Matthew 26
26
Jesus yooya whútsul hikunúta hituzilhghelh ha
1ꞋEt ꞌawet Jesus tsꞌiyantsuk ubudáni whe yugha hodulꞌehne ꞌet ndúbulhni, 2“Tꞌeoonahzun nat dzin whuzꞌai whe butus lhuseya-un ꞌet whunahutilnih. ꞋEt de Yinka Dune Yeꞌ butlꞌa hitilhtelh ꞌinkꞌez tulalhgus kꞌehúyitalhtelh.”
3ꞋEt ꞌoh whuya hoozulh whe za, lubret ꞌudedone, Moses be ꞌudustlꞌus ꞌukꞌu nunáguzne, ꞌinkꞌez dune ꞌutso whudilhdzulhne cha, tsꞌiyawh lubret ꞌukꞌenus díztiꞌ-un, Caiaphas huyulhni, ooyoh sooꞌ whulcho ꞌinka ꞌet ꞌilhunahosdil. 4ꞋAlhgoh yahalhduk ꞌinkꞌez howhutsꞌit whe hoonli hiba ꞌuhoonla whe Jesus huyitálhchulh ꞌinkꞌez hituzilhghelh. 5“ꞋEt hoontsꞌi njan butus lhuseya-un ꞌet whutoh ꞌutsꞌinla de dookwa la dunene lhtahahótꞌalh,” hutni.
Datitsah whutso tsꞌeke Jesus kꞌunutsꞌútjul-i yutsi kꞌeyilhdzo
6ꞋEt keyoh whuyaz Bethany huwhútni-un, ꞌet Simon ooka whulhjut ínleꞌ-un, leprosy huyúlhni, ooyoh Jesus yuzih usda. 7ꞋIlhoghun tsꞌeke bughu daninya whe tse díztiꞌ-i, alabaster huyúlhni, ꞌi be luboodai ꞌulya, ꞌi yiꞌalh. Yoo sooltsun-i, ꞌi tube diztiꞌ whe ꞌuntꞌoh. ꞋEt lutab kꞌut naꞌutꞌalh whe yutsi kꞌeyilhdzo.
8ꞋEt yugha hodulꞌehne hinilhꞌen whe hukwa lheꞌhunizun, ꞌinkꞌez ndúlhodutni, “ꞋEt di ha ndi ꞌantsꞌi nintaꞌyulhꞌih? 9Ndi yoo diztiꞌ-i béꞌ tsꞌonket de, tsꞌiyawh telꞌenne gha tsꞌoodzaih ooleꞌ daꞌ!”
10ꞋEt Jesus tꞌeoonanzin whe ꞌet ndúbulhni, “Ndun tsꞌeke ootsꞌá ha lhozahꞌai. ꞋUtꞌen unzoo-i sba ꞌinla whe ꞌuntꞌoh. 11ꞋAhoolhyiz telꞌenne bubulh ꞌáhtꞌoh, ꞌet hoontsꞌi si ꞌahoolhyiz ꞌaw nohbulh lheꞌtuzistꞌel. 12ꞋAlhaꞌ ndi yoo sooltsun-i ꞌadutistelh huba syustꞌe yukꞌé yilhdzo whe ꞌutꞌen. ꞋEt whuz unꞌa lhasúdinla. 13ꞋAlhaꞌ nohdusni ndi yun kꞌut ndulcho whe ndi khuni unzoo-i nudútikat, ndun tsꞌeke ndet ꞌuhoonla-un, ꞌet hukwꞌu naootitnuk ꞌet whe dune yunatilnih.”
Judas Jesus be óotakulh hukwaꞌ ninzun
14ꞋEt whe ndunne whunizyane ꞌon ꞌat nane, butoh ꞌilhoghun Judas Iscariot huyulhni, ꞌen lubret bumoodihne butsꞌu whinya. 15ꞋEt ꞌúbulhni, “Daltsuk sgha tíhꞌalh ndun dune nohtlꞌásti de?” “Tat whunizyai sooniya, silver,” huyulhni, ꞌet ꞌultsuk hiba huyolhto. 16ꞋEt whutsꞌun butlꞌa itilhtelh-un ꞌet hukwunúta.
Jesus yugha hodulꞌehne butus lhuséya-un bubulh naꞌutꞌalh
17ꞋEt ꞌawet lhes lhuntildoh-un ꞌandit dzin whusahóoltsꞌut whe Jesus yugha hodulꞌehne, highu nindil ꞌinkꞌez huyoodulhdut, “Njan butus lhuseya-un ꞌutaꞌúlh-un, ndet mba lhatsꞌodutileh hukwaꞌ ninzun?”
18ꞋEt ubúlhni, “Nghuz keyoh whuti whuz ꞌahdulh. ꞋIlhoghun dune sba dáhni, ‘Nehodulhꞌeh-un njan ndutni, ꞌawet sba nilhdukw hoozulh. Nyoh tsꞌe ndunne sgha hodulꞌehne njan butus lhuseya-un, ꞌalhgoh bubulh whunatiznih.’” 19ꞋInkꞌez yugha hodulꞌehne Jesus daja ubudaniꞌ, ꞌet whuz unꞌa nduhuja. ꞋInkꞌez butus lhuseya-un ꞌet wheni lhaháduja.
20ꞋAwet hulhgha whusahonzut whe whunizyane ꞌon ꞌat nane yugha hodulꞌehne, bubulh natlꞌa didaꞌ bula naꞌtitꞌulh ha. 21ꞋEt ꞌuhaꞌalh whutoh ꞌet ndúbulhni, “ꞋAlhaꞌ nohdusni njan nohtoh ꞌilhoghun whutlꞌa sutilhtelh.”
22ꞋEt tsꞌiyawh tube ni huzdliꞌ, ꞌinkꞌez ꞌilhone hinli whe huyoodulhkut, “SMoodihti si eh ꞌutisnelh?”
23ꞋEt ꞌúbulhni, “Mbe la dules sulh tunayuzꞌai-un, ꞌen ꞌutinelh whutlꞌa sútilhtelh. 24ꞋAlhaꞌ Yinka Dune Yeꞌ ntsꞌenꞌa la ooba ꞌukꞌehooguz, whuz unꞌa ꞌutinelh datitsah. ꞋEt hoontsꞌi dune mbe la whutlꞌa yálhti-un, ꞌen ꞌukꞌenus hoontsiꞌ-un oogha óotaltsꞌulh. Ndun dune ꞌaw lhuhóolel de, ꞌet de daꞌ ꞌon nus ooba hózooꞌ ooleꞌ.”
25ꞋEt Judas, whutlꞌa itilhtelh-un, Jesus yoodulhkut, “Rabbi si eh sudíni?” ꞋEt ꞌuyulhni, “Nyunchꞌoh dinja.”
Jesus ꞌudekꞌez naꞌutꞌalh-un ꞌuhoonla
26ꞋEt ꞌaꞌalh whe Jesus lhes yilhchoot. Musi ni whe tenadidli. Lhtsꞌe danyuz ꞌinkꞌez yugha hodulꞌehne butlꞌa yánla. ꞋInkꞌez ꞌutni, “Ulhchoot ꞌinkꞌez ꞌahꞌalh. Ndi syustꞌe ꞌuntꞌoh.”
27ꞋEt lubot cha yilhchoot ꞌinkꞌez musi ni whe tenadidli, ꞌinkꞌez ꞌutni, “Nohni tsꞌiyawh ꞌi be ꞌahnai. 28ꞋEt ndi suzkaiꞌ ꞌi be ꞌandidi be nohtsꞌu nahizusya, ꞌet huba ꞌulya. Lhane ba nadútiltꞌih. ꞋI be bulubeshi buba gak tileh. 29Njan ꞌet nohdusni, ndi mai tooꞌ ꞌaw doo cha za oosnaiꞌ ꞌaitꞌoh. Mai tooꞌ ꞌandidi-i, ꞌuBá lerwe unli-un, ꞌet whuz oozahdil-un, ꞌet dzin nohbulh tisnelh.”
30ꞋEt Yakꞌusda ooyun be híjun ꞌinkꞌez ndo shus kꞌus Olive huyulhni, whuz whehandil.
31ꞋEt Jesus ndúbulhni, “ꞋAndit ꞌulhdzis nohni tsꞌiyawh ska yátihleh. Whuz unꞌa ꞌukꞌehooguz whe ndutni,
‘ꞋUsbai ghunli-un, tuzilghelh huba whutlꞌa tístelh.
ꞋOh de ꞌusbai tsꞌiyawh yahitalhꞌus.’
