Luke 1
1
Luke ndi ꞌudustlꞌus ndun Theophilus ba ꞌukꞌu neyuzguz
1Lhane ꞌudaꞌ hoolhtus whe hitꞌen be nawhutnuk-i tsꞌihꞌun unꞌa ookwaꞌ ditniꞌ-i, ꞌukꞌe huyanguz. ꞌI tsꞌiyawh netoh neba ꞌalhaꞌ ꞌuntꞌoh. 2ꞌUdechoo wheꞌ whuditꞌen ꞌet dichꞌoh duna be honalhꞌen ꞌinkꞌez Yakꞌusda ooghuni be neꞌústꞌenne huzdliꞌ, ꞌenne nduwhi khuni netlꞌa hídanla-i ꞌuntꞌoh. 3ꞌEt Theophilus nyun dune diztiꞌ-un inli. ꞌInkꞌez si cha ndi ꞌukꞌu nutísguz, tsꞌiyawh ꞌudechoo wheꞌ whuditꞌen-un whutsꞌun dahooja-un ꞌinkꞌez ndet ꞌuwhulhni, soo tsꞌihꞌun unꞌa tꞌeoonúszun ꞌet huwa. 4ꞌEt ꞌonghohne whunyohodalhꞌeꞌ-un, tsꞌihꞌun unꞌa ꞌuhoontꞌoh-un, hodalꞌeꞌ.
Zacharias ooꞌat, Elizabeth ooyaz duneyaz tileh. ꞌEn ꞌuntꞌoh John dune too be ꞌulhꞌen-un ꞌuntꞌoh
5ꞌEt ꞌoh daꞌ Herod ꞌen Judea yun kꞌut whulerwe unli whe, ꞌilhoghun lubret, Zacharias huyulhni, Abijah bulh didowh-un ꞌuntꞌoh. Ooꞌat Elizabeth huyulhni, ꞌen Aaron yé dinzut-un ꞌuntꞌoh. 6ꞌEt nahultꞌoh Yakꞌusda nalh tsꞌihꞌun dune hinli. Yakꞌusda ooghuni buba yutulhúhizyeꞌ-i ꞌinkꞌez ndet butsꞌu hukwaꞌ ninzun hikꞌuneꞌ titꞌen ha, ꞌet tsꞌiyawh hukwꞌú neꞌhutꞌen. ꞌAw hoonli whe bukꞌe holtsꞌit ꞌaítꞌoh. 7ꞌEt hoontsꞌi Elizabeth ꞌaw ooyaz holeꞌ aitꞌoh ꞌinkꞌez nahultꞌoh yoo ꞌun hizulh, ꞌet huwa cha ꞌaw bubukeh holeꞌ aitꞌoh.
8ꞌEt Zacharias bulh ꞌúntꞌohne kꞌunꞌa whe Yakꞌusda nalh lubret be ꞌutꞌen kꞌoh huwana. 9Lubret kꞌunꞌa néꞌhutilelh, ꞌet whuz unꞌa Zacharias, ꞌen cha lubretne ꞌutahahúyalhti yoo sooltsun-i dutálhkꞌun ha. ꞌInka neMoodihti oolugliz whucho tsꞌe danínya. 10ꞌEt yoo sooltsun-i yudilhkꞌun whe ꞌet nduwhulyiz lhane ꞌaz tenahududli.
