Isaia 1
1
O le A‘oa‘iga ‘iā Isaraelu
1O le fa‘aaliga ‘iā Isaia le atali‘i o Amota, na ia va‘aia ‘iā Iuta ma Ierusalema, i ona po o Usia, o Iotama, o Aasa ma Esekia, o tupu o Iuta.#2 Tu 15.1-7; 15.32—16.20; 18.1—20.21; 2 No 26.1—32.33; Isai 7.1-12; 36.1-22
2Le lagi e, fa‘alogo mai ia;
le lalolagi e, ua‘i mai ia ou taliga;
auā ‘ua fetalai mai le ALI‘I:
‘Ua ‘ou tausia ma a‘oa‘oina le fānau,
a ‘ua latou fōua a‘u.
3‘Ua iloa e le povi lē na te tausia o ia,
‘ua iloa fo‘i e le asini le mea
e fagaina ai o ia e lē na te tausia o ia;
a o Isaraelu, ‘ua lē iloa e i latou,
‘ua lē mafaufau lava lo‘u nu‘u.
4‘Oi talofa i le nu‘u agasala, o le nu‘u e agasala tele lava,
o le tupulaga amio leaga,
o le fānau e leaga lava i latou;
na latou lafoa‘iina le ALI‘I;
‘ua latou ‘ino‘ino i le Pa‘ia o Isaraelu,
‘ua tu‘umuli lava i latou.#Isai 5.24; Eseki 14.5
5Se a le mea e toe sasaina ai ‘outou?
Tou te ō ‘ese pea ‘ea?
O lo‘o ma‘i le ulu uma,
o lo‘o vaivai le loto uma.
6E āfua i le alofivae e o‘o lava i le ulu,
e leai se mea ‘ua sao;
a o manu‘a ma fa‘alavalava,
‘atoa ma le papala ‘ua ‘a‘ati,
e le‘i fa‘aso‘oina, e le‘i fusia,
e le‘i fa‘amalūina fo‘i i le suāu‘u.
7O lo ‘outou nu‘u ‘ua fa‘atafunaina,
o a ‘outou ‘a‘ai ‘ua susunuina i le afi;
o fua o lo ‘outou lau‘ele‘ele
‘ua ‘aina e tagata ‘ese i o ‘outou luma,
‘ua fa‘atafunaina, ‘ua fa‘aumatia lava e tagata ‘ese.#Teu 28.51; Isai 6.11-12
8‘Ua tu‘ua fo‘i le tama fafine a Siona
e pei o se fale apitaga i le tōvine,
e pei o se fale i le mea ‘ua totō ai kukuma,
e pei o se ‘a‘ai ‘ua vagaia.
9‘Ana le fa‘atotoeina e le ALI‘I o ‘au
ni nai to‘aitiiti lava ‘iā i tatou,
po ‘ua ‘avea i tatou e pei o Sotoma,
po ‘ua tusa i tatou ma Komoro.#Kene 19.24; Roma 9.29
10Faipule o Sotoma e,
fa‘alogologo mai ia i le afioga a le ALI‘I;
le nu‘u o Komoro e,
‘inā ua‘i mai ia o ‘outou taliga
i le tulafono a lo tatou Atua.
11O lo‘o fa‘apea mai le ALI‘I:
Se a ‘ea le aogā ‘iā te a‘u
o a ‘outou taulaga e tele?
‘Ua ‘ou fiu i taulaga mū e fai i mamoe po‘a
ma le ga‘o o manu pepeti;
‘ou te lē fiafia lava i toto o povi po‘a ta‘anoa,
ma tama‘i mamoe, ‘atoa ma oti po‘a.#Amo 5.21-22
12A ‘outou ō mai ‘ia iloa ‘outou i o‘u luma,
o ai ‘ea na fai atu lea mea ‘iā te ‘outou
e soli ai o‘u lotoā?
13‘Aua ne‘i tou toe ‘aumai taulaga le aogā,
o mea manogi e mū, e ‘inosia lea e a‘u;
o le masina fa‘ato‘ā va‘aia ma le sapati
ma le tala‘iga o fa‘apotopotoga
‘ou te lē mafaia lava,
o le agasala lava lea, o le fa‘apotopotoga lava,#Levi 23.36; Nume 28.9, 11; Ioe 2.15
14O ‘outou masina fa‘ato‘ā va‘aia ma ‘outou fa‘apotopotoga,
e ‘ino‘ino i ai lo‘u loto;
‘ua fai lava ma mea mamafa ‘iā te a‘u,
a a‘u lailoa i tau‘ave.
