1 John 1
1
Ndi khuni be tsꞌúkhuna-i, ꞌi ghun
1Soo ꞌudechoo daꞌ whutsꞌun hoonli-un soo tsꞌihꞌun unꞌa whuzdántsꞌo-un, nena be cha tsꞌonalhꞌen, ꞌinkꞌez nela be cha ootꞌá tsꞌaznai khuni be tsꞌúkhuna-i, ꞌi ghun. 2Ndi be tsꞌukhuna-i nenalhtsꞌet haltsꞌut ꞌinkꞌez tsꞌohonꞌen ꞌinkꞌez howu yatsꞌalhduk. Ndi ꞌilhiz be tsꞌukhuna-i neBá bulh ꞌuntꞌoh. ꞌI nenalhtsꞌet ha hóoltsꞌut, ꞌet huwun nohtsꞌudániꞌ. 3Ndet tsꞌohonꞌen-un ꞌinkꞌez tsꞌodántsꞌo-un, ꞌet huwun nohtsꞌútni. ꞌEt la lhulh ꞌutsꞌintꞌoh tsꞌooleꞌ. ꞌEt ꞌalhaꞌ neBá ꞌinkꞌez ooYeꞌ Sizi Gri bubulh ꞌilhoh uzdidowh. 4ꞌInkꞌez ndi tsꞌiyawh huwun nohtsꞌó kꞌeꞌ tsꞌanguz, ꞌet sih tube cho whunólhni.
Ndi be hootꞌen-i, ꞌi ooniz tsꞌidulh de, ꞌet de ꞌilhoh ꞌutsꞌintꞌohne tsinli
5Ndi khuni tsꞌodántsꞌo-un ꞌi ꞌuntꞌoh, ꞌen tsꞌaháltsꞌut-i, ꞌi ghun nohtsꞌútni Yakꞌusda be hóotꞌen-i ꞌuntꞌoh, ꞌinkꞌez ꞌaw tsálhgus ooghu hooloh gaih. 6ꞌEn bulh lhulh ꞌútsꞌintꞌoh tsꞌutni de, ꞌinkꞌez tsálhgus yo tsꞌe tsꞌidulh de, ꞌet tsꞌuwhutsꞌit wheꞌ tsꞌutni, ꞌinkꞌez ꞌaw khuni ꞌalhaꞌ ꞌuntꞌoh-i ookꞌu nulheꞌtsꞌustꞌen. 7ꞌEt hoontsꞌi be hootꞌen-i bulh ꞌuntꞌoh, ꞌi ooniz tsꞌidulh de, ꞌet de ꞌilhoh lhulh ꞌutsꞌintꞌohne tsinli ꞌinkꞌez ooYeꞌ Sizi Gri buzkaiꞌ be nelubeshi tsꞌiyawh yunaꞌalhde.
8ꞌAw lubeshi lhtsꞌitꞌih tsꞌutni de, naꞌuzdunutꞌah ꞌinkꞌez khuni ꞌalhaꞌ ꞌuntꞌoh-i neghu hooloh. 9Lubeshi ꞌutsꞌalhꞌen tsꞌutni de, ꞌaw nelalhdutisni ꞌinkꞌez tsꞌihꞌun ꞌuntꞌoh whe nelubeshi neba yunaoodutilnoh ꞌinkꞌez tankꞌus unꞌa ꞌuhoontꞌoh-un, tsꞌiyawh whuchꞌa neyunaꞌtilhdoh. 10ꞌAw lubeshi lheꞌtsꞌílel tsꞌutni de, Yakꞌusda whutsꞌit-un ꞌuntꞌoh tsꞌutni wheꞌ tsꞌutni, ꞌinkꞌez ooghuni, ꞌaw neghu hooloh.
Currently Selected:
1 John 1: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.