11ꞌEt loodel kꞌut yoo sooltsun-i dilhkꞌun, ꞌet nailhni tsꞌe, lizas ꞌet usyin whe be hoodiltsai. 12Zacharias khun yutilhꞌen ꞌi be oogha ꞌúnjaz ꞌinkꞌez whenilhjoot. 13ꞌEt lizas ꞌuyulhni, “Zacharias wheniljut iloh. Yakꞌusda ntenadudli yudántsꞌo. Nꞌat Elizabeth ooyaz duneyaz tileh, ꞌinkꞌez booziꞌ John be ootanzilh. 14ꞌEn gha tube hootántꞌeꞌ ꞌinkꞌez whuntálhni. ꞌInkꞌez whuzdli de, ꞌuyoonne lhane cha huwhuntálhni. 15ꞌEt neMoodihti oonalh dune uncha-un tileh. Tsꞌekoo tooꞌ kꞌus too ulhtus-i cha lhtisnel. Whutileh whutso ꞌet hoontsꞌi Ndoni be dutibun. 16ꞌInkꞌez Israel ootsꞌu hainzutne, lhane neMoodihti buYakꞌusda tsꞌu butilelh. 17Nus hooꞌen-un Elijah huyulhni, whuz unꞌa Ndoni ye ulhtus-i be neMoodihti yutso tiyalh. Lhane tsꞌoodunne bubáke budzi butsꞌun tizooꞌ nabutilhtselh. Mbene la ꞌukꞌu nulheꞌustꞌenne, lhane tsꞌihꞌun ꞌuntꞌohne ye whunih-i hitálhchulh. ꞌInkꞌez dune, ꞌenne lhane neMoodihti butsꞌu tiyalh-un, ꞌet wheni lhábudutileh,” lizas ꞌuyulhni.
18ꞌEt Zacharias lizas yoodulhkut, “Ntsꞌenꞌa tꞌewhuntiszeh? Duneti ꞌustꞌoh ꞌinkꞌez sꞌat ꞌen cha yoo ꞌun uzulh whe ꞌuntꞌoh.”
19ꞌEt lizas ꞌuyulhni, “Si Gabriel ꞌustꞌoh. Yakꞌusda zih usyin-un. Ntsꞌu whúsazꞌaꞌ whe ꞌustꞌoh nyulh yatisduk ꞌinkꞌez ndi khuni unzoo-i nyudutásnelh ha. 20Soo zilhtsꞌai! Sghuni daja dusni, soo ꞌet néwhultsꞌut de, ꞌet tsꞌiyawh ꞌet dó tanelh. ꞌEt hoontsꞌi daja dusni-un ꞌaw mba ꞌalhaꞌ lheꞌhootꞌoh. ꞌInka ndet ꞌuwhutanelh whutsꞌun, ꞌaw yalhtuzalhduk!” yulhni.
21ꞌInkꞌez dune, tsꞌiyawh Zacharias hika tse hooli, ꞌinkꞌez daja whe suba ꞌuntꞌoh saꞌ whe lugliz whucho tsꞌe ꞌutꞌen. 22Tenanja whe ꞌaw bubulh yaóolhduk aitꞌoh. ꞌInkꞌez tꞌehoninzun hoonli be nghun néwhultsꞌut whe ꞌuntꞌoh. ꞌInkꞌez ꞌantsꞌi buba núlhni whe bubulh yalhduk.
23ꞌEt hukwꞌelhꞌaz neꞌúle-un ꞌetsul ꞌuhooja whe duyoh tsꞌe whenája. 24ꞌEt hukwꞌelhꞌaz ooꞌat Elizabeth ooyaz ꞌucháinya whe kwulat sanun ꞌet duwhulyiz ꞌet ꞌilhoghun indaꞌ. ꞌEt njan ndutni, 25“ꞌEt whuz unꞌa ꞌazih neMoodihti sulh ꞌutꞌen. ꞌOh daꞌ dzin sunalni inleꞌ whe hukwaya usdli-un, tsꞌiyawh stsꞌa ha náhonla.”
Lizas Gabriel, ꞌen Mary uyúlhni, “Tsꞌoodun baꞌ tanelh. ꞌEn Sizi dutanelh”
26ꞌEt bulh lhkꞌu tat sanun whe Yakꞌusda lizas Gabriel huyulhni, ꞌen keyoh Nazareth tsꞌe whe yalhꞌaꞌ. Njan keyoh ꞌet yun kꞌut Galilee whuzꞌai. 27ꞌIlhoghun tsꞌeke ꞌaw dune tꞌenuszun-un, ꞌen tsꞌun whelꞌaꞌ. ꞌIlhoghun dune, Joseph huyúlhni, David tsꞌu haindene, ꞌilhoghun ꞌuntꞌoh. Yughu tidalh-un yutsꞌu lhaoodinla. Ndun ꞌaw dune tꞌenuszun-un ꞌuntꞌoh, Mary huyúlhni. 28Lizas yutsꞌo whusainya, ꞌet njan ndúyulhni, “Whunílhni! Yakꞌusda ntsꞌun unzoo! Nemoodihti nyulh ꞌuntꞌoh ꞌet huwa tsꞌekoo toh ꞌukꞌenus hoontꞌiꞌ-un inli!”