15A ‘outou fa‘aloaloa mai o ‘outou lima,
e ‘alo ‘ese o‘u mata ‘iā te ‘outou;
e ui lava ‘ina ‘outou fa‘ateleina tatalo,
‘ou te lē fa‘alogo ai lava;
‘ua tūtūmu o ‘outou lima i le toto.#1 Tu 8.22; Mika 3.4
16‘Inā fafano ia ‘outou, ‘inā fa‘amamā ia ‘outou;
fa‘ate‘a ‘ese ia a ‘outou galuega leaga i o‘u luma,
sōia tou te fai mea leaga.
17‘Ia ‘outou fa‘amasani i le amio lelei,
sā‘ili‘ili ia i le fa‘amasinoga;
‘ia ‘outou fa‘asaoina lē ‘ua sauāina,
‘ia ‘outou fa‘amasino i lē ‘ua mātuaoti,
‘ia ‘outou finau#1.17 finau po o puipui po o leoleo. mo le fafine ‘ua oti lana tane.
18O lo‘o o fa‘apea mai le ALI‘I:
Ō mai ia, ‘inā tatou filifili ia,
e ui lava ‘ina pei o ‘ofu mūmū a ‘outou agasala,
e sisina ia e pei o le kiona;
e ui lava ‘ina mūmū ia e pei o le ‘ie ulaula,
e ‘avea e pei o fulufulu mamoe.#Sala 51.7; Isai 43.26
19‘Āfai tou te gaua‘i ma ‘outou fa‘alogo,
tou te ‘a‘ai ai mea lelei o le lau‘ele‘ele.
20‘Ae ‘āfai tou te lē mafafai ma ‘outou fouvale,
e fa‘aumatia ai ‘outou i le pelu;
auā ‘ua fetalai mai ai le fofoga o le ALI‘I.
O le ‘A‘ai ‘ua Tumu i le Agasala
21Auē! ‘ua ‘avea ma talitane le ‘a‘ai sa fa‘amaoni;
sa tumu i le fa‘amasinoga, sa nofo ai le amiotonu;
a o ona po nei, o lo‘o nonofo ai o ē fasioti tagata.#Iere 2.20; 31.23
22O lau ario ‘ua ‘avea lea ma otaota;
‘ua sui i le vai lau uaina.
23O ou ali‘i sili e vaogatatā i latou,
e fefa‘auōa‘i ma ē gaoi,
‘ua naunau i latou uma i mea alofa,
‘ua tausisi fo‘i i taui;
latou te lē fa‘amasino i lē ‘ua mātuaoti,
‘ua lē o‘o atu fo‘i ‘iā te i latou
le finauga a le fafine ‘ua oti lana tane.#Iere 5.28; Hose 9.15; Mika 7.3
24O le mea lea o lo‘o fa‘apea mai ai le Ali‘i,
o le ALI‘I o ‘au, o le Malosi o Isaraelu:
Auē! ‘ou te taui atu i ē ‘ua agaleaga mai ‘iā te a‘u,
‘ou te fa‘asalaina ē ‘ua ita mai ‘iā te a‘u.
25‘Ou te fa‘afo‘i atu fo‘i lo‘u lima ‘iā te oe
ma ‘ou matuā fa‘ate‘a ‘ese lou otaota,
‘ou te ‘ave‘eseina fo‘i lau ‘apa sinasina uma lava.#Eseki 22.20
26‘Ou te toe fa‘afo‘i atu ou fa‘amasino
e pei o anamua ma ou faipule
e pei o le amataga;
mulimuli ane, ona igoa ai lea o oe,
O le ‘a‘ai amiotonu, o le ‘a‘ai fa‘amaoni.
27E fa‘aolaina Siona i le fa‘amasinoga;
o ē liliu mai fo‘i, e fa‘aolaina i latou i le amiotonu.
28‘Ae o‘o fa‘atasi le malaia o ē solitulafono ‘atoa ma ē agasala;
o ē lafoa‘i fo‘i le ALI‘I e fa‘aumatia lava i latou.
29Auā e fa‘amāina i latou ‘ona o tapeneto
‘ua ‘outou manana‘o ai,
e māsiasi fo‘i ‘outou ‘ona o ulu la‘au
‘ua ‘outou loto i ai.#Isai 57.5; 65.3; Hose 4.13, 19
30Auā tou te fa‘apei o se tapeneto e mamae ona lau,
e fa‘apei o se ulu la‘au fo‘i e lē o i ai se vai.#Iere 17.7-8
31E ‘avea ma lino lē ‘ua malosi,
o lana galuega fo‘i e ‘avea ma aloiafi;
e mū fa‘atasi i lā‘ua uma,
e leai fo‘i sē na te tineia.
Currently Selected:
Isaia 1: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.