John 15
15
Sizi yugha hodulꞌehne hubodulhꞌeh mai chun oozischum ootsꞌu há nalhyeh, ꞌet whuz unꞌa za yugha hodulꞌehne huyulh za ootꞌeꞌ. ꞌEt huwun hubodulhꞌeh
1“Soo mai chun ꞌi ꞌustꞌoh ꞌinkꞌez sBá ꞌen mai kꞌet huwunlí-un unli. 2Mbene la si sgha ꞌuzuschum unline, bumaiꞌ hooloh de, ꞌi ꞌuzooschum butsꞌu haídule. ꞌInkꞌez mbene la bumaiꞌ lhai de, ndai la ꞌutsiꞌ-i bughu wheyoonli-i, ꞌi ꞌet de la ꞌon nus bumaiꞌ lhai ooleꞌ. 3Ndi khuni be nohbulh yasduk-i, ꞌi be ꞌudaꞌ nohunaꞌide whe ꞌahtꞌoh. 4Nohni syúdolhtsꞌiꞌ ꞌinkꞌez si cha nohyudóosdaꞌ. ꞌUzooschum mai chun ooneídanꞌa de za, oomaiꞌ whutaleh. ꞌEt whuz unꞌa za nohni nohghun ꞌalha ꞌuhoontꞌoh. Si syudúlhtsꞌi de, ꞌet de za nohmaiꞌ whutáleh.
5Si mai chun ꞌustꞌoh ꞌinkꞌez nohni ꞌuzooschum ꞌahtꞌoh. Mbene la si syudínda ꞌinkꞌez si cha ooyudúsdane, ꞌenne za bumaiꞌ lhai tileh. ꞌEt si schꞌoh, ꞌaw hoonli ꞌuhuhooleh-un hooloh. 6Mbene la si syudínda ilohne, ꞌenne ꞌuzooschum kꞌunꞌa kꞌuhídutꞌus ꞌinkꞌez nꞌun hidutulhtꞌoh, ꞌet dugi, ꞌet nduhíntꞌoh. ꞌOhwhi ꞌuzooschum nahidulhdzooh ꞌinkꞌez tsuh hidulhkuk ꞌinkꞌez hidílhkꞌun. 7ꞌEt si syódulhtsꞌi ꞌinkꞌez sghuni nohyo dizꞌai de, ꞌet ndet hukwaꞌ nahzun-un, ꞌet tsꞌiyawh nohba ꞌet nduwhutanelh. 8ꞌInkꞌez mai lhai nohtsꞌu ha núlhyeh de, ꞌet huwa la sBá ꞌen ooba whudóltiꞌ. ꞌEt sgha hodulꞌehne oohleꞌ.
9SBá ꞌen si skꞌentsiꞌ. ꞌEt whuz unꞌa za nohkꞌesiꞌ, ꞌet huwa be nohkꞌesiꞌ-i bulh za oohtꞌeꞌ. 10SBá ntsꞌenꞌa la sba lhúhizyeꞌ ookꞌúneꞌ zustꞌen ꞌinkꞌez yé skꞌe ntsiꞌ-i, ꞌi cha bulh ꞌístꞌeꞌ. ꞌEt whuz unꞌa za khuni nohtlꞌa disdla-i ookꞌúneꞌ ꞌahtꞌen de, ꞌet de la be nohkꞌesiꞌ-i, ꞌi bulh óohtꞌeꞌ. 11ꞌAndit njan nohdúsni-un, ꞌet whe la be hoonustꞌiꞌ-i, ꞌi be hoonáhtꞌiꞌ de, ꞌet de la hoonáhtꞌiꞌ kꞌet ꞌaw ꞌon ꞌun hóhtꞌeꞌ aitꞌoh. 12Ndi sghuni nohtlꞌa dísꞌai ꞌi ndutni, tsꞌiyawh ꞌilhone ꞌahli whe ntsꞌenꞌa la nohkꞌesiꞌ, whuz unꞌa za lhkꞌe oohsiꞌ. 13ꞌIlhoghun dune duyadanke bukꞌuz dazsai de, ꞌaw ꞌon ꞌun ye búkꞌeoosꞌi-i hooloh. 14ꞌInkꞌez khuni nohtlꞌa dísdla-i ookꞌúneꞌ ꞌahtꞌen de, ꞌet nohni syadanke ꞌahtꞌoh. 15ꞌAw ꞌon ꞌun se ꞌustlenne lhunohduzúsni, ꞌustlenne, ꞌenne bumoodih ntsꞌoh tuneꞌ ꞌutꞌen, ꞌaw tꞌéhonúszun. Si ntsꞌoh te la sBá ooghun whudástsꞌo, ꞌet soo tsꞌiyawh whunóhnistan, ꞌet huwa syadanke nohdúsni. 16ꞌAw nohni ꞌutahalhúsulhtel. Si ꞌutáhanóhisdla toohdilh ꞌinkꞌez mai ha nóolhyeh ꞌinkꞌez nohmaiꞌ ꞌilhiz wheni ootꞌeꞌ, ꞌet hukwa ꞌet nenóhnusdla. ꞌEt huwa la sBá ndai la si sooziꞌ gha ootsꞌo hukwa dahni-i, ꞌi la nohgha íyoꞌalh. 17ꞌAndit nohdúsni, tsꞌiyawh lhkꞌe oohsiꞌ.