29ꞌEt yutilhꞌen whe tube oogha ꞌúnjaz. ꞌInkꞌez ꞌet howu nuni nuzut ooghuni daja ni whe ꞌutni. 30ꞌInkꞌez lizas uyúlhni, “Mary niljut iloh! Yakꞌusda nyulh hoontꞌiꞌ. 31Whunilhꞌen tsꞌoodun baꞌ tanelh. Duneyaz nyaz tileh. ꞌInkꞌez Sizi dutanelh. 32ꞌEn ncha-un tileh. ꞌEn ꞌuhidutanelh soo ꞌudedo-un ooYeꞌ tileh. ꞌInkꞌez Yakꞌusda neMoodihti David ootsodaꞌ-un, yukꞌe dinda-i ꞌindaꞌ-un, ꞌet yutlꞌa óotiꞌalh. 33ꞌEt Jacob ootsꞌu haindene ꞌilhiz wheni buba lerwe tileh. ꞌInkꞌez lerwe tileh-un, ꞌaw whula toh hootáloh.”
34ꞌEt Mary lizas ꞌulhni, “Ntsꞌenꞌa ꞌuwhutanelh, ꞌaw dune tꞌenuzuszun whe ꞌustꞌoh.”
35ꞌEt lizas yulh yalhduk, “Ndoni nkꞌe dinde ꞌinkꞌez ꞌudedo-i ye ulhtus-i, ꞌi nkꞌut sa whusꞌih be whútaleh. Yustꞌe lubeshi ooghu hooloh-i, whuzdli te, Yakꞌusda ooYeꞌ hidutanelh. 36ꞌAndit nyunat-un Elizabeth yoo ꞌun uzulh-un, ꞌen cha duneyaz oochainya. ꞌAw buzkeh holeꞌ aitꞌoh huyulhni, ꞌet hoontsꞌi ꞌawet whulh lhkꞌuta sanun be suliꞌ. 37ꞌAlhaꞌ ꞌi be Yakꞌusda ꞌaw hoonli-un ooba hoolhtus-un hooloh.”
38ꞌEt Mary ꞌutni, “Nilhꞌen, si neMoodihti be ꞌulhna-un ꞌustꞌoh! Ntsꞌenꞌa la nghuni kꞌunꞌa daootanelh dini, whuz unꞌa sulh ꞌúhoneh.” ꞌEt lizas yugho whenája.
Mary ꞌen Elizabeth ꞌatsulyaz whuba yuzisda
39ꞌEt hukwꞌelhꞌaz Mary lhadúja. ꞌEt yun kꞌut nódistꞌai, whuz Judea yun kꞌut ꞌilhoghun keyoh whuzꞌai, ꞌaho whuz whinya. 40Zacharias ooyoh daninya ꞌinkꞌez Elizabeth hadih yulhni. 41ꞌEt Elizabeth Mary daja ni yuduztsꞌai ibulh tsꞌoodun oochan tsꞌe tilhloh. ꞌInkꞌez Ndoni be dizbun. 42Elizabeth tube cho uyúlhni “Tsꞌekoo toh ꞌukꞌenus hoonzoo-un nyulh ꞌuhooja. ꞌInkꞌez nyaz whutáleh-un, dawhuldzooꞌ-un nghá whultsꞌut! 43Di ha suba sgha whultsꞌut sMoodihti ooloo ꞌen sghu ninya? 44ꞌEt, hadih ꞌusudini whe nyuduzústsꞌai ibulh, tsꞌoodun schan tsꞌe hoontꞌiꞌ kꞌet tilhloh. 45Mbe la tsꞌeke ooba ꞌalha ꞌuhoontꞌoh-un, ꞌen ꞌukꞌenus hoonzoo-un oogha whultsꞌut. Ntsꞌenꞌa la neMoodihti daja yulhni-un, ooba ꞌalha ꞌuhoontꞌoh, ꞌet huwa ꞌoh te ooba neꞌwhutitꞌen.”
