John 19
19
Pilate Sizi tulalhgus unduntáltꞌoh-un whutsꞌu beꞌ neninya
1ꞌEt hukwꞌelhꞌaz Pilate Sizi huyolhtsas-un huwá balhꞌaꞌ, 2ꞌinkꞌez lhuganne whus cho ꞌawh nahinilhjaz-i, ꞌi hitsi nehídanꞌai, ꞌinkꞌez luglok dulkꞌun-i, ꞌi hitꞌuhúyulhbal, 3ꞌinkꞌez ꞌuhuyulhni, “Lizwif bulerwe-un saꞌ cho honaꞌ.” ꞌInkꞌez hinin tsꞌe huyoonukat.
4ꞌEt doo cha za Pilate ꞌaz butsꞌú tenanja ꞌinkꞌez ꞌubulhni, “Nulhꞌen, ndun ꞌaw whe nínta ꞌuntꞌen-un ooghu nahósꞌalh ꞌaítꞌoh, ꞌinka nohtsꞌú tenanusti.” 5ꞌEt Sizi whus cho ootsi nedinꞌai ꞌinkꞌez luglok dulkꞌun-i naitsꞌuz whe tenánja Pilate yunilhꞌen ꞌet ubúlhni, “Nulhꞌen, ndun dune!”
6Lubret bumoodihne ꞌinkꞌez neilhchúkne te, hitilhꞌen ibulh, soo tube cho sulya hulhduk ꞌinkꞌez, “Tulalhgus ꞌundunulhtꞌah! Tulalhgus ꞌundunulhtꞌah!” hutni. ꞌEt Pilate ubúlhni, “Nohnichꞌoh ulhchoot ꞌinkꞌez tulalhgus ꞌundunulhtꞌah! Si ꞌaw whe nínta ꞌuntꞌen-un ooghu nalhuwhúsꞌal ꞌaítꞌoh ꞌet huwa!”
7ꞌEt Lizwifne ꞌuhuyúlhni, “Wheni khuni neba ootulhúhisdeꞌ-i tsꞌutꞌi, ꞌi kꞌut ꞌutni, daóotsa huba ꞌuhoontꞌoh. Lheꞌutni Yakꞌusda ooYeꞌ ꞌududulhtsi ꞌet huwa.”
8ꞌEt Pilate whudántsꞌo whe tube ꞌon nus nílhjoot. 9ꞌInkꞌez doo cha za duyoh tsꞌe danánja ꞌinkꞌez Sizi yoodulhkut, “Ntsꞌez de haínya whe ꞌintꞌoh?” yúlhni. ꞌEt Sizi ꞌaw yulh yálhtilhdih. 10ꞌEt huwa Pilate uyúlhni, “ꞌAw eh sulh yaóolhduk ꞌaítꞌoh? ꞌAw eh tꞌéwhunuzínzun tulalhgus nyundunóstꞌa-un sghá whuntꞌai kꞌus nla nadutistníh-un cha sghá whuntꞌai?”
11ꞌEt Sizi uyúlhni, “ꞌAw ndus de yakꞌuz whutsꞌun ngha lhúhootꞌal de, ꞌaw sando ꞌontꞌeꞌ ꞌaítꞌoh. ꞌEt huwa mbe la ntlꞌa sálhti-un, ꞌen oolubeshi nyun nlubeshi anus ꞌulcho.”
12Pilate whudántsꞌo whe Sizi whe yúla nadootnih-un, ꞌet nahóꞌalh hukwa ꞌitꞌen. ꞌEt Lizwifne sulya hulhduk ꞌinkꞌez huyúlhni, “Ndun dune oola nadantni de, ꞌaw lerwe Caesar ooyadan iloh ꞌintꞌoh! Mbe la lerwe naꞌdudilꞌí-un, ꞌen lerwe Caesar yuchꞌaz ditni-un ꞌuntꞌoh!”
13Pilate whuduztsꞌai whe kwꞌutsꞌuzda yukꞌusda whe dune ba nahiyilh-i, ꞌi kꞌe nátlꞌa didaꞌ. ꞌEt Sizi dubut nehéyolhtelh ndet la Hebrew kꞌunꞌa Gabbatha huwhútni, ꞌi khuni ꞌutni tse ookꞌut hoodzo-i ni whe ꞌutni. ꞌI kꞌut kwꞌutsꞌuzda yulhꞌai dune ba nahiyilh wheni. 14Ndi dzin Butus Lhuséya-un, ꞌet dzin wheni lhahúdutneh-un, 6:00 atꞌen ꞌuhúnitꞌoh, ꞌet Pilate Lizwifne ubúlhni, “Ndun nohlerwe nulhꞌen!”
15ꞌEt hoontsꞌi sulya hulhduk ꞌinkꞌez ꞌuhutni, “Nꞌawh bulh ꞌudini! Tulalhgus undunilhtꞌah!” ꞌEt Pilate ubúlhni, “Nohlerwe ꞌen eh tulalhgus kꞌe ítastelh?” ꞌEt lubret bumoodihne ꞌuhutni, “Lerwe Caesar ꞌaw ꞌen za nelerwe, ꞌaw ꞌuyoon nelerwe hooloh!”
