Philippi Whutꞌenne 1
1
Paul Philippi whutꞌenne, hadih, ꞌubulhni
1Paul ꞌinkꞌez Timothy ꞌet Sizi Gri be ꞌulhnane ídli. Keyoh Philippi whutꞌenne Gri Sizi ꞌen gha Yakꞌusda oochꞌeꞌne ꞌuhtꞌoh, ꞌinkꞌez huwunline ꞌinkꞌez yula ꞌutꞌenne cha, nohni tsꞌiyawh hadih nohdítni.
2Yakꞌusda neBá ꞌinkꞌez Sizi Gri neMoodihti ꞌen tsꞌun ye unzoo-i ꞌinkꞌez be nedzi dizghel-i nohgha íninꞌai, ꞌi tsꞌiyawh nohbulh óotꞌeꞌ nohba hukwaꞌ nuszun.
Nohnaznih totsuk ꞌet huwa Yakꞌusda tsꞌun musi dusni
3Nohnaznih totsuk, ꞌet huwa Yakꞌusda tsꞌun musi dusni. 4Tenadusdli totsuk hoonústꞌiꞌ whe nohni tsꞌiyawh nohba tenadusdli. 5ꞌUdechoo dzin ꞌinkꞌez ꞌandit whutsꞌun tsꞌiyanne khuni unzoo-i be yasduk, ꞌet whe sla ꞌuhtꞌen. 6Njan ꞌet sba nawh lheꞌhootꞌoh, nohni nohbulh ꞌutꞌen unzoo-i wheꞌ yudilhꞌen-un Sizi Gri oodzin de, ꞌet de lhaídutileh.
7Tsꞌihꞌun ꞌuhoontꞌoh hukwꞌunꞌa huwun nuni nuszut. ꞌInka sdzi yo ꞌunohusdzun. Ntsꞌenꞌa dastꞌoh njan lhuztih tlꞌool be whédustꞌi, ꞌet hoontsꞌi khuni unzoo-i, ꞌi ba susyin ꞌinkꞌez tsꞌiyanne sulh be ꞌalha ꞌuhoontꞌoh oohtun. 8Yakꞌusda nalh nohdusni, ntsꞌenꞌa la Sizi Gri dudzi ndulcho-i be nekꞌetsiꞌ-i, ꞌet whuz unꞌa si cha tube nohkꞌénisli.
9Nohba tenadusdli, be tꞌéoonudzun-i, ꞌi be cha ꞌinkꞌez ye whunih-i cha tsꞌiyawh, ꞌet whuz unꞌa be nekꞌetsꞌintsiꞌ-i, ꞌet lhat-un lhkꞌuz te nohba whutáleh. 10ꞌEt ꞌukꞌenus hoonzoo-un, ꞌet tꞌewhuntihzeh. ꞌEt huwa Gri oodzin whusahóoltsꞌut de, ꞌet de nohtsun hooloh ꞌinkꞌez ꞌaw hoonli-unyaz nohkꞌé holtsꞌit-un hootáloh. 11ꞌInkꞌez Sizi Gri ꞌen gha ꞌutꞌen tsꞌihꞌun ꞌuntꞌoh-i, ꞌet ndutihtꞌelh. ꞌEt whuz unꞌa Yakꞌusda ba tsꞌodólhtiꞌ ꞌinkꞌez ꞌon nus uzdólhtiꞌ.
Gri ꞌen ooghu yaduk
12Sulhutsinke sulh dahooja la, ꞌet whula gha tsꞌe ꞌon nus lhane dune ndi khuni unzoo-i huyoozílhtsꞌai suliꞌ. ꞌEt tꞌewhuntahzin hukwaꞌ nuszun. 13ꞌEt huwa lerwe ooyoh whucho, ndunne saldanne ꞌinkꞌez ꞌonghohne cha, ꞌet tsꞌiyanne tꞌehoninzun Gri ꞌen gha lhuztih tlꞌool be whédustꞌi léꞌustꞌoh. 14ꞌInkꞌez neMoodihti be lhulhutsinke unline, ꞌenne ndi sluztih tlꞌool ꞌi gha ꞌon nus ꞌulcho-i be whélhoniljut Yakꞌusda ooghuni unzoo-i yahutilhduk ha.
15ꞌAlhaꞌ whulohne sghe hoolnih, ꞌinkꞌez sondólhdah hukwa hutꞌen. ꞌEt hoontsꞌi whulohne si stsꞌun budzi unzoo. ꞌEt whuz unꞌa Gri ꞌen ghu yahalhduk. 16Ndunne sghe ꞌoolnihne, dichꞌoh ꞌahuninzun hukwꞌunꞌa, Gri ꞌen ghu yahulhduk. ꞌAw tsꞌihꞌun unꞌa iloh ꞌuhutꞌen. ꞌAdusꞌai-un ꞌon nus sba hoontsiꞌ huhoolhtselh hukwaꞌ hutꞌen. 17ꞌEt hoontsꞌi whulohne ꞌenne be nekꞌetsꞌintsiꞌ-i, ꞌi be Gri ꞌen ghu yahalhduk. Tꞌehonínzun ndi khuni unzoo-i ba njan susyin, ꞌet hukwa ꞌasodilhꞌai. 18ꞌEt ntsꞌenꞌa yahalhduk ꞌet whunilhchoh sba ꞌantsꞌi ꞌuhoontꞌoh. Dichꞌoh dukꞌunꞌa tilah yahalhduk kꞌus khuni ꞌalhaꞌ ꞌuntꞌoh-i tilah ꞌuhutni. Gri ꞌen ghu yahalhduk ꞌet huwa hoonustꞌiꞌ. ꞌEt nduwhulyiz ꞌet whuz unꞌa za hoonústꞌiꞌ.