Mary ooyun
46ꞌEt Mary njan ndutni,
“Szul, ꞌi neMoodihti yudílhtiꞌ.
47ꞌInkꞌez Yakꞌusda súlhyih-un. ꞌEn be syughi whunílhni.
48ꞌAlhaꞌ ndun be ꞌulhna-un,
ntsꞌenꞌa yo ꞌududildzun-un tꞌewhuninzun.
Whunulhꞌen, ꞌandit whutsꞌun, nus de,
ꞌilhiz wheni ndi yun kꞌut tsꞌiyanne ꞌukꞌenus hoonzoo-un bulh ꞌúhooja sodutánelh.
49ꞌAlhaꞌ mbe hooncha whe tuneꞌ sulhꞌen-un,
ꞌen be whúnujut-un ꞌuntꞌoh ꞌinkꞌez booziꞌ, ꞌi ꞌukꞌenus diztiꞌ.
50ꞌInkꞌez ye teꞌninzun
ꞌi mbene la ye nuljutne bukꞌidoꞌa, nus de yinka dunene.
51Dugan oonutꞌi be hoolhtus tuneꞌ ꞌutꞌen.
Dudzi be ꞌududíltiꞌne, ꞌenne tsꞌiyawh yabanla.
52Mbene la dune nchane hukꞌo dáltsꞌiꞌ nanábanla.
ꞌEt mbene la yo ꞌuntꞌohne, ꞌenne hincha ꞌubulhtsi.
53Ooye últsilhne, unzoo-i be ubudilhbun.
Hoonzooꞌ ꞌuntꞌohne,
ꞌaw hoonliyaz bughá lhiꞌal whe whe nábalhꞌaꞌ.
54Be ꞌustlenne Israelne, ꞌenne bugha teꞌninzun,
ꞌet whunalnih whe bula ꞌuja.
55ꞌEt whuz unꞌa la nebáke bubulh yailhduk Abraham ꞌinkꞌez yutsꞌu haindene, ꞌilhiz wheni.”
56ꞌEt Mary ta sanun atꞌen whe Elizabeth yuzih indaꞌ. ꞌEt hukwꞌelhꞌaz duyoh tsꞌe whe naja.
John dune too be ꞌulhꞌen-un whuzdliꞌ
57ꞌEt ꞌawet Elizabeth ooyaz whutaleh ꞌet neóodilhdzut ꞌinkꞌez ooyeꞌ whúzdliꞌ. 58ꞌEt ye nghoh dilhtsꞌine ꞌinkꞌez oonatneke whulh ꞌúhuduztsꞌai ntsꞌenꞌa neMoodihti yugha teꞌninzin. Tsꞌiyawh hiyulh whunálhni.
John ꞌawet yuka dune unli-i kꞌut hititꞌus
59ꞌEt ꞌawet whulh lhkꞌu dit dzin whe tsꞌoodun yuka dune unli-i kꞌut hititꞌus. ꞌInkꞌez oobá booziꞌ Zacharias ꞌi be huyootázilh. 60ꞌEt hoontsꞌi ooloo ꞌutni, “ꞌAwundooh! Booziꞌ John be huyootázilh,” ꞌubulhni.
61ꞌEt ꞌuhuyúlhni, “Nyunatneke butoh ꞌaw John booziꞌne hooloh!”
