John 11
11
Lazarus dazsai whe Sizi nahuyílhnaꞌ
1ꞌIlhoghun dune Lazarus huyúlhni, keyoh whuyaz Bethany huwhútni, ꞌet whutꞌen-un. ꞌEn la unduda suliꞌ. Bulhtuske nane Mary ꞌinkꞌez Martha bulh hizih whutꞌi. 2Ndun Mary ꞌen ꞌuja ínleꞌ neMoodihti khe sooltsun-i be yuke tunásuguz ꞌinkꞌez dutsighaꞌ be yunaꞌalhde ínleꞌ. ꞌEn bulhutsin Lazarus ꞌen unduda. 3Bulhtuske Sizi khuni hitsꞌó tlꞌa danꞌai, “NeMoodihti dune ookꞌe nsíꞌ-un, ꞌen unduda,” huyúlhni.
4ꞌEt Sizi whulh ꞌúdantsꞌo whe ꞌutni, “ꞌAw ndi dada ꞌilhiz yukꞌe dóotsa ꞌaítꞌoh. Njan undudá-un, ꞌet whe la Yakꞌusda ooba whudóltiꞌ, ꞌinkꞌez ꞌet whe Yakꞌusda ooYeꞌ ꞌen cha ba whudutáltiꞌ.” 5-6ꞌEt Lazarus unduda-un Sizi whulh ꞌúdantsꞌo whe Martha, bulhtus cha, ꞌinkꞌez Lazarus cha tube bukꞌentsiꞌ ꞌet hoontsꞌi whutꞌí-un nat dzin, ꞌet nanáꞌilꞌai.
7Nat dzin ꞌet nadaꞌ ꞌet yugha hodulꞌehne ubúlhni, “Doo cha za Judea tsꞌe naztoodilh.”
8ꞌEt yugha hodulꞌehne ꞌuhuyúlhni, “Rabbi, ꞌandit ꞌaho Lizwifne tse be nyotúzilhghelh hukwaꞌ huninzun ꞌinkꞌez cha za whuz natandalh eh?”
9ꞌEt Sizi ꞌubulhni, “ꞌEt whunizyat ꞌon ꞌat nat neꞌhunutꞌoh-un sadzi gha ꞌet ꞌilhudzin ꞌuhoontꞌoh. Mbene la dzenis nudilhne, ꞌaw khun tooghalh ꞌaítꞌoh. Ndi yun kꞌut be hóotꞌen-i, ꞌi be huhooꞌen ꞌet huwa. 10ꞌEt hoontsꞌi mbene la ꞌulhdzis nudilhne, nónughalh, ꞌaw be hóotꞌen-i bubulh lhéꞌitꞌoh ꞌet huwa.”
11ꞌEt ndúbulhni hukwꞌelhꞌaz ꞌet ꞌutni, “Neyadan Lazarus nanisti ꞌet hoontsꞌi ootsꞌun tísyalh ꞌinkꞌez tsꞌenatisdzulh.”
12ꞌEt yugha hodulꞌehne ꞌuhuyulhni, “NeMoodihti Lazarus nanisti de, ꞌet de soo naꞌtitnelh whe ꞌuntꞌoh.” 13ꞌEt Sizi njan dazsaí-un, ꞌet howu yalhduk whe ꞌutni, yugha hodulꞌehne, ꞌenne ꞌantsꞌi nanisti ꞌinkꞌez nalyis ꞌet howu yalhduk whe ꞌutni huninzun.
14ꞌEt Sizi soo tsꞌet gaih ꞌubulhni, “Lazarus dazsai. 15ꞌEt nohni nohba hoonústꞌiꞌ ꞌaw ꞌet lhúsdoh whe ꞌuja. ꞌEt de la nohba ꞌalhaꞌ hotꞌeꞌ. ꞌEt hoontsꞌi ꞌandit ꞌawet ootsꞌuztoodilh.”
16ꞌEt Thomas, ꞌen ꞌutꞌudándaꞌ-un huyúlhni, dudulh yugha hodulꞌehne ubúlhni, “Dugweꞌ! Bulh ꞌúztoodilh! Wheni cha si bulh yatsꞌodlah!”
17Sizi whuz oozya ꞌet nahoonꞌai Lazarus ꞌahuyalhti whutsꞌun dit dzin inleꞌ. 18Njan keyoh wheyaz Bethany ꞌet Jerusalem tube whenghoh whuzꞌai. Tsꞌiyalh whe ꞌilhoh sadzi hukwꞌeꞌ hoonitꞌoh atꞌen ꞌuwhulhdzoh ꞌuhoontꞌoh. 19Tube bube nghoh whuzꞌai ꞌet huwa lhane Lizwifne bughu nindil. Mary ꞌinkꞌez Martha bulh bubulhutsin dazsai ꞌet whe bunehúdoolhyaꞌ ha ꞌet huwa bugho nindil. 20ꞌEt Sizi whuz de úyalh Martha whulh ꞌúdantsꞌo whe yududizya. Mary ꞌen yoh ꞌawet usda.
21ꞌEt Martha Sizi ꞌuyulhni, “SMoodihti, njan sinda inleꞌ de, ꞌaw daꞌ sulhutsin dalhitsa ooleꞌ daꞌ. 22ꞌEt hoontsꞌi, ꞌandit hoontsꞌi, ndai la Yakꞌusda ootsꞌo kwaꞌ dini-i ngha ítaꞌalh, ꞌet tꞌéwhunúszun.”
23ꞌEt Sizi ꞌuyulhni, “Nyulhutsin dunadójaꞌ la.”
24ꞌEt Martha ꞌuyulhni, “Tꞌéwhunúszun ꞌudekꞌez dzin de, tsꞌiyanne dunádutádulh, ꞌet de la ꞌen cha dunadójaꞌ.”
25ꞌEt Sizi ꞌuyulhni, “Si ꞌustꞌoh dunene tsꞌiyanne dunabudusdle-un ꞌinkꞌez ꞌilhiz wheni huye khóonaꞌ-i bugha yúsꞌaih. Tsꞌiyanne mbene la ooba ꞌalhaꞌ ꞌustꞌohne, dahúzsai ꞌet hoontsꞌi hukhutinalh. 26ꞌInkꞌez mbene la ꞌawhuz khunane ꞌinkꞌez ooba ꞌalhaꞌ ꞌustꞌohne, ꞌaw dahóotsah ꞌaítꞌoh. ꞌEt mba ꞌalhaꞌ ꞌuhoontꞌóh eh?”
27ꞌEt Martha ꞌuyulhni, “A sMoodihti, sba ꞌalha ꞌuhoontꞌoh nyun Yakꞌusda ooYeꞌ, Gri, mbe la ndi yun kꞌe itayalh-un, ꞌen ꞌintꞌoh.”
28Njan ꞌet ndudániꞌ hukwꞌelhꞌaz ꞌet dulhtus Mary yughu nanja ꞌinkꞌez wheꞌ ízyaz yúlhni, “Whuneodulhꞌeh-un whusaínya ꞌinkꞌez nka oodulhkut.” 29Soo whudántsꞌo ibulh dudinya ꞌinkꞌez yutsꞌóozya. 30Sizi ꞌawhuz keyoh wheyaz whutsꞌun úyalh whe, ndet daꞌ Martha yududizyá-un, ꞌet za ꞌutꞌen. 31ꞌEt ndunne Lizwifne, yoh bez tsꞌe hizih dilhtsꞌi, hinedílhyai wheni, Mary soo ꞌa cho dudinya ꞌinkꞌez ꞌaz whinya, hinilhꞌen ꞌet huyuntizdil ꞌinkꞌez ꞌulhodútni, “Tsꞌun kꞌut tsꞌe titso wheni whuz tizya whe ꞌutꞌen.”
32Sizi ndet daꞌ ꞌutꞌen Mary whuz oozya. Soo yutilhꞌen ibulh yubut dugwutsi be nenínya ꞌinkꞌez ꞌuyulhni, “SMoodihti, njan ꞌintꞌoh de, ꞌaw daꞌ sulhutsin dalhitsal ooleꞌ daꞌ.”
33ꞌEt Sizi yunilhꞌen ꞌutso, ꞌinkꞌez Lizwifne mbene la yulh nudilhne, ꞌenne cha hutso hubunilhꞌen whe, tube whutsꞌu disnih ꞌinkꞌez ooyughi whe ooba dzoh ꞌuhooja, 34ꞌinkꞌez uboodulhkut, “Ntsꞌe ꞌalhti?” ꞌEt ꞌuhuyúlhni, “ꞌAnih, nenaoodulh whunolhꞌen si!”
35ꞌEt Sizi intse.
36Lizwifne ꞌet ꞌulhodútni, “Nulhꞌen dalcho-i be yukꞌentsiꞌ!”
37ꞌInkꞌez whulohne ꞌuhutni, “Hoos̱ꞌen-un hooꞌen nayulhtsi ínleꞌ, ꞌaw eh ndun dune ꞌen cha datítsah whuchꞌa ꞌuyooleh ꞌaítꞌoh inleꞌ?”
38ꞌEt Sizi doo cha za dudzi yo whe ooba dzoh ꞌuhooja, ꞌinkꞌez ni suliꞌ whe tsꞌun kꞌuz oozya. Njan tsꞌun kꞌut ꞌet ꞌan tse whudádinꞌai-un ꞌuhoontꞌoh. 39ꞌEt Sizi ubúlhni, “Nyoo tse ꞌudun dutahꞌaih!” ꞌEt Martha dune dazsaí-un bulhtus, ꞌen ꞌutni, “SMoodihti, ndun ꞌawet dit dzin ꞌadalhteꞌ ꞌinkꞌez lhtsun cha suliꞌ.”
40ꞌEt Sizi ꞌuyulhni, “ꞌAw lakw lhunyudúsnel inleꞌ, si sghun mba ꞌalha ꞌuhoontꞌoh de, ꞌet de Yakꞌusda yé diztiꞌ-i tanꞌelh?”
41ꞌEt nyo tsꞌun kꞌut dune ꞌadilhtí-un, tse ꞌudun hidutizꞌai. ꞌEt Sizi ndo yútanꞌen ꞌinkꞌez ꞌutni, “SBá sudántsꞌo ꞌinka musi nyudúsni. 42ꞌInkꞌez tꞌéwhunúszun ꞌahoolhyiz wheni soo zílhtsꞌai. ꞌEt hoontsꞌi njan ꞌudusní-un ndunne ꞌilhozdílne njan nodilhya, ꞌet de la nyun whuz de sútilhꞌaꞌ-un buba ꞌalhaꞌ ꞌuhotꞌeꞌ.”
43ꞌEt ndúdija hukwꞌelhꞌaz soo khuniti be yatilhduk, “Lazarus, ndiz ínyalh!” yúlhni. 44ꞌEt nyoon dune dazsaí-un tsa kꞌez tsꞌe ha nája. Oola ꞌinkꞌez ooke te ꞌawhuz naih huyulh ꞌábulhtih-i, ꞌi be oogha ósduz, ꞌinkꞌez dzezoh cha oonin ꞌawhuz oogha yóonasduz. “Ookꞌu naꞌuhꞌuk ꞌinkꞌez oola duhtnih!” ubúlhni Sizi.
45Ndunne Lizwifne, Mary yughu nindil inleꞌne, Sizi bunalh ꞌuja ꞌet buba ꞌalhaꞌ yintꞌoh suliꞌ. 46ꞌEt hoontsꞌi whulohne, ꞌenne Phariseene butsꞌun nahoosdil ꞌinkꞌez Sizi ntsꞌoh te neꞌustꞌen-un, ꞌet buba hudaniꞌ. 47ꞌEt hukwa lubret bumoodihne ꞌinkꞌez Phariseene yahútilhduk wheni ꞌilhúnahosdil ꞌinkꞌez ꞌuhutni, “Ntsꞌenꞌa dáztinelh? Ndun dune stabe lhat-un hooncha te neꞌútꞌen!
48Whute ꞌutꞌen tsꞌilhꞌi de, tsꞌiyanne la buba ꞌalhaꞌ ootꞌeꞌ ꞌinkꞌez Romanne whusahándil whe la nelugliz whucho ꞌinkꞌez neyun kꞌut cha negha ha hólhchoot, ꞌinkꞌez la tsꞌiyawh yatsꞌódilh.”
49ꞌEt ꞌilhoghun butoh Caiaphas huyulhni, ꞌen la ꞌet naooduzuk wheni lubret ꞌukꞌenus díztiꞌ-un unli ínleꞌ, ꞌen ubúlhni, “ꞌAw hoonli tꞌéwhunuzúhzun! 50ꞌAw eh huwun nuní lhnuzulhzut, tsꞌiyanne ba ꞌilhoghun dune za dazsai de, ꞌet de ꞌon nus sooꞌ whutatꞌelh, ꞌet huwa la ꞌaw neyun kꞌut gak holeꞌ ꞌaítꞌoh.”
51Caiaphas didutchꞌoh iloh ndi khuni yaka ni ntizut, ꞌet lubret ꞌukꞌenus díztiꞌ-un unli, ꞌet naooduzuk huba, ꞌet huwa nus hónꞌen Sizi ꞌen tsꞌiyanne Lizwifne ꞌet yun kꞌut whutꞌenne ba datítsah. 52ꞌEt ꞌaw Lizwif didowhne, ꞌenne ba za iloh. Mbene la Yakꞌusda buzkeh unlíne, ntsꞌe la yahandil, ꞌoh whutꞌenne, ꞌenne buba cha. ꞌEt huwa la tsꞌiyawh ꞌilhunabootalelh ꞌinkꞌez ꞌilhoh whutꞌenne dune hutileh. 53Soo ꞌet dzin whutsꞌun la lhahóduleh hituzilhghelh wheni.
54ꞌEt whula gha tsꞌe Sizi ꞌaw tsꞌet Lizwifne butoh nulhúsyoh. Kꞌus yun kꞌut ꞌaw dune lhuhóotꞌih-un tsꞌe whuzih whuzꞌai, ꞌilhoghun keyoh Ephraim huwhútni, whuz whinya ꞌinkꞌez yugha hodulꞌehne tubulh ꞌet hudáltsꞌiꞌ.
55ꞌEt Lizwifne budzenis whuti ndet daꞌ Butus Lhuseya huwhútni-un, ꞌawet whenghoh whudizulh. ꞌInka lhane yun kꞌut whutꞌenne Lizwifne bubunaꞌudoh hukwꞌunꞌa ꞌuhutinelh wheni keyoh whuti Jerusalem tsꞌe hoozdil. 56Lugliz whucho nódilhya ꞌinkꞌez Sizi hika itísꞌen, ꞌet ꞌulhodútni, “Daja nahzun? ꞌAw tilah dzenis whuti wheni whusalhóosyaꞌ nahzun eh?” 57ꞌEt lubret bumoodihne ꞌinkꞌez Phariseene te, ꞌudaꞌ dunene toh khuni butlꞌa ídanꞌai Sizi ntsꞌe ꞌutꞌen tꞌéhonínzun de, ꞌaho hudooniꞌ, ꞌet de ꞌawet huyitálhchulh.
Currently Selected:
John 11: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.