Jir. 1
1
Papru sepunam pujus áatramu
1Wi Papru Timiutéuja̱i̱ Jesukrístu takarin asar ashí Yus shuar Jiripiusnum pujarmena nu ju̱ papí akuptaji. Yus shuara uuntri̱ árumna nusha tura Yus shuaran yain árumna nusha ashí Yus shuarsha núnisaṉ Yusna asarum tura Jesukrístuja̱i̱ tsaniṉkiu asakrumin ju̱ papí áateajrume. 2Ii Aparí̱ Yussha tura Jesukrístu ii úuntri̱sha atumín waitnentramainia ásar aṉkant tuke shiir pujustinian suramsarti.
Papru Yus shuaran Yusan áujtawai
3Ashí tsawant atumín enentáimtakun Yusan tuke shiir yúmiṉkiajai. 4Yusan áujeaknasha ti warasan seatjarme. 5Kame iikia yámankamtaikniumia̱ Yus Chicham métek yainiaikiar iniaitsuk takasuitji. 6Yus atumíin tí peṉker awajsatniun naṉkama asa núnisaṉ Jesukrístu táatsa̱i̱ṉ tuke shiir awajtamki̱ nekas péṉker najatmattarme. Nuka ti nekasaiti. 7Atumín ashí ti aneajrume. Kame wi sepunam pujakun Yus Chichaman akasmatakun tura Yus shuar kaka̱rarti tusan takaakui átum yáintiarme. Yus ti anenkartin asa nu túratniun mái̱ metek tsaṉkatramkaitji. Tuma asamtai atumín jú̱nisan enentáimtustin tí peṉkeraiti. 8Jesukrístu aneṉkrattairi̱ji̱a̱i̱ wi atumín aneamun Yussha paant nékarui. 9Yusan áujeakun anearmena nú naṉkaamas aneak tusan seatjarme. Tura núja̱i̱sha ti neka ajasrum 10ashí péṉkera nu achikiuk tusan Yusan áujtajrume. Atumín nu túrunamtaiṉkia yamaisha tunaaja̱i̱nchu pujustatrume tura Kristu támatai sumamashtatrume. 11Núnisaṉ Jesukrístu kakarmari̱ji̱a̱i̱ ashí péṉker túrin átatrume. Tura nuja̱i̱ ashí shuar Yusan ti shiir enentáimturartatui.
Aya Krístunak enentáimtu pujajai
12Winin túrunamu itiurchat ai̱ṉ nuja̱i̱ uwempratin chicham nekas pampaawai. Yatsuru nu nekaatarum tusan wakerajrume. 13Iis, akupniu suntarí̱sha tura ashí shuarsha wi Krístunun etseru asan sepunam pujamun paant nékainiawai. 14Ti untsurí Yus shuar wi sepunam eṉketman nekaawar ii Uuntri̱ Jesusan nekas enentáimtusar sapijmiatsuk Yus Chichaman etserainiawai.
15Kame shuar awai winia kajertuiniak tura naṉkamantu enentáimtumainiak Krístun páchiniawai. Antsu chíkich shuarka nekas enentáiji̱a̱i̱ Krístun etserainiawai. 16Yajauch shuarka Krístun shiir enentáimtutsuk antsu ashí shuar ní chichame̱nak anturkar wí shuar ajasarat tusar etserainiawai. Túruiniak wisha sepunam pujakui nu arant itit awajtústinian wakerutainiawai. 17Antsu péṉker shuar Krístun nekas aneenak etserainiawai. Nu uwempratin chicham imiá peṉkeraiti wi títin asamtai winiasha anentainiak shiir etserainiawai. 18Wats, mái̱ metek chíkich yajauch enentáiji̱a̱i̱ tura chíkich shiir enentáiji̱a̱i̱ Krístun etserainiakui shiir enentáimjiai.
Tura nuna naṉkaamas shiir enentáimprattajai. 19Kame Yus áujtursa asakrumin tura Jesukrístu Wakaní̱sha yaintiu asamtai jú̱ja̱i̱sha uwempran jiinkittiajai. 20Nekas ju̱na wakerajai, natsaamtsuk akupniun Jesukrístunun paant ujakártinian wakerajai. Nuja̱i̱ winí̱ Kristu kakarmari̱ pujamu ti paant nekanattawai. Mántuiniakuisha tura mántuiniachkuisha ashamatsjai. Aya Kristu kakarmari̱n winia aya̱shrui̱ naṉkaamas nekaawarat tusan wakerajai. 21Wíji̱a̱i̱ṉkia ju̱ nuṉkanam iwiaaku pujakun aya Krístunak enentáimtakun pujajai. Tura jákatniusha ju̱i̱ pujajnia nuna naṉkaamas péṉkeraiti. 22Ju̱ nuṉkanam pujakun Uunt Jesusnan takasminiaitjiai. Nu asamtai tunatsuk achiktaj nékatsjai. 23Wíji̱a̱i̱ṉkia itiurchataiti mai̱ achiktin. Jákatniuncha wakerajai Krístuja̱i̱ tsaniṉkian pujustaj tusan. Wíji̱a̱i̱ṉkia nu imiá péṉkeraiti. 24Túrasha atumín yáiṉtaj tusan tuke ju̱ nuṉkanam iwiaaku pujusminiaitjiai. 25Kame tuke pujustatjai nékajai. Núnisnak atumji̱a̱i̱ pujakun Yus nekas enentáimtakrum naṉkaamas warakrum tuke katsua̱ruk tusan yáiṉtatjarme. 26Nu asamtai wi atumji̱a̱i̱ pujakui Jesukrístu yumiṉsarum shiir warastatrume.
27Kristu chichame̱ tí peṉker asamtai atumsha aya péṉkera nuke túratarum. Wi atumji̱a̱i̱ pujaknasha tura yajá pujaknasha átum ti shiir túrarmena nuna antuktinian wakerajai. Ashí shuar uwempratin chichaman nekaawar umirkarat tusarum chikichik enentáiji̱a̱i̱ kakaram ajastarum. 28Atumí nemasri̱sha ishichkisha sapijmiamtikramkara̱i̱ṉ. Nu túrakrumin nu shuar emesratniunam weena nusha tura átum uwempratniusha paant nekanattawai. Núnisaṉ atí tusa Yus túraiti. 29Krístunu asarum Ni nekas enentáimtustinniasha tura Niniu asarum wáitsatniusha Yus anenma asa tsaṉkatramkaitrume. 30Yus Chicham pamparat tusar mái̱ metek ti takáa asar wáitiaji. Wi nuik ti takasmaj nu nekamarme. Tura yamái tuke takaaj nusha ántarme.
Currently Selected:
Jir. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.