18Ndi yun kꞌut whuduneꞌne nohtsꞌu hudutni de, whunalhnih nohni nohtsꞌo dutitni whutso, ꞌet ꞌudaꞌ si stsꞌu hudutni inleꞌ. 19ꞌEnne buloh ꞌahli de, ꞌet daꞌ nohkꞌe hootsiꞌ ooleꞌ daꞌ. ꞌEt hoontsꞌi nohni butoh ꞌutáhanóhisdla, ꞌinkꞌez ꞌaw ꞌon ꞌun buloh lháhloh, ꞌet huwa yinka whuduneꞌne nohtsꞌu hudutni. 20ꞌEt huwa daja nohdásniꞌ la whunalhnih, ꞌaw ꞌustle-un, ꞌen dumoodih ando lheꞌítꞌoh, si dzoh nusúhulhdzut te, nohni cha dzoh nunóhotilhdzut. ꞌEt sghuni hikꞌúneꞌ ꞌustꞌen de, nohni nohghuni cha la hikꞌúneꞌ ootꞌen. 21ꞌEt nohni schꞌeꞌ ꞌahli, ꞌet huwa la ꞌoh te neꞌnohuhoolhꞌen, mbe la ndun whuz de sútilhꞌaꞌ-un, ꞌaw tꞌéhinúszun ꞌet huwa. 22ꞌAw si whusálhusyal ꞌinkꞌez bubulh yálhusdih de, lubeshi ꞌulhꞌenne hinli ꞌaw tꞌéhonózin ꞌaítꞌoh. ꞌEt ꞌandit whutsꞌun dulubeshi ꞌaw whé nuhínoolhꞌiꞌ-un hooloh. 23Mbene la stsꞌu dutníne, sBá ꞌen cha hitsꞌu dutni whe ꞌuhintꞌoh. 24Ndi ꞌutꞌen ꞌaw ꞌuyoonne lheꞌyulhꞌén-i bunalh lheꞌyúsꞌel de, ꞌet de lubeshi ꞌulhꞌenne hinli-un ꞌaw daꞌ tꞌehonószin. ꞌEt ꞌandit ꞌutꞌen ꞌusꞌen-i hinalhꞌen ꞌet huwa si ꞌinkꞌez sBá bulh naniltꞌoh netsꞌu hudutni. 25ꞌInkꞌez ndi Yakꞌusda ooghuni buba ꞌukꞌu nusguz whe ꞌet ndutni, ‘ꞌAw hoonli huwa iloh stsꞌu hudutni.’ Daja ni la ꞌandit ꞌawet ꞌoh te neꞌwhustꞌen.
26ꞌEt hoontsꞌi nohLaꞌutꞌen-un, Ndoni, ndai la be ꞌalha ꞌuhoontꞌoh-i ootsꞌu haídiltsꞌut, ꞌen ꞌuntꞌoh sBá ootsꞌun nohtsꞌun tisꞌalh, ꞌen la whusainya de, si sghun tsꞌiyawh whunóhnoolhtun, sBá yutsꞌu haínya ꞌet huwa. 27ꞌInkꞌez nohni cha la si sghun ꞌuyoonne whúbuntilhtun, soo ꞌudechoo daꞌ whutsꞌun sulh ꞌíhtꞌen ꞌet huwa.”
Currently Selected:
John 15: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.