꞌeyiltsi-i, ꞌi hitsꞌun ténahududli.
24ꞌEt huwa Yakꞌusda bula ditni whe hukwaꞌ huninzun kꞌunꞌa la yinka hudóltsꞌiꞌ. ꞌUtꞌen dutsun-i ꞌuhulhꞌen. Lhtoh duyustꞌe hukwayá hoonli hiye neꞌutꞌen. 25Yakꞌusda ye tsꞌihꞌun ꞌutni-i buba ꞌantsꞌi ꞌúhoontꞌoh ꞌinkꞌez whutsꞌit-i buba ꞌalhaꞌ yintꞌoh. Yakꞌusda tsꞌu ténahududli hutni whe, kꞌus ndai la ꞌuyalhꞌen-i, ꞌi tsꞌu ténahududli. ꞌEt hoontsꞌi Yakꞌusda ꞌen za dótiꞌ hubaꞌ hoontꞌoh.
26ꞌEt huwa Yakꞌusda buba ꞌantsꞌi yúzdliꞌ ꞌet huwa Yakꞌusda bula ditni hukwaꞌ huninzun kꞌunꞌa la yinka hudóltsꞌiꞌ ha. Lhat-un whudutsun-un ꞌuwhuhulhꞌen. Dune tsꞌekoo bulh Yakꞌusda wheni ꞌubinla-un, ꞌet whula hudutni ꞌinkꞌez whulohne tsꞌekoo dudulh tsꞌekoo ꞌenne ꞌuhulhꞌen. 27Whulohne dune cha whuz unꞌa zaꞌ hutꞌen. Dune tsꞌekoo bulh Yakꞌusda wheni ꞌubinla-un, ꞌet whula hudutni. Hudízkꞌun kꞌunꞌa dudulh dune bukaꞌ huninzun ꞌinkꞌez hukwaya hoonli te bubulh neꞌhutꞌen. ꞌEt ndahútꞌen-un ꞌet huwa buyustꞌe dada za dubih, ꞌet bugha whúltsꞌuk.
28ꞌInkꞌez ꞌaw Yakꞌusda ghun nuní hunoozut hukwa lheꞌhunízun. ꞌEt huwa Yakꞌusda bula ditni. Bubeni ntsiꞌ súliꞌ. Ntsꞌoh la néꞌhutꞌen-un, ꞌaw ꞌet ndoohóotꞌen huba lheꞌhítꞌoh. 29ꞌAhoolhyiz ꞌaw tsꞌihꞌun unꞌa nulheꞌhustꞌen. Lubeshi hukwaya hoonli ꞌi la ꞌuhuyulhꞌen, ꞌuyoonne chꞌeꞌ haꞌ huninzun, ꞌuyoonne hundílhdaih, ꞌuhoolnih, dune hughan, lhehúdulh, eꞌwhuhulhtsꞌit, huhuske, dudulh dune tsꞌiyawh lhghu yuhalduk, 30dudulh dune chꞌaz yáhulhduk, Yakꞌusda hitsꞌu dutni, dune ba dzoh ꞌúhutni, ꞌuhududíltiꞌ, duba naꞌhudzoo, ꞌahoolhyiz tankꞌus ꞌúhootꞌen huninzun, ꞌaw dudusneke bukꞌúnulheꞌhustꞌen, 31ꞌaw Yakꞌusda be ꞌutꞌen tꞌehinúszun, ꞌaw dughuni lhuhuyóotun, bubulh dune ꞌantsꞌi buba hinli, ꞌaw dune kꞌeke nahooltselh ꞌaítꞌoh, ꞌinkꞌez ꞌaw telheꞌhunízun. 32ꞌEnne dune ꞌet ndutꞌénne dahútitsah wheꞌ hoontꞌoh. Njan tꞌehonínzun ꞌet hoontsꞌi, whuz unꞌa za ꞌuhitꞌelh. Mbene la buba hóontꞌiꞌne, ꞌenne cha Yakꞌusda tsꞌihꞌun unꞌa buba nahutiyeh.
Currently Selected:
Rome Whutꞌenne 1: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.