Tsꞌukhuna-un, ꞌet Gri ꞌuntꞌoh
19Tꞌenohnuszun, mbene sba tenadudline, ꞌinkꞌez Sizi Gri ooyughi ꞌi be sla ewhudíja, ꞌet ꞌi be ꞌet huwa sla nahudutitnih. 20Ndet hukwa tse hoosdli-un, ꞌet daooduzni ntsꞌoh neꞌustꞌen, ꞌet hoontsꞌi ꞌaw hukwaya oosdleꞌ aitꞌoh. ꞌEt ꞌandit whuz unꞌa za ꞌutistꞌelh, ꞌet huwa ꞌaw hukwaya lhotisdleh. Khusna kꞌus dasusai ꞌet whuz unꞌa za be khusna-i, ꞌi be Gri ꞌet whe dústiꞌ. 21Sba njan nduhoontꞌoh, ꞌawhuz khusna za ꞌustꞌoh de, Gri, ꞌen za ꞌuntꞌoh. Kꞌus dasúsai de, ꞌet de whuchꞌa hootásdoh. 22ꞌEt ꞌawhuz khusna za ꞌustꞌoh de, seꞌ ꞌutꞌen ꞌi mai leꞌ tinelh. Ntsꞌenꞌa ꞌutahaootisalh ꞌaw tꞌeoonuzúszun. 23ꞌEt sba nawh ꞌuhooja ꞌet ꞌantsꞌi whulhetoh nenúztsꞌut. Ntsꞌe suba hoolhtus ooleꞌ, ꞌet whuz unꞌa la oosneh. Ndo Gri bulh ꞌutistꞌelh hukwaꞌ nuszun. ꞌEt ꞌukꞌenus hootázooꞌ wheꞌ hoontꞌoh. 24ꞌEt hoontsꞌi dálhusal de, ꞌet ꞌon nus nohni nohba hootázooꞌ. 25ꞌEt whuz unꞌa ꞌukꞌenus sooꞌ hoontꞌoh, ꞌet sba ꞌalha ꞌuhoontꞌoh. ꞌEt huwa tꞌeoonuszun dálhusal de, ꞌinkꞌez njan za susda de tsꞌiyawh nohbulh za tistꞌelh. ꞌEt be nohba ꞌalha ꞌuhoontꞌoh-i ꞌon nus untiyeh, ꞌinkꞌez ꞌon nus hootáhtꞌeꞌ. ꞌEt whuz unꞌa ꞌuwhutátꞌelh. 26ꞌEt sba hoonahtꞌiꞌ ꞌinkꞌez nohghu nánusja de, ꞌet de si sgha lhkꞌuz te Sizi Gri dutálhtiꞌ.
Gri ba soo uznootꞌi ꞌinkꞌez ꞌen ba dzoh nutsꞌoozut
27Ntsꞌoh dahooja hoontsꞌi, Gri ooghuni unzoo-i, nohba hukwaꞌ ninzun hukwꞌunꞌa za yun ka dúlhtsꞌi. Khun nohbulh ꞌustꞌoh de, kꞌus nohchꞌoh ꞌustꞌoh de, tsꞌiyantsuk whe nohbulh údutastsꞌo nohyughi ꞌinkꞌez nohzul bulh ꞌilho za ꞌuntꞌoh. ꞌEt whuz unꞌa za Sizi ba oohyin. Ndi khuni unzoo-i, ꞌet ꞌi be be ꞌalha ꞌuhoontꞌoh-i tsꞌutꞌih, ꞌet ꞌi be ꞌalhgoh ꞌantsꞌi ꞌilho za léꞌahtꞌoh ꞌet ꞌi be hukwaꞌ ꞌahtꞌen. 28ꞌInkꞌez nohchꞌaz ditnine, ꞌenne bube noolhjut junih. ꞌEt ndahtꞌoh de, ꞌet soo tsꞌet whucho whúbunulhtun, ꞌenne musai tilehne ꞌuhintꞌoh. ꞌEt hoontsꞌi nohni dujihne ꞌahli. Yakꞌusda ꞌen nohbaꞌ hoonla. 29ꞌEt Gri ꞌen ba nohtlꞌa hóoltsꞌut, ꞌaw nohba ꞌalhaꞌ ꞌuntꞌoh za iloh, ooba dzoh nahdeh-un cha. 30ꞌEt ndet whe dzoh nusuzut-un, ꞌet whunulhꞌen ꞌinkꞌez whulh ꞌudahtsꞌo, ꞌet ndustꞌoh.
Currently Selected:
Philippi Whutꞌenne 1: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.