Tit. 1
1
1Wikia Pápruitjiai Yusa takarniúri̱. Tura Jesukrístu akatrámuri̱ntjiai. Yus achikma ainia nú shuar nisha antukar Yusan umirkarat tusan akatrámuitjiai. Shuar nuna nekaawar péṉker wekasartatui. 2Tura nu arant nú shuarsha tuke iwiaaku pujusárat tusan étsereajai. Nú shuarnasha nuṉkan najantsuk “uwemtikrattajai” Yus tímiayi. Tura Nisha wáitruatniun tujintiawai. 3Tura yamaikia tsawant jeamtai nuna nekaawarat tusa ii Yusri̱ uwemtikkiartinia nu winia chichamur ujakárta tusa winia akattúrmiayi.
4Titiu, wi Yusna étserma umikiu asakmin winia uchirua áitkiasnak papin áateajme. Iis, iiji̱a̱i̱ métek Yus nekas enentáimtatsjik. Yus waitnentrama asa shiir awajtámsati tusan wakerajme. Tura ii Aparí̱ Yussha tura ii Uuntri̱ Jesukrístusha Uwemtikkiartin ana nu, enentáimin imiatkincha awajtámsati tajai.
Yus shuara uuntri̱ urukua átiniait
5Wats wi iwiarachmajna nu ame iwiarata tusan Krítianam ikiukchamkajam. Tura “ashí péprunam Yus shuar írunmanum Yus shuaran wáinkiarat tusam Yus shuara uuntri̱ anaikiarta” tíchamkajam.
6Yus shuara úuntri̱ṉkia warinmaṉsha makuchmin tí peṉker tura chikichík nuwe̱ntin átiniaiti. Núnisaṉ uchirí̱sha ní wakeramunak túrichu tura aya níniunak enentáimtichu antsu Yusan enentáimtin ártiniaiti. 7Enentáimprata. Yus shuara úuntri̱n Yusna ana nuna wainkiat tusa anaikiamuiti. Tuma asamtai nekas warinmaṉsha tíchamnia wekasatniuiti. Waantu enentáimtumatsuk kajetsuk tura nampechu átiniaiti. Chikichan waitkiau áchatniuiti. Tura anaṉkartua kuítrintin ajastaj tusa wakerukchatniuiti. 8Antsu shuar ni je̱e̱n írar winiana nuna itiaatniuiti. Tura ashí péṉker ana nuna wakerin, esetas enentáimin átiniaiti. Tura naka enentáimin núnisaṉ esetar túrin átiniaiti. Tura niṉki íimiastiniaiti. 9Tura nú arantcha Yúsnan esetar jintíamu péṉker nekáa emetamu asa chíkich shuaran tí peṉker unuimiátai̱ji̱a̱i̱ jintintiámniaiti. Tura pachimtikin ujakmancha naka nakuertiniaiti.
Ántar Yúsnan etserin chicharkamu
10Nekaata. Umichu tí irunui. Nisha ántar chicháu ásar anaṉmau áiniawai. Nu shuarka Israer shuar weanam tí irunui. 11Nisha kuítian achiktaj tusar wakeruiniak yajauch unuiniarchatniua nuna unuiniainiawai. Nuna túruiniak untsurí shuaran ni írutkamuri̱ji̱a̱i̱ yajauch enentáimtikiainiawai. Tuma asamtai ántar chichainiakui ni wene̱ epetkatniuiti. 12Warí imia Krítianmaya̱ chichaman etserin ju̱na tíchamka “Krítianmaya̱ aentska tuke wáitrin áiniawai. Tura nákitiat ti yurumin áiniawai. Yajasma núnisaṉ áiniawai.” Nuna tíchamka. 13-14Maa, nisha nékasaṉ tímiayi. Nu tuma asamtai Titiu, Israer shuar ántar tuinia nuna Yus shuar anturkacharti tusam tura nekas chichaman nakitiana nuna akupeamuri̱n umirkacharti tusam antsu Yusan nekas umirkarat tusam umichu shuar kakaram chicharkarta.
15Enentáimprata. Yus shuarka ni enentái̱ chamir ajasu ana nuka ashí ni wainnia nuna péṉkernak enentáimtawai. Tura chíkich shuar Yusan umirkachu asa ni enentái̱ wapik asa péṉker ana nuna enentáimtustinian tujintiawai. Achapai enentáimiuk péṉkercha ana nuna “péṉkeraiti” tawai. 16Tura nisha “Yus shuaraitjiai” tuíniayataṉ Yusan umirtsuk niisháa túruiniawai. Tuma ásar nisha mui̱jmiai̱ áiniawai. Umichu ásar péṉkeran túratniun peṉké tujintiainiawai.
Currently Selected:
Tit. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.