Jṉ. 20
20
Jesus nantakmia
(Mat. 28:1-10; Mar. 16:1-8; Ruk. 24:1-12)
1Tumiṉtincha káshik kirit ai̱ṉ Máktaranmaya̱ Marí Jesus iwiarsamunam íistajtsa wémiayi. Jesusan iwiarsar kaya uuntja̱i̱ wa̱a̱n atutkarmiayi. Tura Marí nui̱ jeá nu kaya uraimiun wainkiamiayi. 2Nuna wainiak Semuṉ Pítiur pujamunam tsékeṉki̱ wémiayi. Chíkich unuiniamuri̱ Jesus ti anemia nusha pujumiayi. Tura Marí chichaak “Iwiarsamunmaya̱ ii Úuntri̱n júkiarai. Tura ¿tuíntsuk ikiusara?” tímiayi. 3Pítrusha chíkich unuiniamuri̱ji̱a̱i̱ jíinkiar iwiarsamunam iyuwarmiayi. 4Mái̱ metek tsékeṉkiar Pítiur jeatsa̱i̱ṉ chíkich unuiniamuri̱ iwiarsamunam emka jeamiayi. 5Nisha waya̱tsuk tsuntsumá iis penuarmari̱ṉkia nui̱ tepan wainkiamiayi. 6Nuyá̱ Semuṉ Pítiur ukunam jeá iwiarsamunam wayá̱ penuarmari̱ nui̱ tepan wainkiamiayi. 7Chíkich tarach Jesusa muuke̱n penuarma nusha nanerma niisháa tepan wainkiamiayi. 8Nuyá̱ chíkich unuiniamuri̱ emka tamia nusha iwiarsamunam waya̱miayi. Nisha túruna wainiak “Jesus nekas nantakní̱” tu enentáimpramiayi. 9Nuna wáintsuk Yus Chichamnum “Jesus jakamunmaya̱ nantaktiniaiti” áarman áujsariat nekaacharmiayi. 10Nuyá̱ mai̱ ni je̱e̱n waketkiarmiayi.
Máktaranmaya̱ Marin Jesus wantintiukma
(Mar. 16:9-11)
11Tura Marikia iwiarsamunam juak uutu pujumiayi. Nisha útiataṉ tsuntsumá iwiarsamunam iimsamiayi. 12Tura Jesusa aya̱shí̱ nuik aepsamunam nayaimpinmaya̱ suntar jímiar puju entsaru muuknumaani̱ tura chíkichka nawe̱nmaani̱ wajainian wáinkiarmiayi. 13Nayaimpinmaya̱ suntarsha “¿Urukamtai útam?” tiármiayi. Marisha “Winia Úuntrun jurutkiarai tura ¿tuíntsuk ikiusara?” 14Tinia ayantáraj tukamá Jesusan wainiak Nin nekaachmiayi. 15Jesus aníak “¿Urukamtai útam. Ya e̱a̱m?” tutai Marisha ajan wáinniua nuiti tusa “Uuntá, ame ni aya̱shi̱ jukimkia, tui̱ ikiusmam ujatkata jurumkitiaj” tímiayi. 16Nuyá̱ Jesus “Mariyá” tutai nisha ayanmar “Rapuni” tímiayi. Nusha Israer chichamja̱i̱ṉkia “Uuntá” tawai. 17Jesussha tutai “Achirkaip. Winia Aparuí̱ tuke waatsjai. Antsu weme Wí shuar ujakárta. Winia Aparuí̱ wéajai. Nisha atumí Aparí̱nti. Winia Yúsruiti tura atumí Yúsri̱nti tawai titiá” timiayi. 18Nuyá̱ Máktaranmaya̱ Marisha Jesusa unuiniamuri̱n wainiak “Wi Úuntan wainkiajai. Nisha ju̱na mash túrutui” tu ujakármiayi.
Jesus ni unuiniamuri̱n wantintiukma
(Mat. 28:16-20; Mar. 16:14-18; Ruk. 24:36-49)
19Nu tsawantai̱ tumiṉtin ni unuiniamuri̱ Israer shuara úuntri̱n ashamainiak kashi iruntrar waiti epeni pujuarmiayi. Túrasha Jesus aya waya̱miayi. Tura ajapén wajas “Aṉkant shiir pujustarum” tímiayi. 20Nuna ti nuyá̱ ni uwejé̱n ajintruamuncha páenum ijiumuncha iniakmasmiayi. Ni unuiniamuri̱sha Úuntri̱n wáinkiar shiir warasarmiayi. 21Ataksha Jesus “Aṉkant shiir pujustarum. Winia Apar akatar akuptúkma núnisnak Wisha akatran akupeajrume” tímiayi. 22Nuyá̱ ni matsatmanumaani̱ umpuí chichaak “Yusa Shiir Wakaní̱ atumí enentái̱n waya̱ti. 23Shuara tunaari̱ṉkia átum ‘Tsaṉkurnarti’ tákurminkia tsaṉkurnartatui. Tura nu shuar ‘sumamati’ tákurminkia sumamati” tímiayi Jesus.
Tumas Jesus nantakmián wainkiamu
24Tura chikichik unuiniamu, Jímiampramu Tumas, Jesus tamia nui̱ pujuchmiayi. 25Tura ukunam chíkich unuiniamuri̱ ujainiak “Ii Uuntri̱ wainkiaji” tiármiayi. Tura Tumas chichaak “Ajintruamuri̱ wainkian uwejrun awa̱intiuatniuitjiai. Tura paenumsha awa̱intiuatniuitjiai. Peṉké jaka asamtai aya nuja̱i̱ iniantkímiun enentáimtustatjai” tímiayi.
26Chíkich tumiṉtin ataksha Jesusa unuiniamuri̱ iruntrarmiayi. Nuiṉkia Tumassha niji̱a̱i̱ pujuarmiayi. Tura waiti epenmianumaṉ Jesus wayá̱ ajapén wajas “Shiir pujustarum” tímiayi. 27Nuyá̱ Tumasan chicharuk “Winia uwejur iisam ame uwejém awa̱intiuata. Núnismek winia paerui̱ uwejém awa̱intiuam iistá. Tura arantutsuk nekas enentáimtursata” tímiayi. 28Nuyá̱ Tumas “Winia Uuntruá, nekas winia Yúsruitme” tímiayi. 29Jesussha chichaak “Winia wáitkiam nuiṉ enentáimtursame. Antsu Winia wáittsuk enentáimturaru nekas shiir áiniawai” tímiayi.
Yusa Uchirí̱n enentáimtusarat tusa papí aarma
30Aentsti tujintiamuncha Jesus túramu ti untsurí ju̱ papinium áarchamu áiniawai. Tura ni unuiniamuri̱ mash wáinkiarmai. 31Antsu Jesuska Kristu asa Yusa Uchirí̱nti tu enentáimtustarum tusan jú̱naka áarmajai. Tura enentáimtakmin Jesus ni iwiaakmari̱n yamarma nuna amastatui.
Currently Selected:
Jṉ. 20: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.