Sizi tulalhgus kꞌe híyilhti
16ꞌEt ꞌawet Pilate Sizi tulalhgus kꞌe húyolhtelh wheni butlꞌa yálhti. Huyílhchoot ꞌinkꞌez ꞌon ꞌun whenáhuyalhti.
17ꞌInkꞌez dutulalhgus yuditelh whe ꞌUtsin Tsꞌun huwhútni, whuz oozya. ꞌEt Hebrew kꞌunꞌa Golgotha huwhútni. 18Whuz tulalhgus kꞌe híyilhti. ꞌUyoonne nane cha huyúlh ꞌubihinla. ꞌIlhoghun ꞌíntlꞌus tsꞌe, ꞌet ꞌilhoghun cha ooghu naílhni tsꞌe, ꞌet Sizi ꞌen buniz ꞌuhuyínla.
19ꞌEt Pilate yukꞌúneꞌ uzguz-i, ꞌi butlꞌa yánꞌai tulalhgus huyundunólhtꞌa ha. ꞌI kꞌut ꞌutni:
SIZI NAZARETH WHUTꞌEN, LIZWIFNE BULERWE ꞌUNTꞌOH
20Tube keyoh whenghoh ꞌuhuyinla whe tulalhgus kꞌe húyilhti ꞌet huwa, tube lhane Lizwifne ndi Pilate yukꞌúneꞌ úzguz-i hikꞌu yailhduk. ꞌInkꞌez ndi khuni tawh didowhne bukꞌunꞌa ꞌukꞌu nusguz. Hebrew kꞌunꞌa cha, Greek kꞌunꞌa cha, ꞌinkꞌez Latin kꞌunꞌa cha. 21ꞌEt huwa Lizwif lubret bumoodihne Pilate huyúlhni, “ꞌAw ndun Lizwifne bulerwe ꞌuntꞌoh dini whe iloh ꞌukꞌeꞌinges. ꞌAntsꞌi njan ndutni dini, si Lizwifne bulerwe ꞌustꞌoh.”
22ꞌEt Pilate ubúlhni, “Ndai la ꞌukꞌú nusúsguz-i, ꞌi ntsꞌenꞌa ꞌusdla, ꞌet whuz unꞌa ootꞌeꞌ ha ꞌusdla.”
23ꞌEt ndunne lhuganne Sizi tulalhgus ꞌuhídunilhtꞌo hukwꞌelhꞌaz, hinaih huyílhchoot ꞌinkꞌez dunghi huyulhtsi whe ꞌilhoghun hinli whe lhtahúyulya. ꞌEt ndi ꞌude kꞌut ye usdá-i, ꞌi ꞌaw lhunduníkai iloh whe ꞌilho za unli whe ꞌulya-i.
24ꞌI ghun didutchꞌoh ꞌulhodutni, “Ndi ꞌi ꞌaw yanúlhtsꞌudoolhchꞌul. ꞌAntsꞌi ooghu ꞌá tsꞌoolꞌih, mbe suba ootsꞌítooneh.” ꞌEt nduhútni whe Yakꞌusda ooghuni soo ookꞌoh te néꞌhootꞌen ꞌinka ꞌuhutni. Ndi khuni ꞌi ndutni inleꞌ,
“Snaih-i, ꞌi tsꞌiyawh lhtahúyulya.
ꞌUde kꞌut be susda-i, ꞌi higha ꞌaínlih.”
ꞌEt soo ꞌoh te lhuganne néꞌhustꞌen.
25ꞌEt Sizi ootulalhgus soo be nghoh ꞌet ooloo usyin. Ooloo bulhtus cha, ꞌinkꞌez Mary Clopas ooꞌat cha, ꞌinkꞌez Mary Magdala whutꞌen cha. 26Sizi duloo yunilhꞌen ꞌinkꞌez ꞌilhoghun yugha hodulꞌeh, soo ꞌukꞌenus yukꞌe ntsiꞌ-un, ꞌen cha ye nghoh usyin. ꞌEt Sizi duloo ꞌuyulhni, “Tsꞌeke, ndun nyeꞌ nilhꞌen.” 27ꞌEt ndun yugha hodulꞌeh-un, ꞌen cha yunilhꞌen whe uyúlhni, “Ndun nloo nilhꞌen.” Soo ꞌet whutsꞌun ndun yugha hodulꞌeh-un Sizi ooloo duyoh daínilhti.
Tulalhgus kꞌut Sizi ye khúna-i yula ditni
28Njan ꞌoh te neꞌwhustꞌen hukwꞌelhꞌaz Sizi tꞌéwhunínzun tsꞌiyantsuk lhaóoduja. ꞌEt didut ooghun Yakꞌusda ooghuni ꞌukꞌu nusgúz-i daja ni la, ꞌet ndúhoneh ꞌet huwa, “Taꞌóosda,” ni. 29ꞌEt nyo ꞌoosaꞌyaz tsꞌekoo tooꞌ tsꞌulkiꞌ-i ꞌet ꞌusꞌai. ꞌEt nyoo ootaꞌniltsít-i tsꞌekoo tooꞌ huyé tunahuyuzꞌai ꞌinkꞌez duchun hyssop huyúlhni, ꞌi la hídalhꞌooꞌ, ꞌinkꞌez hize tsꞌe dubeꞌ hidunintan. 30ꞌEt nyoo tsꞌekoo tooꞌ tsꞌulkiꞌ-i yunawhúzdlih ꞌinkꞌez ꞌutni, “ꞌAwet tsꞌiyantsuk lhawhúduja.” Yo nenintꞌai ꞌinkꞌez ye khúna-i yula ditni.
31ꞌEt dzin ꞌet la nahulyís-un dzin huba lhahúdutneh, ꞌinkꞌez nyo natsꞌulyís-un dzin whudíztiꞌ whe ꞌuhoontꞌoh. Lizwifne ꞌet dzin nezi ꞌaw tulalhgus kꞌut oolaꞌ hukwa lheꞌhunízun, ꞌinka Pilate huyoodulhkut bukechun kꞌunuhúyooyuz#19:31 ꞌA cho dahóotsah ha. ꞌinkꞌez buzi nanáhuyoolelh ꞌet hukwa. 32Lhuganne whuz hoozdil whe soo ꞌudechoo ndunne nane Sizi hiyulh tulalhgus kꞌut sulhtíne, ꞌenne cho bukechun kꞌunuhúzyuz. 33ꞌEt Sizi highu nindil whe ꞌudaꞌ dazsai hinilhꞌen, ꞌinka ꞌaw hikechun kꞌunulhúhiyus. 34ꞌEt hoontsꞌi ꞌilhoghun lhugan-un sohtuz be yuzih kꞌut ꞌet yúzgwut. ꞌAho ꞌuskaiꞌ ꞌinkꞌez tooyaz bulh, ꞌi ootsꞌu ha yíjul. 35ꞌEt ndun mbe la howu yalhduk-un, soo ꞌalhaꞌ whunalhꞌen whe ꞌutni. ꞌInkꞌez daja ni la soo didutchꞌoh tꞌéwhunínzun whe ꞌutni. ꞌEt huwa la nohba ꞌalhaꞌ ꞌuhotꞌeꞌ. 36ꞌEt whuz unꞌa ꞌoh te neꞌwhustꞌen. ꞌEt huwa ndai la Yakꞌusda ooghuni ꞌukꞌu nusguz-i, ꞌi kꞌunꞌa lhawhúduja whe ndutni, “ꞌAw ꞌilho ootsꞌun ꞌi hoontsꞌi kꞌulhítih,” ni. 37ꞌEt Yakꞌusda be ꞌudustlꞌus ꞌukꞌu nusgúz-i, ꞌi kꞌut ꞌudun ꞌet cha ꞌutni, “Mbe la huyúzgwut-un, hinoolhꞌen la,” ni.
Sizi ꞌahúyalhti
38ꞌAwet ꞌoh te neꞌwhustꞌen hukwꞌelhꞌaz ꞌet Joseph, Arimathea whutꞌen-un, Pilate yughu ninya ꞌinkꞌez Sizi oozi yólhchoot hukwa yoodulhkut. ꞌEt Joseph ꞌen cha Sizi yugha hodulꞌeh-un unli, ꞌet hoontsꞌi Lizwifne bube nuljut ꞌinka whuꞌiz Pilate yugha óoninꞌai Sizi oozi nayólhchoot ꞌinkꞌez whusainya ꞌinkꞌez oozi yílhchoot. 39ꞌEt Nicodemus, ꞌen cha yulh whúsainꞌaz. ꞌEn ꞌuja ínleꞌ soo ꞌudechoo Sizi wheꞌ ditꞌen whe ꞌilho ꞌulhdzis yughu ninya.#19:39 Tat yus kꞌut atꞌen ínleꞌ, ꞌet huwu yalhduk whe ꞌutni. Yoo sooltsun-i, myrrh ꞌinkꞌez aloes bulh lhtadilyá-i whe 100 pounds atꞌen ꞌuldaz, ꞌi whusayánꞌai. 40ꞌEt Sizi oozi huyílhchoot ꞌinkꞌez Lizwifne bube ꞌutꞌen kꞌoh hukwꞌunꞌa, naih diztiꞌ ꞌulhyúl-i huyílhchoot ꞌinkꞌez yoo sooltsun-i lhtahidínla-i hikꞌú nuhúyuzdzai, ꞌinkꞌez Sizi oozi higha húyozduz ꞌahitílhtelh wheni. 41ꞌEt nyo ndet daꞌ tulalhgus ꞌahidunilhtꞌó-un, ꞌet whenghoh haꞌ nuyeh kꞌet whuzꞌai. ꞌEt ꞌawhundidí-un tse be tsa kꞌet ꞌaw whutsodaꞌ dune ꞌalhuhulhtí-un whuzꞌai. 42ꞌEt tube nilhdukw ꞌinka Sizi oozi ꞌet ꞌuháyalhti, Lizwifne ꞌet dzin lhahúdutneh-un ꞌuhoontꞌoh ꞌet huwa.
Currently Selected:
John 19: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.