62ꞌEt oobá di oozíꞌ higha dútaꞌalh ꞌet tꞌehontizeh hukwaꞌ huninzun. ꞌInka dula be hiba núlhni whuz unꞌa huyoodulhkut. 63Dula be núlhnih whe ꞌudustlꞌus butsꞌu haꞌ daniꞌ, ꞌinkꞌez ꞌukꞌuneꞌ ꞌuzguz, “Booziꞌ John hidutanelh.” ꞌInkꞌez tsꞌiyawh buba hooncha. 64ꞌAho yanawhénilduk whe Yakꞌusda dálhtiꞌ. 65Yunat whutꞌenne, tsꞌiyawh nujut bughu nédiltsꞌut. ꞌInkꞌez Judea ndulcho ꞌoh whutꞌenne, tsꞌiyawh howu yahalhduk. 66ꞌEt mbene la whulh udantsꞌone, tsꞌiyawh dudzi be hódanla ꞌinkꞌez ꞌulhodutni, “Ndun tsꞌoodun dantꞌoh-un suba ooleꞌ?” hutni. ꞌInkꞌez neMoodihti dula be yula ꞌutꞌen.
Zacharias nus hónꞌen-un
67ꞌEt oobá Zacharias, Ndoni be dizbun ꞌinkꞌez nus hónꞌen whe yailhduk njan ndutni,
68“Israelne buYakꞌusda ꞌinkꞌez buMoodihti, dalzooꞌ la!
Ooduneꞌne, butsꞌunusiya ꞌinkꞌez nabonket.
69David ꞌen Yakꞌusda be ꞌustle-un, ꞌen tsꞌu haindene,
bugha neulhyis-un hooncha-un, neba yulhtsi.
70ꞌUdaꞌ wheꞌ whuditꞌen whutsꞌun,
whuz ꞌunꞌa Yakꞌusda be nus hooꞌenne bube yailhduk.
71ꞌEt whe nechꞌaz ditnine ꞌinkꞌez mbene netsꞌu dutnine,
tsꞌiyawh bula kꞌé haoodiltsꞌut, ꞌet whe neulhyis.
72Nebáke Yakꞌusda butsꞌu yoozi-i,
ꞌinkꞌez ndi khuni buba lhaídinla-i, ꞌet hinaoolnih.
73Netsodaꞌ-un Abraham Yakꞌusda dughuni yutlꞌa danꞌai whe ꞌinkꞌez yutsꞌu náhizya,
74ꞌet whe nechꞌaz ditnine bula kꞌe haoodiltsꞌut ꞌet whe neulhyis.
ꞌInkꞌez ꞌaw whelhtsꞌuniljut whe Yakꞌusda baꞌ ꞌuztitꞌelh.
75Lubeshi lheꞌulhꞌenne ꞌuztileh ꞌinkꞌez tsꞌihꞌun unꞌa ꞌuztitꞌelh,
Yakꞌusda oonalh dzin totsuk tsꞌukhuna whe oobaꞌ uztitelh.
76ꞌInkꞌez nyun tsꞌoodunyaz, kꞌus ꞌudedo-un, ba nus hooꞌen-un nyo dutanelh.
NeMoodihti ꞌen ti hoonzoo ooba whutalhtselh ha ootso tanyalh ꞌet huwa.
77ꞌInkꞌez ooduneꞌne soo cho tꞌehozoozeh uzditijih-un ꞌinkꞌez nelubeshi cha neba gak yutilhtselh, ꞌet huwun nedutanelh.
78NeYakꞌusda nekꞌentsiꞌ whe negha teꞌnanzin.
ꞌInka mbe la sa yo táꞌaih tsꞌutni-un,
ꞌen ndus de whutsꞌun netsꞌú kꞌunadaih.
79Tsalhgus yo dilhtsꞌine ꞌinkꞌez datsahne cha,
ꞌenne tsꞌiyawh ubeídutadih.
ꞌInkꞌez lhutiyalh-un whe nedzi sooꞌ hotꞌeꞌ,
ꞌet ntsꞌe whe honꞌa-un, ꞌet whuneuntilhtun.
ꞌEt huwa Yakꞌusda be nus honꞌen-un nyo dutanelh,”
ni Zacharias.
80ꞌEt tsꞌoodun John, ꞌen nuyeh ꞌinkꞌez ooyughi ulhtus suliꞌ. ꞌInkꞌez ndet la Israel ooduneꞌne bunalhtsꞌet ha ooyaꞌ dunábuntiltun ha, ꞌet whutsꞌun ntsꞌe la dune lhuhootꞌih tsꞌe indaꞌ.
Currently Selected:
Luke 1: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.