TITO 1
1
1Inê Paulo. Inê na kariana God, ma kê aposotolo iana o Jesu Kirisito.
God ki bani ateê, ma ki bani hagatorangeniê, hanana gê hagagatagatanira na kariana God igê na tongesuriha, ma kê hagesurira renia na monariha igê na rotu iaka. 2Na hunana na rotu iaka ki na mêriha mora ma tarema, igia ga naasia. I nago kere vê noga God ki bani surua tangagia, vi vategia na mauriha ngekana. Ma God ki asa hagetage, vi ge hagaparu. 3Ma igê na matena tanga ngaia ki bani hagagiraragia renia igê na taroha iana. God, na Hagamauri iaka, ki bani hagêguriê renia na taroha ngekana, ma inê kê tarohenia.
4Inê kê sege tangago, Tito. Igo ki no kareku monari igê na tongesuriha, garu tage nahunia.
Inê kê nunginungi, hanana God Vaemana mo Kirisito Jesu, na Hamauri iaka, karu korokoro tangago, ma karu vatego na marapeha.
Na tagaraha iana o Tito i na marê i Kerete
5Inê kê panigo so i Kerete, hanana go hagagaragi na ani, ga mamêngagi na marâ, ma ko kasira na meraha igê na rotu i na ara ni hinua. Go arâ surigi na marâ, gê bani visigi tangago. 6Na meraha igê na rotu ki tuguhia, ki ototo na parongana igê na ara ni marâ; ki auragia ma na gete gi tage togo; ga tongesuri na karena, ma siana ka gâga sutaga, se vi ga guguruga ngavê. 7Renia na meraha igê na rotu ki marupea na tagaraha iana God, tahema i tuguhia, vi ototo na parongana igê na ara ni marâ. Siana ki mepara na tauhana so marena, se i bagamangamangariaga, se vi na mane ni tonoha, se i bagananahu, se i hagatage haga. 8Ki tuguhia, i manatangenira na enoni, ma ki ageage renigi na tarani, ga koro. I bâbâ tarana, ki ototo, ki hanetasia God, ma ki hagaotoa marena. 9I gatagata igê na morana na taroha na hagesuringa, i arâ suria na hagesuringa iana o Kirisito. Igê na tarana ngekana ngaia ki girara, i hagaramonira na enoni getera renia na morana na hagesuringa. Ma nikâ ngaia ki hagagirarara na enoni, ga kitenia na hagesuringa ngekana, vi ngaira ka râ tasi.
Na enoni ni hagesuringa hagaparu
10Suria ga rako na enoni, ga guguruga, ma ka hagaparura na enoni getera renigi na tamasinga bekabekaga iata, ma ngaira nga na Siu kirisitiano kaniga kato vikana. 11I araria, vi ga hagamunira, siana ka tamasi, renia ga hagaerasigi na mêrihata na ahemata hagenani renigi na hagesuringa era iata, suria ngaira ka hagatage haga. Ki ararira, ga maki renia. 12Ta na mane ni Kerete, na hitangita na poropete iata so nga mareta ngaia ki vi koro, vi: “Na Ai ni Kerete ka hagahagaparu tare; ga mangara na o garagara; ga marusi era ngavê, ma ka ngêngê papasi tare.” 13Ma na marâ, i visia, ki monari. Tahema i tuguhigo, vi go ramonira nga, hanana ga page nahunia na tongesuriha monari, 14ma ka kasigi râ na sihonga babanga iata na Siu, ma na ramata iata na enoni, ga kitenia na monariha. 15Na ara ni marâ, ga matarotaro, ka tangara na enoni ga matarotaro nogata. Ma na ara ni marâ, ga pe matarotaro, ka tangara na enoni, ga pe matarotaro nogata, ma ka pe tongesuri, suria ga pe matarotaro na parongata ma na aitangihata. 16Ngaira ka vi, vi ngaira ka girara God, ma na tauhata ka hagabângenia, vi ngaira ka pe girara. Ngaira ka hagamakuku, ma ka guguruga, ma ki pe ararira na ani mavê na marâ koro.
Currently Selected:
TITO 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific