2 Peter 1
1
Yakꞌusda soo hoolhtus whe yulh suyinne, Peter hadih ꞌubulhni
1Si Simon Peter Sizi Gri ꞌen beꞌ ꞌulhna-un ꞌinkꞌez whelꞌaꞌ-un cha usdli. NeYakꞌusda neulhyis-un Sizi Gri, ꞌen ye tsꞌihꞌun unꞌa ꞌuntꞌoh-i, ꞌi be njan be ꞌalha ꞌuhoontꞌoh-i díztiꞌ-i, nohni cha ꞌinkꞌez wheni cha ꞌalhgoh neghaltsꞌut. ꞌEt huwun nohtsꞌo kꞌeꞌ usges.
2Yakꞌusda ꞌinkꞌez Sizi neMoodihti, soo tsꞌihꞌun unꞌa ꞌen ooghun tꞌetsꞌoninzun-un, ꞌet ꞌi be Yakꞌusda ye unzoo-i ꞌinkꞌez ye tsꞌihꞌun ꞌuntꞌoh-i, ꞌi lhanꞌun te oohtꞌeꞌ.
3Yakꞌusda ba ndi yun kꞌut uzdoltsꞌiꞌ ha, Yakꞌusda dichꞌoh whéulhtus-un, ꞌi be nduwhulcho negha óoninꞌai. ꞌEn ndet ooghun tꞌetsꞌoninzun ꞌi gha, neghá whultsꞌut. Yakꞌusda ye diztiꞌ-i ꞌinkꞌez ꞌaw hoonliyaz whanus hoonzoo-un hooloh, ꞌet whe ꞌuzdutijih huwa nekaꞌ daniꞌ. 4ꞌEt ꞌi be njan khuni kꞌus hooncha-un ꞌinkꞌez khuni diztiꞌ-un, ꞌet whulh netsꞌu náhizya. Njan ꞌet huwa Yakꞌusda dantꞌoh, ꞌet nohni cha whuz unꞌa za ookꞌunꞌa óohtꞌeꞌ. ꞌEt whe ndai ndi yun kꞌut ntsiꞌ-i netilhtselh-i, ꞌet ndi yun kꞌut whutꞌenne ꞌet za whutsꞌó nintꞌi, ꞌet nohni ꞌudaꞌ tsꞌiyawh oochꞌa nasahdil.
Sizi Gri ꞌen ooghun tꞌeoonihzin-un, ꞌi be la ꞌon nus soo nóohyeh
5Njan ꞌet huwa, ꞌet ꞌudaꞌ Yakꞌusda nohba ꞌalhaꞌ ꞌuntꞌoh, nohdzi ndulcho-i be ndiz whuz unꞌa cha oohtꞌeꞌ. Tsꞌihꞌun unꞌa dune unzoone oolhleꞌ, ꞌinkꞌez ꞌon nus cha Yakꞌusda tꞌenoohzeh. 6Hoontsiꞌ-un whuchꞌa khohdleꞌ, ꞌinkꞌez howa whulnaꞌ hoontsꞌi whulh oohyin. ꞌAhoolhyiz Yakꞌusda ooghu nuní noohzut, ꞌinkꞌez ooba whudólhtiꞌ. 7Yakꞌusda ooba ꞌalhaꞌ yintꞌohne bukꞌeoohtsiꞌ, ꞌi cha, ꞌinkꞌez be lhkꞌe tsꞌutsiꞌ-i, ꞌi be lhkꞌe oohsiꞌ. 8Ndowhi tsꞌiyawh be ndahtꞌen de, ꞌinkꞌez ꞌi be ꞌon nus ulhtus lheh de, ꞌet sih ndi neMoodihti Sizi Gri ꞌen ooghun tꞌeoonihzin-un, ꞌi be ꞌon nus soo nóohyeh, ꞌinkꞌez nohꞌeꞌutꞌen soo tsꞌihꞌun unꞌa ootꞌeꞌ. 9Mbe ndowhi lhuyitꞌiꞌne nilhdukwyaz za kꞌet ꞌaw lhuhoos̱ꞌen. Ndi njan dulhúhustꞌen de, ꞌenne nilhdukwyaz za húhooꞌen leꞌ hintꞌoh. ꞌInkꞌez niz dakꞌez bulubeshi ꞌuhuyalhꞌen-i, ꞌudaꞌ Yakꞌusda tsꞌiyawh bubunayalhde inleꞌ, ꞌet whunahodilhnoh.
10ꞌInka sulhutsinke nohdzi ndulcho-i be ꞌinkꞌez ꞌon ꞌun cha, ꞌet ntsꞌenꞌa la dutihjih ha nohkaꞌ daniꞌ, ꞌinkꞌez ꞌutahalyane ꞌahli soo tsꞌihꞌun unꞌa njan ꞌet whunaoodoolhnoh junih. ꞌEt ndi tsꞌiyawh ꞌi be whuz unꞌa ndahtꞌen de, ꞌet de ꞌaw ntoohghalh aitꞌoh. 11Ndiz unꞌa neMoodihti ꞌinkꞌez neulhyis-un Sizi Gri, ntsꞌe ꞌilhiz wheni lerwe unli-un, ꞌet hoonzoo whe nohba dáhaꞌ dutikwus.
Peter ꞌawet datítsah-un
12ꞌEt huwa njan tsꞌiyawh tꞌeoonáhzun ꞌinkꞌez khuni ꞌalhaꞌ ꞌuntꞌoh-i, ꞌi cha úlhchoot whe soo cho oohtun. ꞌEt hoontsꞌi nohdásniꞌ-un ꞌahoolhyiz lhkꞌuz te nohnalhtsꞌet ha náwhusꞌaih. 13ꞌEt tꞌeoonúszun ꞌawhuz tsꞌihꞌun ꞌuhoontꞌoh khusna ꞌet whutsꞌun, nohdásniꞌ-un nohba whunaznih ꞌinkꞌez nohnalhtsꞌet nunáwhusꞌaih. ꞌI be la hoohnih oohleꞌ. 14Tꞌeoonúszun ꞌawet nilhdukw whe datítsah. Ntsꞌenꞌa datísah-un, ꞌet neMoodihti Sizi Gri whusunilhtan. 15ꞌInka ꞌon ꞌun oosneh aitꞌoh-un ꞌet hukwa ꞌustꞌen, ꞌet dustꞌen-un ꞌet huwa dasúsai hukwꞌelhꞌaz njan hodilhꞌeꞌ-un tsꞌiyawh la whunaoolhnih.
Yakꞌusda oochꞌeꞌne, ꞌenne ntsꞌenꞌa Ndoni hubunulhtun yahutilhduk-un, ꞌet whuz unꞌa za yahalhduk whe ꞌukꞌe hónguz
16ꞌEt neMoodihti Sizi Gri, ꞌen ye ulhtus-i ꞌinkꞌez whusanatidalh-un cha, ꞌet whunohuznilhtan. Ndunne tube whunistꞌi be yalhdukne, ꞌenne ꞌet whuz unꞌa whulohne tsꞌihꞌun unꞌa khuni lheꞌitꞌoh-i ꞌuhulhꞌen. ꞌEnne bukꞌunꞌa iloh wheni whunoh uznulhtun. ꞌEt kꞌus ꞌoh daꞌ whenichꞌoh ꞌet nena be hooncha whe ootsꞌu ha yanduz-un, ꞌet cha tsꞌonalhꞌen. 17ꞌEt ꞌoh daꞌ ꞌuhooja-un, neBá Yakꞌusda duYeꞌ yudálhtiꞌ ꞌinkꞌez dádiztiꞌ whe ꞌuntꞌoh, ꞌet whunénilhtan. Kꞌus hooncha-un, ꞌen oochꞌeꞌ ꞌuhoontꞌoh, ꞌet dichꞌoh duYeꞌ yugha ooninꞌai. Yakꞌuz tsꞌe whe ꞌukꞌenus hooncha-un, ꞌet Yakꞌusda ooghuni ndus de ha díltsꞌut whe ndutni, “Ndun ꞌen sYeꞌ ookwꞌesiꞌ-un, ꞌen ꞌuntꞌoh. ꞌEn be tube hoonústꞌiꞌ.” 18ꞌOh daꞌ dzulh kꞌut whudiztiꞌ-un ꞌet, ꞌen bulh nutsꞌudilh whe ndi ooghuni, ꞌi yakꞌuz tsꞌe hadiltsꞌut-i, ꞌi ꞌuzdántsꞌo.
19ꞌInka ndi Yakꞌusda be nus hooꞌenne bughuni, ꞌi ꞌukꞌenus ootꞌaz ꞌuhoontꞌoh. ꞌEt ndi khuni soo cho ulhchoot de, ꞌet de ꞌukꞌenus nohba hootázooꞌ. Ntsꞌenꞌa tsahólhgus-un kwun be hootꞌen, ꞌet ndi khuni nohba ꞌet nduntꞌoh. Gri, sum cho tsꞌutni, ꞌen whusanátidalh, ꞌoh de ꞌet dúhooja de, nohdzi ndulcho-i be ndi khuni olhchoot. 20Ndi soo ꞌukꞌenus hooncha-un tꞌewhunoohzeh hubaꞌ hoontꞌoh. Yakꞌusda ooghuni nus tꞌeznanzin-i, ndet ꞌuwhulhni-un, ꞌaw dune didutchꞌoh dukꞌunꞌa naꞌhuyooleh aitꞌoh. 21ꞌEt ndi khuni ꞌi be nus tꞌeznanzin-i, ꞌaw dune didutchꞌoh hukwaꞌ huninzun huwa iloh whe neba ꞌukꞌeguz. ꞌEt kꞌus Yakꞌusda ooduneꞌne, mbe la oochꞌeꞌne, ꞌenne ntsꞌenꞌa Ndoni whubúnilhtan yahutilhduk-un, ꞌet whuz unꞌa za yahalhduk whe ꞌukꞌe hónguz.
Currently Selected:
2 Peter 1: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.