Jut. 1
1
Jútas Yus shuaran papin áatramu
1Wi Jútas Jakupu yachi̱ntjiai. Jesukrístu takarin asan ashí Yus Apa ni shuari̱ átinian achikma ainia nuna ju̱ papin áateajai. Jesukrístuja̱i̱ tsaniṉkiaru ásarmatai Yus nin wainiainiawai niji̱a̱i̱ kanakchatniun. 2Yus ti waitnentramak imiatkinchanum tuke shiir pujustinian yaintmakarti. Ti anenma asa túrati.
Ti tunáa shuar írunui
(2 Pit. 2:1-17)
3-4Aneamu yatsuru, iikia mái̱ metek Yus shuar asar ju̱ uwempratin chichaman áatratniun wakerukjarme. Túrasha ti yajauch shuar anaṉkramawar atumíin pachinkiarmai. Nisha “Yus ti anenkartin asamtai páchitsuk tunáa túramniaitji” tuíniawai. Nu arantcha Yus iin Akuptámniuncha tura ii Uuntri̱ Jesukrístuncha nakitín áiniawai. Nu asamtai nu shuaran “yaunchu sumamawaruiti” tímiayi Yus. Tuma asamtai tájarme “Tuke Yus chicham yapaji̱áshtinian ashí Yus shuar akasmatkarat tusar susamuiti. Wátsek, kakaram ajastarum” tájarme.
5Yaunchu Uunt Yus Israer shuaran túramia nu nékarme. Nuna atak enentáimtikratjarme. Ejiptunmaya̱ júkiar Nin nekas enentáiji̱a̱i̱ enentáimtuscharuṉka Yus amukármiayi. 6Nayaimpinmaya̱ suntarsha ni pujutái̱ri̱n ajapa ikiukiar Yus susamun umitsuk iniaisarmiayi.Naṉ. 6:1-2 Túrawarmatai Yus kiritniunam jiruja̱i̱ tuke jiṉkiá sepunam apujas pujuráiniawai.1 Pit. 3:19-20; 2 Pit. 2:4 Tura Uunt Tsawant jeamtai súmamtikiawartatui. 7Núnisaṉ Sutumasha Kumurasha tura tíjiu̱ch péprusha áishmaṉja̱i̱sha nuwa̱ja̱i̱sha ti yajauch nuamtak tsanirmanainiakui ti tunaan peṉké túrachmin ana nunasha túrin ármiayi. Túmainiakui ashí shuar ashamkarat tusa Yus amuicha jinium asutiáwarmiayi.
8Ayu. Atumíin yajauch shuar ainia nu, yaunchu túrunamun enentáimtsuk tuke yajauch enentáimiainiak ni aya̱shin yajauch awajmamainiawai, Yusnasha nakitiáiniawai, tura ashí akupin ainia nunasha yajauch áujmatainiawai. 9Antsu Mikiair, nayaimpinmaya̱ suntara kapitiántri̱ntiat, iwianchji̱a̱i̱ mániak Muisaisa aya̱shi̱n akasmatak “ániumsha” tu chicharkachmiayi. Antsu áyatik “Yus iirmasti” tímiayi. 10Túrasha ju̱ shuarka nékainiatsna nuna náṉkamas yajauch chicharainiawai. Tura nékainiana nuka ya̱wá̱ áinis enentáimtsuk áyatik nékainiawai. Tura núja̱i̱sha imia niṉki yajauch emesmamainiawai.
11Maa, aneararti. Kain yajauchin túramia núnis tura ásar jákartatui. Tura Paraama áinis kuítian ti wakeruiniak imia niṉki tunaanum tsaṉkamakaru áiniawai. Tura Kurái áinis ashí akupniun nakitín áiniak kajinkiartatui. 12Átum nuamtak anenaitiai namper nájankurmin nu shuar chikichan enentáimtutsuk Yusnasha ashamtsuk imia niṉki enentáimtumainiawai. Peṉké ántar áiniak yumi kia̱r tee ajasua núnin áiniawai. Tura nase umpuim yútutsuk naṉkaamainiawai. Árak nerektin nantutin nerechua ánin áiniawai. Tuma ásar uwemu peṉké jaka ánin áiniawai. 13Entsa nujaṉkrak sáuri̱n ajekeawai. Nu shuarsha núnisar ni natsantrí̱n natsaamtsuk ajekénawai. Tura yaa waakua ánin áiniawai. Tuma ásar nekas kiritniunam tuke meṉkakatin áiniawai.
14Ataṉka tiraṉki̱yayi Enuk. Ti peṉker Yúsnan etserin asa ju̱na tímiayi “Uunt Yus ti untsurí ni shuari̱ji̱a̱i̱ winittiawai. 15Nuyá̱ ashí shuar túrawarman nekaattawai. Tura ashí yajauch shuarnasha ti tunáa túrawarua nuja̱i̱ tura Yusan yajauch áujmatsarua núja̱i̱sha súmamtikiawartatui” tímiayi Enuk. 16Nu shuarka péṉkera nuja̱i̱ waratsuk “yajauchiti” tuíniawai. Aya ni aya̱shí̱ wakeramunak wakeruiniawai. Naṉkamantu enentáimtumainiak chichainiawai. Tura chíkich shuaran shiir chicharainiaksha aya ni wakera nuna túrutati tusa péṉker chichainiawai.
Yus shuar enentáimtikratin
17Tura atumsha, aneamu yatsuru, ii Uuntri̱ Jesukrístu akatrámuri̱ yaunchu “aneartarum” tiármiania nusha enentáimtustarum. 18“Amúamu tsawant ishichik ajatésmatai shuar Yúsnan wishikrar nakitrartatui. Tura ni yajauch wakeramuri̱niak umíi pujuartatui” tiármiayi. 19Nu yajauch shuar atumín akantamenawai. Ju̱ nuṉkanmaya̱nak páchiniak Yusa Wakaní̱n takakainiatsui.
20Tura átumka, aneamu yatsuru, tuke Yus nekas enentáimtusrum kakaram ajastarum. Yusa Wakaní̱ kakarmari̱ji̱a̱i̱ ashí Yus seatarum. 21Yus ti anenmakui ni wakera nu wakeruktarum atumsha. Túrarum ni anenmamu shiir nekaattarme. Tsawant winiawai, ii Uuntri̱ Jesukrístu iin waitnentrama asa tuke shiir Niji̱a̱i̱ pujustinian amastatji. Nu tsawant naká pujutarum.
22Mái̱ yapaji̱ ajá ainia nu naka enentáimtikratarum. 23Chíkich shuarsha jiniumia̱ júsatniua áitkiasrum uwemtikratarum. Tura chikitcha ti yajauch ásarmatai anearum waitnentratarum. Tura ni pushirí̱sha ni tunaari̱ji̱a̱i̱ maatra asamtai muíjkiatniuiti.
Yusan shiir awajeawai
24-25Yus chikichkiti. Ti nékaiti. Iin uwemtikkiartin asa ni kakarmari̱ji̱a̱i̱ yaintmakminiaiti tunaanum iniarchatniun. Tuma asa tunaaja̱i̱ máatrachu awajtámas ni ti shíirmari̱n ejetamtatrume. Túrutma ti waramtikramsattarme. Ii Uuntri̱ Jesukrístu túrunamuja̱i̱ Yuska Niṉki shiir awajsatniuiti tura naṉkamantu enentáimtustiniaiti. Yáunchusha, yamaisha, tura tuke ashí akupin atí.
Núkete.
Currently Selected:
Jut. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.