YouVersion Logo
Search Icon

San Lucas 24

24
Jesús fiodaillamona jillua rafue
(Mt 28.1-10; Mr 16.1-8; Jn 20.1-10)
1Domingo jitɨramo monaidemo, naie rɨñonɨaɨ raɨafomo jaidɨmacɨ, iñaiñuaɨ fɨnoca soride rana uillena. 2Raɨafo ɨbailla nofɨcɨ oni joillana cɨodɨmacɨ. 3Fo jaidemo, Jesús abɨna cɨoiñedɨmacɨ. 4Uainicaidɨmacɨ. Ieconi menamɨe naiñaiñuaɨ ecɨmo bairedɨiaɨmaiaɨ. Iaɨmaiaɨ ɨniroi eo quenirede. 5Iaɨmaiaɨna jacɨnaillamona, ɨfogɨ ana jɨtadacaidɨmacɨ. Naie iaɨmaiaɨ dɨnena jɨcanote:
—¿Bue ñellena fiodaitɨmɨe illanomo cajedɨmɨena jenodomoɨ? 6Galileamo navui naimɨe omoɨmo llogacɨnona comecɨñedomoɨ. 7Naimɨe raite: “Monamona billanona, ɨimana jaidɨcue. Jusiñamui jitailla jira, maraiñede rafue fɨnoraɨnɨ anamo iitɨcue. Cuena coraɨitɨmacɨ. Darui amani illanona, fiodaillamona jilloitɨcue” raite.
8Iemona ie llogacɨnona jai comecɨtɨmacɨ. 9Raɨafomona abɨdo jaidɨmacɨ. Ie once llofueoicaiganomo naiñaiñuaɨ cɨua rafuena llotɨmacɨ. Naie llofueoicaigano dɨga itɨnomo jɨaɨ llotɨmacɨ. 10Naie rɨñonɨaɨmona María Magdalena ite. Juana ite. María ite. Naiñaiñodɨ Jacobo ei. 11Naie rɨñonɨaɨdɨ iena llotɨmacɨ; iadedɨ ie rafuena cacadɨnodɨ iena ɨɨnoñedɨmacɨ.
—Jamaifuena ñaɨtomoɨ —raitɨmacɨ.
12Iena cacajano, Pedro aisɨcana raɨafomo jaide. Nainomo ria, ana jɨtadacaida, fo erodate. Useroi joillana cɨode. Iemo ie comecɨna facajano, jofomo abɨdo jaide.
Mena llofueoicaiganomo Jesús bairia rafue
(Mr 16.12-13)
13Jesús jilluarui mena llofuega iaɨmaiaɨ Emaús railla naɨraɨmo jaidɨaɨmaiaɨ. Jerusalémona nɨbaɨ once kilómetros ite. 14Nana Jesúmo suide rafuena ñaɨano jaidɨaɨmaiaɨ. 15Iaɨmaiaɨ ñaɨanona, Jesús iaɨmaiaɨ dɨga dafaɨfillanona, iaɨmaiaɨ dɨga jaide. 16Jusiñamuidɨ iaɨmaiaɨna naimɨena uiñotañena jira, naimɨena uiñoñedɨaɨmaiaɨ. 17Iaɨmaiaɨmo Jesús jɨcanote:
—¿Buena ñaɨtomɨco? —Ieconi naidadatɨiaɨmaiaɨ. Sunaitɨiaɨmaiaɨ. 18Naie iaɨmaiaɨmona damɨedɨ Cleofas. Naimɨe uai ote:
—¿Nɨese Jerusalémo birui suide rafuena uiñoñedɨo? Nɨbaɨ como ridɨo. Nana jɨaɨ comɨnɨ iena uiñotɨmacɨ.
19Uai ote:
—¿Nɨe isoide rafue suide?
Uai otɨiaɨmaiaɨ:
—Nazaret ie Jesús rafue. Naimɨedɨ Jusiñamui facaina lloraɨma. Dɨga siño rafuena fɨnode. Comɨnɨna raise llofuete. Jusiñamuimona naimɨedɨ maremɨe. Comɨnɨmona naimɨe maremɨe; 20iadedɨ caɨ illaɨcomɨnɨ naimɨena gaɨtatatɨmacɨ. Naimɨena cruzmo coraɨtatɨmacɨ. 21Jusiñamui naimɨe caɨ dɨne orecamɨemo comecɨna facadɨcoco. Naimɨe caɨ illaɨmana illemo ocuiridɨcoco; ia naimɨe jai fiodaite. Naimɨe fiodaillamona darui amani jai ite. 22Caɨ comɨnɨmona dajerie rɨñonɨaɨbirui caɨna jacɨnaitadɨmacɨ. Jitɨramo Jesús raɨafomo jaidɨmacɨ; 23iadedɨ naimɨe abɨna cɨoiñedɨmacɨ. Abɨdo naimacɨ bia: “Jusiñamui jaɨenisaɨna cɨodɨcaɨ” raitɨmacɨ. Naie jaɨenisaɨ naimacɨmo llote: “Naimɨedɨ caje”. 24Iemei caɨmona dajerie raɨafomo jaidɨmacɨ. Rɨñonɨaɨ llua isoi cɨodɨmacɨ. Jesús abɨna cɨoiñedɨmacɨ.
25Jesús dɨnena uai ote:
—Abɨ uiñoñedomɨco. Nana Jusiñamui facaina lloraɨnɨ mɨcorɨaɨ cuegafuiaɨna ɨɨnoiacaiñedomɨco. 26Cristo duere sefuillena cuetɨmacɨ. Jusiñamui iena jitaillena cuetɨmacɨ. “Naimɨe nia illaɨmana jaiñenia, duere sefuite” cuetɨmacɨ.
