James 1
1
Mbene la Lizwifne ooba ꞌalha ꞌuhoontꞌohne James hadih ꞌubulhni
1Si James, Yakꞌusda ꞌinkꞌez neMoodihti Sizi Gri ba ꞌulhna-un usdli. Nohni Lizwifne, mbene la Sizi Gri ooba ꞌalhaꞌ yintꞌohne, nohkeyoh whuchꞌa nohonÃzyootne ꞌahli, ndi ꞌudustlꞌus nohtsꞌó kꞌesges-i, ndi yun kꞌut whutꞌenne tsꞌiyawh be hadih nohdúsni.
Dzoh nuhudeh-un huwa hóhodulꞌeh
2Sulhutsinke lhat-un whe lhelhtsꞌun unꞌa dzoh nahdeh de, ꞌet hoontsꞌi hoonahtꞌiꞌ whe whuz unꞌa za oohtꞌeꞌ. 3Tꞌewhunáhzun Yakꞌusda ootꞌa ninahtan whe lhelhtsꞌun unꞌa dzoh nahdeh, ꞌet whuz unꞌa hodoolhꞌeh soo ulhtus whe núdolhyaꞌ ꞌet huwa. 4Yakꞌusda ba ulhtusne sahliꞌ, tsꞌihꞌun unꞌa tsꞌiyawh hodoolhꞌeh. ꞌEt de la Yakꞌusda ba lhadúlyane oohleꞌ. ꞌInkꞌez tsꞌihꞌun unꞌa ꞌutꞌen kꞌoh lhaóodahla. Yakꞌusda ba hoonliyaz whuyit lheꞌáhnel. 5ꞌEt nohni whulohne Yakꞌusda be whútnih-i ꞌaw lhahtꞌih de, ꞌet de Yakꞌusda hika huyoodolhkut. ꞌEt de ye dánzoo whe bugha Ãtaꞌalh. ꞌInkꞌez ꞌaw yooya uboolhtselh aitꞌoh. 6Mbene la yoodulkutne, bé ꞌalha ꞌuhoontꞌoh-i be hudoontni. Khun te buba nawh ꞌuhotꞌeꞌ junih. Mbene ooba nawh ꞌuhoontꞌohne, nilhtsꞌi too bubulh nudutun leꞌ hintꞌoh. 7Nduntꞌohne dune khun te neMoodihti ꞌaw hoonli-unyaz bugha óotaꞌalh hunoozin junih! 8Nduntꞌohne, ꞌahoolhyiz nawh ꞌuhitꞌelhne hinli.
Hoonzoo ꞌuntꞌohne ꞌinkꞌez telꞌenne cha Yakꞌusda ba lhgha zaꞌ ꞌuhintꞌoh
9Neulhutsin telꞌen-un, ꞌen Yakꞌusda ꞌuntꞌoh-un yulhtsi de, hótꞌeꞌ hubaꞌ hoontꞌoh. 10ꞌEt hoontsꞌi hoonzoo ꞌuntꞌoh-un duzooneya be do ꞌúdudildzun-un, ꞌen Yakꞌusda yo naꞌyitilalh, ꞌet huwa hótꞌeꞌ hubaꞌ hoontꞌoh. ꞌEt hoontsꞌi tꞌewhunónzin ntsꞌenꞌa la ꞌindaiyaz dátsaih, whuz unꞌa za ye hoonzoo ꞌuntꞌoh-i, ꞌi gha khoonaꞌ aitꞌoh. 11ꞌEt sa ha ꞌaih te ꞌi be tube whúnilwus. ꞌI be ꞌindai chun dugih te, bindai nakuk. Lheldzooꞌ whundoútꞌen ꞌet hoontsꞌi hooloh lhih. Whuz unꞌa za hoonzoo ꞌuntꞌohne ꞌawhuz dude ꞌutꞌen ꞌuhulhꞌen whe didutchꞌoh hoontsꞌi huhooloh hutileh.
Dzoh nutsꞌuzut ꞌet hoontsꞌi Yakꞌusda ookꞌe tsꞌoosiꞌ
12Mbe la óolhdzai-un, ꞌawhuz whulh usyin, ꞌen ꞌukꞌenus hoonzoo-un oogha whutaltsꞌulh. ꞌEn ꞌuntꞌoh ꞌilhiz ye khútinalh-un ooghá whuntꞌai. Whuchꞌaꞌ whunÃlhde-un, ꞌet cha oogha whútaltsꞌulh. Mbene la neMoodihti yukꞌentsiꞌne, whuz unꞌa butsꞌún hoozi.
13ꞌIlhoghun lubeshi tsꞌu nÃntꞌi de, khun te Yakꞌusda sóolhdzih dooniꞌ junih. ꞌAw Yakꞌusda ntsiꞌ-i be óldzih aitꞌoh. ꞌInkꞌez didutchꞌoh cha whuz unꞌa za ꞌuyoonne hoontsiꞌ tsꞌe ꞌubunoolhtꞌi aitꞌoh. 14ꞌEt hoontsꞌi wheni ꞌilhone tsinli whe whenichꞌoh hukwaꞌ ꞌuzninzun ꞌet huwa lubeshi ꞌuztilhꞌelh-un tsꞌe whutsꞌúznintꞌi. 15Ndutsꞌutꞌen de, ꞌet ntsꞌenꞌa la hukwaꞌ ꞌuzninzun kꞌunꞌa whe lubeshi ꞌutsꞌulhꞌih-un, ꞌet lubeshi wheditꞌiꞌ. Lubeshi ꞌutsꞌulhꞌen te, ꞌi gha datsꞌútsaih.