32ꞋEt dunadusja hukwꞌelhꞌaz de, yun kꞌut Galilee tsꞌe nohtso tisyalh.”
33ꞋEt Peter uyúlhni, “Tsꞌiyawh nyun nkayahutileh ꞌet hoontsꞌi si ꞌaw nkayálhtuzisdle.”
34ꞋEt Jesus njan ndúyulhni, “Ꞌalha ꞌi be nyudusni, ꞌandit ꞌulhdzis lugok dune ꞌudutinelh whutso, tat tꞌesunuzínzun dutanelh.”
35ꞋEt Peter ꞌutni, “Nyúlh datisah hoontsꞌi ꞌaw tꞌenyunuzúszun doosniꞌ ꞌaitꞌoh.” ꞋOnghohne yugha hodulꞌehne cha whuz unꞌa za ꞌuhutni.
Jesus Gethsemane ꞌet tenadudli
36ꞋEt whe la ꞌilhoghun ha niyeh kꞌet Gethsemane huwhútni-un tsꞌe hoozdil whe Jesus yugha hodulꞌehne ubúlhni, “Nohni njan dulhtsꞌi. Si nghuz tenadutisdli.” 37Peter ꞌinkꞌez Zebedee buzkeh, nane, ubilhchoot ꞌinkꞌez dulh whebildilh. ꞋEt tsꞌodi cho ookꞌé diltsꞌut ꞌinkꞌez oodzi tube yo ꞌuja. 38ꞋInkꞌez ꞌubulhni, “Szul tube tsꞌodi suliꞌ kꞌet ꞌawet datisah le ꞌustꞌoh. Njan dúlhtsꞌi ꞌinkꞌez sla huwahli.”
39ꞋOn ꞌunyaz le whinya whe ꞌet nachániti ꞌinkꞌez tenawhendunidli ꞌinkꞌez njan ndutni, “ꞋUBá ndi lubot be dzoh nutiszut-i, whuz unꞌa ꞌuntꞌoh de, whute senghóltsꞌit. ꞋEt hoontsꞌi ꞌaw si hukwaꞌ nuszun kꞌunꞌa iloh. Nyun hukwaꞌ ninzun hukwꞌunꞌa ꞌuhóneh.”
40ꞋEt yugha hodulꞌehne nahunistez whe bughu nanja. ꞋEt Peter ndúyulhni, “ꞋAw eh ꞌilhoh sadzi hukwꞌu hunistꞌo whe sulh huwonleꞌ ꞌaitꞌoh? 41Tankꞌus níntꞌi-un whuchꞌa howinli ꞌinkꞌez tenadinli! ꞌalha dune yughi whuz unꞌa hukwaꞌ ninzun, ꞌet hoontsꞌi ooyustꞌe tetsun.”
42ꞋEt doo cha za whulh nat bugho whe naja tenadutidli ha. ꞋEt njan ndutni, “ꞋUBá ndi lubot ꞌaw sghu naóolhchoot ꞌaitꞌoh, ꞌi tsꞌiyawh usnaiꞌ ꞌet de za. Whuz unꞌa za hukwaꞌ ninzun de, ꞌet ndó honeh.”
43ꞋEt doo cha za nahuniztez whe bughu nanja. Bulh buba yilhtus kꞌet ꞌaw hitóꞌen ꞌaitꞌoh. 44ꞋEt whe bugho whe naja ꞌinkꞌez whulh tat-i khuni ꞌi be za tenadidli.
45ꞋEt yugha hodulꞌehne bughu nanja ꞌinkꞌez ꞌubulhni, “ꞋAwhuz nalhyis ꞌinkꞌez sahtez whé eh ꞌahtꞌoh? Soo zulhtsꞌai ꞌawet sba whusahóoltsꞌut. Yinka Dune Yeꞌ ndunne lubeshi ꞌulhꞌenne, butlꞌa hítilhtelh. 46Dunadahdilh! ꞋAwet uztoodilh sih! Nulhꞌen whutlꞌa sútilhtelh-un, ꞌawet senghoh neninya!”