27Iemei Jesús iaɨmaiaɨna llofuete. Moisés mɨcorɨ cuegafuiaɨna llofuete. Jusiñamui facaina lloraɨnɨ mɨcorɨaɨ cuegafuiaɨna jɨaɨ llofuete. Nana Cristona cuegafuiaɨna llofuete.
28Emaús dɨne iaɨrei naimacɨ ria, Jesús nia jaiacademo, 29naimɨena caidɨdɨaɨmaiaɨ. Raitɨiaɨmaiaɨ:
—Coco dɨga fɨebi. Jitoma jai ana ite. Jai abɨ juanide, nia o jaillena. —Ie muidona iaɨmaiaɨ dɨga fɨebillena fo jaide. 30Naillɨ guitɨmacɨmo, llomenicona Jesús llɨnuano, Jusiñamuimo iobillacɨnona fecade. Iena taɨruano, iaɨmaiaɨmo fecade. 31Jusiñamui jitailla jira, ieconi Jesúna uiñotɨiaɨmaiaɨ. Iemei iaɨmaiaɨmona naimɨena jai cɨoicaiñena. 32Daɨmaiaɨ ñaɨtɨiaɨmaiaɨ:
—Coco dɨga naimɨe ñaɨa, coco comecɨ caɨmare ite.
33Naie dacaiño Jerusalémo abɨdo jaidɨaɨmaiaɨ. Jesús llofueoicaigano naimacɨ nabaiñɨaɨ dɨga danomo illana baitɨiaɨmaiaɨ. 34Iaɨmaiaɨmo llotɨmacɨ:
—Caɨ Nama fiodaillamona jai jillode. Simón Pedromo jai bairede.
35Ie mei naɨsona iaɨmaiaɨ jailla rafuena llotɨiaɨmaiaɨ:
—Caɨ guitɨcaɨmo, naimɨena uiñotɨcoco —llotɨiaɨmaiaɨ.
Jesús ie llofueoicaiganomo bairia rafue
(Mt 28.16-20; Mr 16.14-18; Jn 20.19-23)
36“Jesúna cɨodɨcoco” llotɨiaɨmaiaɨmo, ie llofueoicaigano motomo Jesús bairede. Llote:
—Jai bitɨcue. Uri omoɨ i.
37Naimɨena cɨuamona, jacɨnaitɨmacɨ. “Joreñona cɨodɨcaɨ” comecɨaɨna facajanona, jɨaɨ jacɨruitɨmacɨ. 38Naimacɨmo Jesús jɨcanote:
—¿Bue ñellena jacɨruitomoɨ? ¿Bue ñellena cue bene illana ɨɨnoñedomoɨ? 39Cue onollɨmo eruaɨ. Cue eɨllɨmo eruaɨ. Jesúdɨcue. Cuena jeta, raise uiñollena. Cuemo llɨcɨsi ite. Cuemo illaicɨ ite. Jamai joreño isoiñedɨcue.
40Iena llua mei, coraɨafona naimacɨ cɨoillena, ie onollɨ ie eɨllɨ dɨga acatate. 41Iobiacadɨmacɨ; iadedɨ nia raise ɨɨnoñedɨmacɨ. Iemo comecɨaɨna nia facadɨmacɨmo, naimacɨmo jɨcanote:
—¿Bue illa, cue guillena?
42Naimɨemo janorede jai ruica llɨcɨaɨna fecadɨmacɨ. 43Iena feiñuanona, rɨte. Iena cɨodɨmacɨ. 44Naimacɨmo llote:
—Navui omoɨ dɨga cue ia, dɨga rafue omoɨmo llotɨcue. Moisés mɨcorɨ cuena cuete. Jusiñamui facaina lloraɨnɨ mɨcorɨaɨ cuena cuetɨmacɨ. Jusiñamui jitailla jira, iena jai suide.
45Naie facaiseconi naimacɨna naie cuegafuiaɨna raise uiñotade. 46Naimacɨmo llote:
—Jusiñamui facaina lloraɨnɨ mɨcorɨaɨ cuena jaie cuetɨmacɨ: “Cristo duere sefuite. Fiodaillamona darui amani illanona, jilloite. 47Naimɨe muidona comecɨaɨ iuai meiduamona, Jusiñamui naimacɨ jeacɨnona oni dotaite. Naimɨe rafue nana naɨraɨmo damɨerie lloitɨmacɨ”. Omoɨmo biena lloitɨcue. Cue rafuena llollena, Jerusalémo taɨneitomoɨ. 48Bie rafuena cɨodomoɨ. Iena lloitomoɨ. 49Ero, navui naimɨe llua isoi, cue Moo Joreño omoɨ dɨne oretaitɨcue. Jerusalémo fɨebi, naimɨe Joreño omoɨ feiñolle dɨnori. Cue rafuena omoɨ llollena, naimɨe Joreño omoɨ comecɨaɨna ocuiñotaite.
Jesús monamo jailla rafue
(Mr 16.19-20)
50Betania railla naɨraɨ dɨne Jesús naimacɨna ɨfode. Marecɨnona naimacɨmo llote.
—Jusiñamui omoɨna raise marena canoite —llote. 51Iena naimacɨmo lluanona, monamo jaide. 52Jerusalémo eo caɨmare abɨdo jaidɨmacɨ. 53Jusiñamuimo iobillacɨno fecajano, Jusiñamui jofomo nagarui itɨmacɨ. Mai. Macaɨbaite. Lucadɨcue.

Currently Selected:

San Lucas 24: huu

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy