Mataio 5
5
O le Lauga a Iesu i le Mauga.
(5.1—7.29)
1‘Ua silasila atu Iesu#5.1 Iesu: O le fa‘aliliuga tuai; ia. i le motu o tagata, ‘ona maliu a‘e lea o ia i le mauga; ‘ua nofo ai i lalo, ‘ona ō mai ai lea o ona so‘o ‘iā te ia; 2‘ua ia fetalai atu ma a‘oa‘o ‘iā te i latou, ‘ua fa‘apea atu,
O le Fiafia Moni
(Luka 6.20-23)
3“‘Amu‘ia ē matitiva i le agaga;
auā e o latou le mālō o le lagi.
4“‘Amu‘ia ē fa‘anoanoa;#Isai 61.2
auā e fa‘amafanafanaina i latou.
5“‘Amu‘ia ē agamalū;#Sala 37.11
auā e fai mo latou tofi le nu‘u.
6“‘Amu‘ia ē fia ‘a‘ai ma fia inu i le amiotonu;#Isai 55.1-2
auā e mā‘o‘ona i latou.
7“‘Amu‘ia ē alolofa atu;
auā e alofaina mai i latou.
8“‘Amu‘ia ē loto mamā;#Sala 24.3-4
auā latou te iloa atu le Atua.
9“‘Amu‘ia ē fa‘atupuina le filemū;
auā e ta‘ua i latou o atali‘i o le Atua.
10“‘Amu‘ia ē sauāina ‘ona o le amiotonu;#1 Pete 3.14
auā e ō latou le mālō o le lagi.
11“‘Amu‘ia ‘outou pe a latou ‘upu leaga ma fa‘asauā ‘iā te ‘outou, ma latou tu‘ua‘iina pepelo ‘outou i mea leaga uma ‘ona o a‘u.#1 Pete 4.14 12‘Ia ‘outou ‘oli‘oli ma fiafia lava; auā o i le lagi lo ‘outou taui e tele; auā na fa‘apea ‘ona latou fa‘asauā i perofeta ē na muamua ‘iā te ‘outou.#2 No 36.16; Galu 7.52
Masima ma le Malamalama
(Mare 9.50; Luka 14.34-35)
13“O ‘outou, o le masima o le lalolagi; ‘ae ‘āfai e māgalo le masima, po se a se mea e fa‘amāi ai? E leai se mea e toe aogā ai, nā ‘ona lafoa‘iina i fafo, ma solia e tagata.
14“O ‘outou, o le malamalama o le lalolagi. E lē mafai ‘ona lilo le ‘a‘ai ‘ua tu i luga o le mauga.#Ioane 8.12; 9.5 15Latou te lē tutuina fo‘i le molī i le tu‘u ai i lalo o le mea e fua a‘i saito, ‘ae tu‘u i luga lava o le tu‘ugāmolī ‘ia pupula atu ai i ē o i le fale uma.#Mare 4.21; Luka 8.16; 11.33 16‘Ia fa‘apea ‘ona pupula atu lo ‘outou malamalama i luma o tagata, ‘ina ‘ia latou iloa la ‘outou amio lelei, latou te vivi‘i atu ai i lo ‘outou Tamā o i le lagi.#1 Pete 2.12
O A‘oa‘oga e uiga i le Tulafono
17“‘Aua ne‘i ‘outou manatu ‘ua ‘ou sau e tatalaina le tulafono po o le ‘au perofeta; ‘ou te le‘i sau e tatalaina a ‘ia fa‘ataunu‘uina. 18Auā e moni, ‘ou te fai atu ‘iā te ‘outou, e mavae atu le lagi ma le lalolagi, ‘ae lē mavae atu lava se ‘iota po o sina fāsi mata‘itusi o le tulafono, se‘ia taunu‘u mea uma.#5.18 se‘ia taunu‘u mea uma: po o o a‘oa‘oga uma nei e taunu‘u moni lava. #Luka 16.17 19O lenei, o sē na te tatalaina se poloa‘iga e tasi e aupito itiiti o nei poloa‘iga, ma fa‘apea ‘ona a‘oa‘o i tagata, e ta‘ua ia e aupito itiiti i le mālō o le lagi; a o sē ‘ana‘ana ma a‘oa‘o ai, e ta‘ua ia e sili i le mālō o le lagi. 20Auā ‘ou te fai atu ‘iā te ‘outou, a lē sili la ‘outou amiotonu i la le ‘au tusi‘upu ma le ‘au faresaio, e lē sao atu lava ‘outou i le mālō o le lagi.