Jesus ꞌawet huyílhchoot
47ꞋAwhuz yalhduk whe khuntsul Judas, whusainya. ꞋEn ndunne whunizyane ꞌon ꞌat nane whelꞌaꞌne, ꞌilhoghun ꞌuntꞌoh. ꞋEn bulh lhane dune yulh whusaindil. Whulohne saluzti nuhúle, ꞌinkꞌez whulohne tutꞌoh nódule. Lubret bumoodihne ꞌinkꞌez dune ꞌutso whudilhdzulhne, whusahábahalhꞌaꞌ. 48ꞋEt ꞌawet Jesus whutlꞌa itilhtelh-un, ꞌilhunaoosdilne ꞌubulhni, “Mbe la nadistsꞌooz-un, ꞌen ꞌuntꞌoh. ꞋAho ólhchoot!” 49ꞋEt ꞌaho Jesus yughu ninya whe “Hadih Rabbi,” yulhni ꞌinkꞌez naiditsꞌooz.
50ꞋEt Jesus ndutni, “Syadan di ha whusainya?” ꞋEt whusahandil Jesus ꞌaho huyilhchoot.
51Khuntsul ꞌilhoghun Jesus yulh ꞌuntꞌoh-un saluzti ha yálhtsus ꞌinkꞌez lubret ꞌukꞌenus diztiꞌ-un be ꞌulhna-un, yudzo yutsꞌa ha béꞌ yalhtꞌo.
52ꞋEt Jesus ndúyulhni, “Nyoo saluzti tꞌunádintꞌaih! ꞋAlhaꞌ mbene la ꞌet dutꞌenne, ꞌenne ꞌet hukwꞌe dahutitsah. 53ꞋEt si hukwaꞌ nuszun de, ꞌuBá ooduskut de ꞌinkꞌez ꞌandit ꞌaho 70,000ne lizas ꞌon ꞌun ꞌultsukne, ꞌenne daꞌ stsꞌotlꞌa boolelh ooleꞌ daꞌ sla hutinelh ha. 54Ntsꞌenꞌa Yakꞌusda ooghuni lhadútineh? Ntsꞌenꞌa la stsꞌun dawhutꞌih-un, ꞌet whuz unꞌa ꞌuhóneh hubaꞌ hoontꞌoh.”
55ꞋEt ꞌawet ꞌoh whuya ꞌuhunitꞌoh whe Jesus ꞌilhunaoosdilne ndúbulhni, “ꞋEt di ha saluzti ꞌinkꞌez tutꞌoh cha nuhle ꞌinkꞌez ꞌundunustꞌih kꞌunꞌa ska tíhdil? Dzin totsuk lugliz whucho nohtoh susda ꞌinkꞌez whunohodusꞌeh. ꞋInkꞌez ꞌaw sulhúlhchulh. 56ꞋEt huwa, nus hooꞌenne bubeꞌ ꞌudustlꞌus ookꞌehooguz-un, ꞌet tsꞌiyawh lhawhúdutanelh.” ꞋEt ꞌawet higha hodulꞌehne, tsꞌiyawh highu whetsélhdil.
Jesus nahiyilhne bubut nenínya
57ꞋEt mbene la Jesus yilhchootne, lubret ꞌukꞌenus diztiꞌ-un, Caiaphas huyulhni, ghu hinílhti. Moses be ꞌudustlꞌus ꞌukꞌu nunáguzne, ꞌinkꞌez dune tso whudilhdzulhne cha, whuz ꞌilhunahosdil. 58Peter ꞌon niz de bubuniyalh whe lubret ꞌukꞌenus diztiꞌ-un ooyoh whunaꞌniztlꞌoo-un whuz bubunéninya. Bughu daninya buba ꞌutꞌenne buzih natlꞌa didaꞌ ꞌinkꞌez naldzilh, ꞌudekꞌez whutsꞌun whuntilhꞌelh hukwa.
59ꞋEt lubret bumoodihne, ꞌinkꞌez ꞌutso whudilhdzulhne, ꞌinkꞌez nahiyilhne cha, tsꞌiyawh hoonli whutsꞌit huwun highu nahóꞌalh hukwaꞌ hutꞌen hituzilhghelh ha. 60ꞋEt hoontsꞌi ꞌaw hiyulh náhoꞌalh-un hooloh. Lhane dune whusahándilh ꞌinkꞌez huwhutsꞌit be highu yalhduk. ꞋEt hoontsꞌi hoonli hiyulh nalhuwhusꞌai. ꞋEt nane dune whutsꞌitne whusainꞌaz 61whe nduhútni, “Ndun dune ꞌutni Yakꞌusda oolugliz whucho hooloh whutilhtselh ꞌinkꞌez tat dzin whutoh ꞌudun naꞌwhutilelh ni,” hutni.
62ꞋEt lubret ꞌukꞌenus diztiꞌ-un daninya ꞌinkꞌez Jesus yoodulhkut, “ꞋAw eh daja lhdutuzanel? Daja hutni-un ꞌet huwun daja ninzun?” 63Jesus ꞌaw tꞌedusnih. ꞋEt lubret ꞌukꞌenus diztiꞌ-un, yulhni, “Mbe la Yakꞌusda khuna-un, ꞌen be nyudusni yatolhdih hubaꞌ hoontꞌoh. ꞋI be mba nahutideh. Nedini Christ Yakꞌusda ooYeꞌ, ꞌen eh ꞌintꞌoh?”
64ꞋEt Jesus ndúyulhni, “Nyunchꞌoh ꞌet ꞌúdini. Njan huwun nohbulh yasduk, kꞌat le de Yinka Dune Yeꞌ, ꞌen ulhtus-un, ꞌen nailhni tsꞌunkꞌus yughu usda, ꞌet whutihꞌelh. ꞋInkꞌez kwꞌus kꞌut ndus de ha tiyalh, ꞌet cha whutihꞌelh.”
65ꞋEt lubret ꞌukꞌenus diztiꞌ-un ye usda-i dubut ka lhtsꞌe yalhchꞌul ꞌinkꞌez ꞌutni, “Yakꞌusda chꞌaz ditni whe yalhduk. ꞋAw ꞌuyoonne nedóniꞌ hukwa lheꞌuznízun. ꞋAndit whunulhꞌen Yakꞌusda chꞌaz ditni-un tsꞌiyawh nohni nohnalh ꞌutni. 66Daja nahzun?” ꞋEt ꞌuhutni, “Daóotsa huba ꞌuntꞌoh!”
67Higha duninzoh. Huyoolhchis ꞌinkꞌez whulohne huyoonukat. 68ꞋEt ꞌuhúyulhni, “Neba nus whutanꞌelh. Christ inli de, mbe nyinla nyunízkuk?” huyúlhni.
Peter ꞌutni, “Jesus ꞌaw tꞌenuzuszun”
69ꞋEt Peter nꞌaz whunaꞌniztlꞌoo-un whez tsꞌe usda whe tsꞌekeyaz yughu ninya. ꞋInkꞌez ꞌúyulhni, “Jesus Galilee whutꞌen-un, nyun cha bulh ꞌintꞌen inleꞌ!”
70ꞋEt tsꞌiyawh bubut whutsꞌoodidlai ꞌinkꞌez ndutni, “Daja dini-un ꞌaw tꞌeoonuzúszun.”
71ꞋInka ꞌaz tenánja. ꞋUyoon tsꞌeke cha yunilhꞌen, ꞌinkꞌez ꞌoh nudilhyanne, ꞌúbulhni, “Ndun ꞌen cha Jesus Nazareth whutꞌen-un bulh ꞌutꞌen inleꞌ.”
72Doo cha za Ndoghi nalh whutsꞌoodísdlat whe ndutni, “Ndun dune ꞌaw tꞌenuzuszun!”
73Hukwꞌelhꞌaz yuzih nudalyaꞌne, highu nindil whe huyúlhni, “ꞋAlhaꞌ mbene la yulh ꞌantꞌeꞌne, nyun cha ꞌilhoghun ꞌintꞌoh. Ntsꞌenꞌa yailhduk-un, ꞌet huwa tꞌetsꞌunyunínzun.”
74Peter ꞌet ndutni, “Yakꞌusda stsꞌeꞌ tilhtsus ꞌaw tsꞌihꞌun lheꞌduzusnih de, ndun dune ꞌudáhni-un, ꞌaw tꞌenuzuszun.” ꞋEt ꞌaho lugok dune ꞌudíja.
75ꞋEt Jesus daja ni la Peter whunalni whe yudaniꞌ, “Lugok dune ꞌudutinelh whutso, tat ꞌaw tꞌesunuzinzun dutanelh.” ꞋEt ꞌaz whe naja ꞌinkꞌez tube cho howintse.
Currently Selected:
Matthew 26: crx
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