16Sulhutsinke ookꞌesiꞌne, nanoohtꞌah júnih! 17NeBá, ꞌen yakꞌuz be hootꞌen-i tsꞌiyawh ꞌuyinla. Ndi be hootꞌen-i whuloh te ꞌutsꞌun unꞌa naꞌutꞌih ꞌinkꞌez tsawhúsꞌih leꞌ whulhꞌih. NeBá ꞌaw nawh huninizun-un unli iloh. ꞌEt huwa dai la ndus de negha nukat-i unzoo ꞌinkꞌez soo tsꞌihꞌun ꞌuntꞌoh, ꞌi tsꞌiyawh ꞌen za tsꞌu ha whúkat wheꞌ hoontꞌoh. 18Dichꞌoh hukwaꞌ ninzun-un, ꞌet whuz unꞌa ꞌuja whe ndi khuni ꞌalhaꞌ ꞌuntꞌoh-i, ꞌet ꞌi be doo cha tsꞌuwhuzdli. ꞌEt whuz unꞌa ndúhooja ndai la ꞌuyalhꞌen-i ootoh whe wheni ꞌudechoo oochꞌeꞌne tsꞌuzdliꞌ.
ꞌIlhoghun ꞌahli whe ꞌa cho ohtsꞌo
19ꞌEt huwa sulhutsinke ookꞌesiꞌne, ꞌilhone ꞌahli whe Yakꞌusda ooghuni soo ꞌa cho dohtsꞌo. Nánilhtsulyaz hukwꞌu nunà nulhzut whe yatulhdih. Khun te hunólhchꞌeh junih. 20Huzáhke de, Yakꞌusda ye tsꞌihꞌun unꞌa ꞌuntꞌoh-i, ꞌaw ookꞌuneꞌ oohtꞌen aitꞌoh.
Yakꞌusda ooghuni ookꞌuneꞌ ꞌahtꞌen ꞌantsꞌi oozúlhtsꞌai iloh
21ꞌEt ꞌinka tsꞌiyai whudutsun kꞌunꞌa neꞌahtꞌen, ꞌinkꞌez lhat-un whe tankꞌus unꞌa ꞌahtꞌen-un, ꞌet ꞌi tsꞌiyawh whula doohtnih. ꞌInkꞌez Yakꞌusda ooghuni nohyudánde-i, ꞌi nohdzi yo úlhdzun whe ólhchoot. Ndi khuni ꞌi be za nohtilhyih.
22Yakꞌusda ooghuni daja ni la, whuz unꞌa ookꞌuneꞌ oohtꞌen. ꞌAntsꞌi oozúlhtsꞌai iloh. ꞌEt ndahtꞌen de, nohnichꞌoh naꞌdunahtꞌah whé ꞌahtꞌen. 23ꞌEt mbene ndi khuni ꞌantsꞌi hiditsꞌo ꞌet hoontsꞌi lheyúlhchootne, ꞌenne nduntꞌohne, ꞌenne ꞌuhintꞌoh, ndai la be naꞌuzdunulꞌen ꞌi be naꞌhundunulꞌen, hukꞌo tsꞌe ꞌuhintꞌoh. 24Dichꞌoh naꞌdunulꞌen, ꞌinkꞌez daootꞌen ꞌaho whunahoodulneh. 25ꞌEt hoontsꞌi Yakꞌusda ooghuni lhaidinla-i, ꞌi be lubeshi chꞌa naneulhti, soo cho hikꞌu yalhduk ꞌinkꞌez whunalhuhodulhnoh, ꞌinkꞌez daja ni ꞌahoolhyiz hukwꞌú neꞌhutꞌen de, ndutꞌenne, whuz unꞌa dude ꞌutꞌen kꞌoh huwa ꞌukꞌenus hoonzoo-un bugha whutaltsꞌulh.
26Mbene la nohtoh Yakꞌusda ba neꞌhutꞌen huninzun, ꞌet hoontsꞌi ꞌaw dughuni gha lhéꞌoolihne, dichꞌoh naꞌhundunutꞌah. ꞌEt ꞌantsꞌet nduntꞌohne Yakꞌusda ba hutꞌen-un, ꞌet ꞌaw hoonli lhuhóoloh. 27ꞌEt tsꞌihꞌun ꞌuhoontꞌoh, ꞌinkꞌez ꞌalha ꞌuhoontꞌoh whe Yakꞌusda neBá, ꞌen ba néꞌtsꞌutꞌen-un, ꞌet njan dúhoontꞌoh: tsꞌunohne ꞌinkꞌez tsandilhne, ꞌenne dzoh nahudeh huwa buzih nutsꞌoodilh hubaꞌ hoontꞌoh bula tsꞌootꞌen ha. ꞌInkꞌez cha ndi yun kꞌut dawhútꞌen lubeshi ꞌulꞌen, ꞌet whuchꞌa khutsꞌoodleꞌ.
Currently Selected:
James 1: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.