O A‘oa‘oga e Fa‘atatau i le Ita
(Luka 12.57-59)
21“‘Ua ‘outou fa‘alogo, na fai mai ē anamua, ‘‘Aua ‘e te fasioti tagata’; ‘‘ai sē fasioti tagata, e nofo sala o ia i le fa‘amasinoga.’#Eso 20.13; Teu 5.17 22A o a‘u, ‘ou te fai atu ‘iā te ‘outou, ‘ai sē ita i lona uso, e nofo sala o ia i le fa‘amasinoga; ‘ai sē fai atu fo‘i i lona uso, Raka,#5.22 Raka: po o vale. e nofo sala o ia i le fono; ‘ai sē fai atu fo‘i, ‘Le vale e,’ e nofo sala o ia i le afi o Kēna. 23Pe ‘āfai fo‘i ‘e te avatu lau taulaga i le fatafaitaulaga, ‘ona e manatua ai lea ‘ua i lou uso se mea e tigā ai o ia ‘iā te oe, 24‘inā tu‘u ia i lea mea o lau taulaga i luma o le fatafaitaulaga ‘ae alu oe ‘ia mua‘i fa‘alelei i lou uso, i le e sau ma avatu lau taulaga. 25‘Ia vave ‘ona ‘oulua lelei ma lē tagi i ana mea ‘ua ‘iā te oe, manū o i le ala ‘oulua ma ia; ‘ina ne‘i tu‘uina atu oe i le fa‘amasino e lē ‘ua tagi i ana mea, e tu‘uina atu fo‘i oe e le fa‘amasino i le ‘au‘auna, ‘ona tu‘uina atu lea o oe i le fale puipui. 26E moni, ‘ou te fai atu ‘iā te oe, ‘e te lē toe ulufafo ai lava, se‘ia e avatu tupe uma lava.
O A‘oa‘oga e Fa‘atatau i le Mulilua
27“‘Ua ‘outou fa‘alogo, na fai mai i ē anamua, ‘‘Aua ‘e te mulilua.’#Eso 20.14; Teu 5.18 28‘Ae ‘ou te fai atu ‘iā te ‘outou, ‘ai sē va‘ai atu i le fafine ‘ina ‘ia mana‘o i ai, ‘ua uma ‘ona mulilua ma ia i lona loto. 29‘Āfai fo‘i ‘e te tausuai i lou mata taumatau, ‘inā sali ‘ese ia ma e lafoa‘i; auā e lelei ‘ina fano se tasi ou fāsi tino, ‘ae leaga pe a lafoina lou tino uma i Kēna.#Mata 18.9; Mare 9.47 30‘Āfai fo‘i ‘e te tausuai i lou lima taumatau, ‘inā tutū ‘ese ia, ma e lafoa‘i; auā e lelei ‘ina fano se tasi ou fāsi tino, ‘ae leaga pe a lafoina lou tino uma i Kēna.#5.30 Kēna: po o Ifeli, o le afi e lē toe pē. #Mata 18.8; Mare 9.43
O A‘oa‘oga i Ulugali‘i Tēte‘a
(Mata 19.9; Mare 10.11-12; Luka 16.18)
31“Sa fai mai fo‘i, ‘‘Ai sē fa‘ate‘a i lana avā, ‘ia avatu ‘iā te ia le tusi alei.’#Teu 24.1-4; Mata 19.7; Mare 10.4 32‘Ae ‘ou te fai atu ‘iā te ‘outou, ‘ai sē fa‘ate‘a lana avā, ‘ae le‘i mulilua o ia, ‘ua ia fa‘amulilua ‘iā te ia; ‘ai sē fai māna avā lē ‘ua fa‘ate‘aina, ‘ua mulilua fo‘i o ia.#Mata 19.9; Mare 10.11-12; Luka 16.18; 1 Kori 7.10-11
O A‘oa‘oga e Fa‘atatau i Tautoga
33“‘Ua fa‘alogo fo‘i ‘outou, na fai mai i ē anamua, ‘‘Aua ‘e te tautō pepelo; a ‘ia e avatu i le Ali‘i o mea ‘e te tautō ai.’#Levi 19.12; Nume 30.2; Teu 23.21 34‘Ae ‘ou te fai atu ‘iā te ‘outou, ‘aua lava ne‘i tautō; ‘aua le tautō i le lagi, auā o le nofoāli‘i lea o le Atua,#Iako 5.12; Isai 66.1; Mata 23.22 35po o le lalolagi, auā o le mea e tu ai ona ‘a‘ao lea; po o Ierusalema, auā o le ‘a‘ai lea a le Tupu silisili.#Isai 66.1; Sala 48.2 36‘Aua fo‘i ne‘i e tautō i lou ulu, auā ‘e te lē mafaia ‘ona fa‘asinasina, pe fa‘auliuli se lauulu e tasi. 37A ‘ia fa‘apea la ‘outou ‘upu, ‘Ioe, ioe’ ‘E leai, e leai’; auā o le ‘upu e sili i nā ‘upu, mai le leaga lava ia.
O A‘oa‘oga e Fa‘atatau i le Tauimasui
(Luka 6.29-30)
38“‘Ua ‘outou fa‘alogo, na fai mai, ‘E suia le mata i le mata, e suia fo‘i le nifo i le nifo.’#Eso 21.24; Levi 24.20; Teu 19.21 39‘Ae ‘ou te fai atu ‘iā te ‘outou, ‘aua ne‘i ‘outou tete‘e atu i le leaga; ‘ai sē na te po mai i lou alafau taumatau, ‘ia e liliu atu ‘iā te ia le isi. 40O lē fia fai se fa‘amasinoga ma oe e ‘ave lou ‘ofu tino, ‘ia e tu‘u atu fo‘i i ai ma lou ‘ofu tele. 41‘Ai sē na te tauānau mai lua te ō ma ia i le maila e tasi, ‘inā ō ia ‘oulua ma ia i maila e lua. 42‘Ia e avatu i lē ‘ua ole mai ‘ia te oe; ‘aua fo‘i ‘e te liliu ‘ese i lē ‘ua fia nonō tupe ‘ia te oe.
Alofa i o ‘Outou Fili
(Luka 6.27-28, 32-36)
43“‘Ua ‘outou fa‘alogo, na fai mai, ‘‘Ia e alofa atu i lē lua te tuā‘oi, a ‘ia ‘ino‘ino i lē ‘ua ita mai ‘iā te oe.’#Levi 19.18 44‘Ae ‘ou te fai atu ‘iā te ‘outou, ‘ia ‘outou alolofa atu i ē ‘ua ita mai ‘iā te ‘outou, ‘ia ‘outou fa‘amanuia atu i ē ‘ua fetu‘u mai ‘iā te ‘outou, ‘ia ‘outou agalelei atu i ē ‘ua ‘ino‘ino mai ‘iā te ‘outou, ‘ia ‘outou tatalo fo‘i mo ē ‘ua tu‘ua‘i fua mai ma fa‘asauā mai ‘iā te ‘outou; 45‘ina ‘ia faia ‘outou ma atali‘i o lo ‘outou Tamā o i le lagi, o lē na te fa‘aoso i lona lā i ē ‘ua amio leaga ‘atoa ma ē ‘ua amio lelei; ‘ua ia fa‘atotō ifo fo‘i le ua#5.45 fa‘atotō ifo le ua: po o le fa‘atotō ifo le timu. i ē ‘ua amiotonu, ‘atoa ma ē ‘ua amioletonu. 46Auā ‘āfai tou te alolofa atu i ē ‘ua alolofa mai ‘iā te ‘outou, se a ‘ea se taui tou te maua ai? E lē faia ‘ea e tagata ao lafoga o lea lava mea? 47Pe ‘āfai tou te fa‘apito lo ‘outou fealofani i o ‘outou uso, se a se mea sili ‘ua ‘outou faia? E lē fa‘apea ‘ea ‘ona faia e tagata fa‘apaupau? 48O lenei, ‘ia ‘ato‘atoa ‘ona lelei o la ‘outou amio, e pei o lo ‘outou Tamā o i le lagi e ‘ato‘atoa ‘ona lelei o ia.#Levi 19.2; Teu 18.13
Currently Selected:
Mataio 5: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.