Kar. 1
1
1Wi Pápruitjiai Yus akatrámu. Yusak winia akattúruiti. Shuarka akattúrchamai. Yussha chíkich shuaran akuptúrak akattúrchamai antsu Niṉki, Yus Apa, Jesusan jakamunmaya̱ iniantkímia nu, tura Jesukrístu winia akattúrarmai Yusa shiir chichame̱n etserkatniun. 2Wisha, ashí Yus shuar wiji̱a̱i̱ pujuinia nusha ju̱ papí akupeaji. Ashí Yus shuar Karaseanam pujarmena nu áujsatarum tusan ju̱ papin akuptajrume. 3Ii Aparí̱ Yussha tura Jesukrístu ii úuntri̱sha atumín waitnentramainia ásar aṉkant tuke shiir pujustinian suramsarti. 4Yus ii Aparí̱ nuna wakera asamtai ii tunaarí̱ asakártaj tusa Jesus ni aya̱shí̱n surumak wáitsamiayi. Nuna tura ju̱ nuṉkanam ti yajauch túrutai̱ ana nuyá̱ aṉkant awajtámsatai tusa túraiti. 5Tuma asamtai tuke Yus shiir atí. Nuke atí.
Chíkich uwempratin chichamka atsawai
6Maa, nekasash timiá wárik Yus ikiukmiarum. Kristu iin ti anenma asamtai Yus ni shuari̱ ajastinian iin anaitiamkamji. Urukamtaitsuk nuikia imiá wárik ni chichame̱ iniaisámarum nusháa chicham umikrum uwemprataj tusarum. 7Wátsek, nekas chíkich chicham peṉké atsawai shuar umikiar uwempratin. Antsu yajaya̱ shuar atumíin taar péṉkercha awajtámainiawai. Tura nusháa chichaman etserkar Yusa shiir chichame̱n yapaji̱átniun wakeruiniawai. 8Tuma asamtai Yus nin yajauchiniam yumiṉkrattawai. Wisha Yus Chicham yapaji̱ámun etserkamtaiṉkia Yus winia yumiṉkrurtatui. Nayaimpinmaya̱ suntarsha nusháa chichaman wi etserkachmaj nuna étserkuiṉkia nunasha yumiṉkrattawai. 9Paant ujakjarme túmaitiatnak ataksha ujajrume, náṉkamas shuar niisháa uwempratin chichaman wi etserkachmaj nuna étserkuiṉkia Yus yumiṉkrattawai.
10Ti kakaram chichaatsjak. Nuna chichaakun shuar shiir enentáimtursarti tusan chichaatsjai. Antsu Yus shiir enentáimtursati tusan nuna tajai. ¿Shuar wakeruinia nuna enentáimsan chichaajak? Nuna enentáimkiunka Kristu wakera nuna umirkachaintjiai.
Papru jú̱nis Yus akatrámu ajasma
11Antsu nekaatarum yatsuru. Uwempratin chichaman wi étserjana nuka aentsnumia̱nchaiti. 12Aentska ujatkachmai. Unuitiutnasha unuitiurchamai. Antsu Jesukrístuk winia paant jintintruamai.
13Tura ii uuntri̱ yaunchu tiarmia nuna yawe̱tsuk umiktinian wi yaunchu ti yajauchin túramiaj nuka antukchakaitrum. Israer shuar Yúsnan takainia nútiksanak wisha takasmajai. Tuma asan Yus shuaran ti kajerkan tuke apapémiajai amuktaj tusan. Nusha nékarme. 14Tura kakaram ajasan ii uuntri̱ yaunchu tiarmia nuna yawe̱tsuk umiktinian ti enentáimpramjai. Tura untsurí shuaran wiji̱a̱i̱ métek uunt armia nuna naṉkaamas Yúsnan takasmajai. Túmaitiatan aya winia úuntrun chichame̱n ti umirniuyajai. 15Túrasha wikia akiintsa̱i̱ṉ Yus winia achirkámiayi tura ti aneṉkratmari̱ji̱a̱i̱ winia anaitiukmiayi. 16Nuikia shiir enentáimiuk ni Uchirí̱n paant nekamtikruamai. Tura Israer shuarchanum ni shiir chichame̱n etserkat tusa akuptúkmiayi. Tuma asamtai chíkich shuaran aniaschamjai. 17Uunt péprunmasha, Jerusaréṉnumka winí̱ émkaru Yus akatrámuja̱i̱ chichastinian wéchamjai. Antsu wárik Arapianam wémajai. Tura nui̱ Yusan enentáimtasuan atak Tamaskunam waketkimjiai. 18Tura menaintiú uwí naṉkaamasmatai, nuyá̱ Pítruja̱i̱ áujmattsataj tusan Jerusaréṉnum jeamjai. Tura jimiará semanachik pujusmajai Pítrujai. 19Tura Sántiakuncha ii Uuntri̱ Jesusa yachi̱a nuna, wainkiamjai. Nú arantka chikichnaka Yus akatrámunka wáinkiachmajai. 20Yus iirui. Wi tájana nu nekasaiti, wáitchaiti.
21Nú ukunmasha Sírianmasha, Sirisianmasha wémajai. 22Tuma asamtai ashí Krístunu ainia nu Jutanam pujuarmia nu winia nekaracharmai. 23Aya antukarmai. “Yaunchu iin ti áintrammiaj nu yamaikia Yus Chichaman étseruk wekaawai. Yáunchuka iin amutmaktinian wakeriniaitiat yamaikia iniaisaiti” tiarmai. 24Túrawar winia enentáimtursar Yusan shiir yumiṉsarmai.
Páprusha Yus akatrámu nekamu
Currently Selected:
Kar. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.