Ioane 14
14
O Iesu o le Ala i le Tamā
1“‘Aua le atuatuvale o ‘outou loto; ‘ia ‘outou fa‘atuatua i le Atua, ‘ia fa‘atuatua mai fo‘i ‘iā te a‘u.#Mare 11.22 2E tele mea e nonofo ai i le maota o lo‘u Tamā; ‘ana leai, ‘ua ‘ou fai atu ‘iā te ‘outou; ‘ou te alu e sauni se mea e nonofo ai ‘outou. 3‘Āfai fo‘i ‘ou te alu ma sauni se mea e nonofo ai ‘outou, ‘ou te toe sau, ‘ou te talia fo‘i ‘outou ‘ia fa‘atasi ma a‘u; ‘ina ‘ia i ai ‘outou i le mea ‘ou te i ai a‘u. 4‘Ua ‘outou iloa le mea ‘ou te alu i ai, ‘ua ‘outou iloa fo‘i le ala.”
5‘Ua fai mai Toma ‘iā te ia, “Le Ali‘i e, matou te lē iloa le mea ‘e te maliu atu i ai, matou te mafaia fa‘apefea ‘ona iloa o le ala?”
6‘Ua fetalai atu Iesu ‘iā te ia, “O a‘u nei le ala, ma le ‘upu moni, ma le ola; e lē alu atu lava se tasi i le Tamā, pe a lē ui mai ‘iā te a‘u.#Epe 10.20; Mata 11.27; Ioane 11.25; Roma 5.1, 2 7‘Ana iloa e ‘outou o a‘u, po ‘ua iloa fo‘i e ‘outou lo‘u Tamā; e amata nei fo‘i ‘ona iloa o ia e ‘outou; tou te va‘ai fo‘i ‘iā te ia.”
8‘Ua fai mai Filipo ‘iā te ia, “Le Ali‘i e, ‘ia e fa‘ailoa mai le Tamā ‘iā te i matou, ‘ona gata ai lea o matou mana‘o.”
9‘Ua fetalai atu Iesu ‘iā te ia, “Filipo e, ‘ua leva ‘ona ‘ou i ai ‘iā te ‘outou, ‘ae tou le‘i iloa ‘ea a‘u? O lē ‘ua va‘ai mai ‘iā te a‘u, ‘ua va‘ai o ia i le Tamā, se a fo‘i ‘e te fai mai ai, ‘Fa‘ailoa mai le Tamā ‘iā te i matou?’#Ioane 12.45; Epe 1.3; Mata 17.17 10‘E te lē talitonu ‘ea, o a‘u o i totonu o le Tamā, o le Tamā fo‘i o i totonu ‘iā te a‘u? O ‘upu ‘ou te tautala atu ai ‘iā te ‘outou, ‘ou te lē tautala fua na o a‘u; a o le Tamā o lo‘o nofo i totonu ‘iā te a‘u, o ia lava na te faia ana galuega. 11‘Ia ‘outou talitonu mai ‘iā te a‘u, o a‘u o i totonu o le Tamā, o le Tamā fo‘i o i totonu ‘iā te a‘u; a lē o lea ‘ia ‘outou talitonu mai ‘iā te a‘u ‘ona o ia galuega.#Ioane 14.10; Ioane 10.25, 38 12E moni, e moni, ‘ou te fai atu ‘iā te ‘outou, o lē talitonu mai ‘iā te a‘u, e faia lava e ia o galuega ‘ou te faia; e fai fo‘i e ia mea e sili i ia mea, auā ‘ou te alu i lo‘u Tamā.#Mare 16.19, 20 13O mea uma fo‘i tou te ole atu ai i lo‘u igoa, ‘ou te faia lava; ‘ina ‘ia vi‘ia le Tamā ‘ona o le Atali‘i.#Ioane 15.7; Mare 11.24; 1 Ioane 5.14 14‘Āfai tou te ole atu i se mea i lo‘u igoa, ‘ou te faia lava.
