2 Pit. 1
1
1Wikia ju̱ papin aajna ju̱ Semuṉ Pítruitjiai. Jesukrístu akatrámu asan ni takarniúri̱ntjiai. Ii Yusri̱ tura iin Uwemtikramin Jesukrístu umirumna nuna atumniasha ju̱na áatjarme. Nisha ashí aentsun métekrak enentáimtin asamtai atumsha iiji̱a̱i̱ métek Niniu ajasurme. Nuka tí peṉkeraiti. 2Yus tura ii Uuntri̱ Jesussha nékarmena nú nukap nekaki̱ wéakrumin Yuska atumín tí nukap yaintmaktatrume tura ti nekas imiatkinchanum pujustinian suramsattarme. Nuna nekaan tuke núnisaṉ atí tusan wakerajrume.
Yusai̱ páchitkia átin
3Yus uunt asa tura ashí túramnia asa umirtukat tusa achirmákuitji. Ni neka asar atsumajnia nu wáinkiaitji. Yus shuarti wekasatniusha tura Nin aneatniusha ii atsumajnia nuna Yuska kakaram asa suramsaitji. 4Nisha uunt asa tura tujintkiachu asa ni chichame̱n suramsaitji. Nu chichamsha ti kakarmaiti tura tí peṉkeraiti. Nu chichamja̱i̱ atumsha atumí aya̱shi̱ yajauch wakerana nuyá̱ uwemprarum Yusai̱ páchitkia átinian suramsaitrume. 5Yus umirkarme. Yamaikia ju̱na túrataj tusarum kaka̱rtiniaitrume. Tí peṉker wekasatniuitrume. Nuyá̱ Yusna nekaatniuitrume. 6Nuyá̱ yajauch túrashtin íimiastiniaitrume. Nuyá̱ katsuntratniuitrume. Nuyá̱ Yus shiir enentáimtusrum wekasatniuitrume. 7Tura nuyá̱ ashí shuar shiir enentáimtustiniaitrume. Tura nu naṉkaamas ashí shuar aneatniuitrume.
8Ashí nu túrakrumka tura tuke túrukrum wéakrumka nakiarchattarme. Túrarum ni takatri̱ émamkesrum takastatrume. Tura ii Uuntri̱ Jesukrístu nekas nekaattarme. 9Tura nuna túruiniatsna nuka kusurua ánin áiniawai. Jesukrístu wakeramuri̱n enentáimtuiniatsui. Ni tunaarí̱ya̱ uwemprarmia nuna kajinmatainiawai. 10Tuma asamtai yatsurtiram, Yus atumín anaitiamak achirmákurmena nu tuke enentáimsarum wetarum. Túrakrumka peṉké iniarchattarme. 11Tura ii Uuntri̱ Jesukrístu uwemtikramprajnia nu, Ni tuke akupeana nui̱ nakittsuk shiir awa̱intiámattarme.
12Tuma asamtai nékarmini̱ṉ tura Yusna nekas ana nuyá̱ kanaatsrumni̱ṉ tuke enentáimtikratajrume. 13-14Nekaatarum. Wi ju̱ aya̱shin ikiuktinian jeatéma nuna ii Uuntri̱ Jesukrístu ujatkayi. Tuma asamtai ju̱ aya̱shnium pujái̱ atumín tuke enentáimpratarum tusan jintintratniuitjiarme, tu enentáimsajai. 15Tura wi jakamtai aajna ju̱na tuke kajinmatki̱i̱rum tusan wi jeajna nuna túrattajai.
Kristu naṉkamantu ajasu wainkiamu
16Ii Uuntri̱ Jesukrístu kakarmari̱ tura ni táratniuri̱ etserkamajnia nu aya aentsnumia̱ ántar chichamchauyi. Antsu imia íi ji̱ji̱a̱i̱ Uunt Jesukrístu naṉkamantu ajasu wainkia asar ujakmajrume. 17Tura Apa Yus Jesukrístun shiir waantu awajsámia nui̱ ni imiá shiir pujutái̱ri̱ya̱ chichaak “Ju̱ka winia ti aneamur Uchiruiti. Nin ti wararjai” tímiayi. 18Iisha Yus akantúkma naint tájinia nui̱ Niji̱a̱i̱ pujá asar nu nayaimpinmaya̱ chichaamu paant antukmaji.
19Tura núna naṉkaamas ti nekasa nu, Yúsnan etserin yaunchu etserkarmia nusha nékaji. Ju̱ étserma ju̱sha tsawant tsawa̱tsa̱i̱ṉ kiritniunam ji keak tsáapin awajeana áintsaṉ asamtai péṉker enentáimta asarum péṉker túrarme. Tura Kristu taa Yáṉkuam etsantea núnisaṉ atumí enentái̱n ashí paant awajsattawai. Tura nu tsawant jeatsa̱i̱ṉ nu étserma tuke péṉker enentáimtustarum. 20Tura ju̱ emka nekaatarum. Shuar aya ni enentáimmiari̱ji̱a̱i̱ṉ, Yusa Wakaní̱ji̱a̱i̱nchu, Yus Chicham urukamtai tu chicháa nuna nekaatniun jeatsui. 21Warí, Yúsnan etserin aya ní enentái̱ji̱a̱i̱ṉ peṉké etserkacharmiayi. Antsu Yusa Wakaní̱ ni enentái̱n útsuam Yusna nuna etserkarmiayi.
Currently Selected:
2 Pit. 1: jiv
Highlight
Share
Copy
Want to have your highlights saved across all your devices? Sign up or sign in
©2009 Avant Ministries in cooperation with Wycliffe Bible Translators, Inc. All rights reserved.