O le Folafolaga o le Agaga Pa‘ia
15“‘Āfai tou te alofa mai ‘iā te a‘u, ‘ia ‘outou tausi mai i a‘u poloa‘iga. 16‘Ou te fai atu fo‘i i le Tamā, ‘ona foa‘i mai ai lea e ia ‘iā te ‘outou le tasi Fesoasoani, ‘ina ‘ia tumau pea o ia ‘iā te ‘outou e fa‘avavau;#Ioane 14.26; 15.26; 16.7; 1 Ioane 2.1 17o ia o le Agaga o le ‘upu moni, e lē mafai e le lalolagi ‘ona talia o ia, auā ‘ua lē va‘aia o ia, ‘ua lē iloa fo‘i o ia; a o ‘outou, ‘ua ‘outou iloa o ia, auā e tumau pea ia ‘iā te ‘outou, e i ai fo‘i o ia i totonu ‘iā te ‘outou.#Ioane 7.39; 16.13; Mata 10.20; Roma 8.26
18“‘Ou te lē tu‘ua ‘outou o mātuaoti, ‘ou te sau ‘iā te ‘outou. 19E toe itiiti ‘ona lē va‘ai mai lea o le lalolagi ‘iā te a‘u, ‘ae va‘ai mai pea ‘outou ‘iā te a‘u; ‘ou te ola a‘u, o le mea lea e ola ai fo‘i ‘outou.#Ioane 16.16 20O lea aso e iloa ai e ‘outou, ‘ou te i totonu o lo‘u Tamā; o ‘outou fo‘i o i totonu ‘iā te a‘u, o a‘u fo‘i o i totonu ‘iā te ‘outou.
21“O lē ‘ua ‘iā te ia a‘u poloa‘iga ma tausi i ai, o ia lea e alofa mai ‘iā te a‘u; o lē alofa mai fo‘i ‘iā te a‘u, e alofaina o ia e lo‘u Tamā; ‘ou te alofa fo‘i ‘iā te ia, ma ‘ou fa‘aali ‘iā te ia.”#2 Kori 3.18; 1 Ioane 5.3
22‘Ua fai mai ‘iā te ia o Iuta, (e lē o le Sekara lea,) “Le Ali‘i e, pe se a le mea o le a e fa‘aali mai ai oe ‘iā te i matou, ‘ae lē o le lalolagi?”
23‘Ona tali atu lea o Iesu, ‘ua fa‘apea atu ‘iā te ia, “‘Āfai e alofa mai se tasi ‘iā te a‘u, e tausia e ia la‘u ‘upu; e alofa fo‘i lo‘u Tamā ‘iā te ia; e ō mai fo‘i i mā‘ua ‘iā te ia, matou te nonofo ma ia.#Ioane 13.34; 14.21; Fa‘ata 8.17; Mata 18.20; 28.20; Efe 3.17; 2 Kori 6.16 24O lē lē alofa ‘iā te a‘u, e lē tausia e ia a‘u ‘upu, o le ‘upu fo‘i tou te fa‘alogologo i ai, e lē sa‘u lea, a o le ‘upu a le Tamā ‘ua ‘auina mai a‘u.#Ioane 7.16; 1 Ioane 2.5
25“O mea ia ‘ua ‘ou fai atu ‘iā te ‘outou, manū o tatou nonofo ma ‘outou. 26A o le Fesoasoani, o le Agaga Pa‘ia lea, e ‘auina mai e le Tamā i lo‘u igoa o ia lava na te a‘oa‘o ‘iā te ‘outou i mea uma lava; e fa‘amanatu mai fo‘i e ia ‘iā te ‘outou i mea uma na ‘ou fai atu ai ‘iā te ‘outou.#Ioane 14.16; Mata 10.19
27“‘Ou te tu‘uina atu ‘iā te ‘outou le manuia; o lo‘u manuia ‘ou te avatu ai ‘iā te ‘outou; ‘ou te lē avatu ‘iā te ‘outou fa‘apei ‘ona avatu e le lalolagi. ‘Aua le atuatuvale o ‘outou loto, ‘aua fo‘i tou te matata‘u.#Ioane 1.16, 33; Fili 4.7 28‘Ua ‘outou fa‘alogo mai, ‘ua ‘ou fai atu ‘iā te ‘outou, ‘‘Ou te alu ma ‘ou toe sau ‘iā te ‘outou.’ ‘Ana ‘outou alofa mai ‘iā te a‘u, po ‘ua ‘outou ‘oli‘oli i lo‘u fai atu, ‘ou te alu atu i le Tamā; auā e sili lo‘u Tamā ‘iā te a‘u.#Ioane 14.3, 6, 18; Luka 24.52 29‘Ua ‘ou fai atu nei fo‘i ‘iā te ‘outou a o le‘i taunu‘u; ‘ina ‘ia ‘outou talitonu mai pe a taunu‘u. 30‘Ou te lē toe tautala atu ‘iā te ‘outou i ni ‘upu e tele; auā o le a sau le ali‘i o lenei lalolagi, ‘ae lē maua e ia se mea ‘iā te a‘u.#Ioane 12.31; Efe 2.2 31Peita‘i ‘ina ‘ia iloa e le lalolagi, ‘ou te alofa i le Tamā fa‘apei ‘ona poloa‘i mai fo‘i o le Tamā ‘iā te a‘u, e fa‘apea lava ‘ona ‘ou faia.
Tutū ia i luga, ‘inā tatou ō ‘ese ia.#Ioane 10.18; Mata 26.46; Mare 14.42
Currently Selected:
Ioane 14: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.