SIRAKE 1
1
Na aitangisiha ki na mahatanga i râ me tenia God
1Na ara ni takoha mataha hato ka râ me tenia na Araha.
Na takoha mataha ki oga hagahu henia.
2Ti ki girara i tomanigi na êsusu na rangi,
se na one i one,
se na tangiani igê na matena i asa vige page hato?
3Manga i he kani kerekê noga na vavearo?
Manga i he kani aberabera na maveta?
Manga i he kaniga vato ngavê na rutuni ni asi?
Ti ki girara i aramigi na hagatenga ngegana?
Ti ki girara i aitangisia na takoha mataha?
4Na takoha mataha ki bani vora me
i nago tarani na ara ni marâ hato.
Na aitangisiha ki bani oga me tare.
5Na hunana na takoha mataha
ka na tamasinga iana God raramohaga hunia.
Na tarani iana na takoha mataha
ka na ramata ga tâtâ tonge tare.
6Ti ki bâsia na vagana na nahu otona na takoha mataha?
Ti ki aitangisia ngavê na parongana?
7Ti ki aitangisia na giraraha iana na takoha mataha?
Ti ki girara na aitangisiha iana i raha teha ngavê?
8Na vere tage ma kani tako mataha
ma ki tuguhigia viga hagahigasia ngavê.
Ngaia ki oga igê na atohana.
9Ngaia ka na Araha.
Ngaia nga kani hagavora na takoha mataha.
Ngaia ki hahariria ma ki hagakitakita
ma ki katoa ki angarira na ara ni marâ hato i hagavorara.
10Ngaia ki haganahunira na ara ni enoni
renia na takoha mataha manga hanana i obania.
Ngaia ki katoa ki angarira na ani ga takuia.
Na hagahigasiana God ma na takoha mataha
11Manga go hagahigasia na Araha,
na enoni ka page kasigo akê,
ma igo ko page ageage.
Na hagahigasiana na Araha
ki na rêni ni vagevageha ma na obakoroha tangago.
12Na hagahigasiana na Araha ki hagakoro obamu ngavê.
Ngaia ki page katogo ko vagevage ma ko mauri arihu.
13Tanga na enoni i hagahigasia na Araha
na ara ni marâ ka page tavoraha bâkoro tanga,
ma igê nikâ na tangiana i meme igê.
God ki page korokoro tanga matena i meme.
14Na hagahigasiana na Araha
ka na haganegahana na takoha mataha.
Tangara na enoni ga tê viteana God
God ki hagavorea henira i obata kenata.
15Ngaia ki bani oga me henira na enoni
i nago kerevê noga ma ki gâga hagahu,
ma na apaparaha i muri me ka page hagêguria.
16Na hagahigasiana na Araha
ngaia ka na morana na takoha mataha.
Ngaia ki hagatogo obata na enoni
renigi na mahatanga iana.
17Ngaia ki hagavunusigi na ruma iata renigi na marâ manimani
manga i bêbagi igê na ngêra mora i mu iana.
18Na hagahigasiana na Araha ka na takana na takoha mataha.
Ngaia ki takataka renirerua na marapeha ma na apekoroha.
19Ngaia ki rangirangi renirerua na giraraha ma na aitangisiha.
Ngaia ki katogi ka ama ni rongo raha nga
na atata na ani ga aganaria.
20Na hagahigasiana na Araha ka na vagana na nahu otona na takoha mataha.
Na arani ka na mauriha arihu.
21Na hagahigasiana na Araha ki paigi hura na tasi.
Na agua i gâga igê ngaia ki tarigenia râ na mangariaganiha.
22Na enoni i mangariaga purupuru
ngaia ki hagaratena marena ki votavota.
23Na enoni hatara ki piringape rârâ
mataro me na vagevageha ki tarahua.
24Ngaia ki munimuni
mataro me na matena i araria vi tamasi igê
ma na enoni ka page kasia akê renia na aitangisiha iana.
25Na takoha mataha ki nahunia na kiboru
i vunu renigi na tamasinga ni aitangisiha.
Ma na enoni tasi ki asa rârâ vige page nahunia ta na marâ,
nga noga ma na ruhiana na hagahigasiana na Araha.
26Manga go tangasia na takoha mataha,
go marupegi na ramata iana na Araha,
ma ngaia ki page haganahunigo renia na takoha mataha
i aharêsigo ngavê.
27Na hagahigasiana na Araha ka na takoha mataha ma na hagaotonga.
Na enoni i tototo suria na Araha ma ki haritagi
ngaia nga kani hagakoro obana na Araha.
28Siana ko usisi vigu hagahigasia na Araha igê na ogaha iamu.
Go hagahigasia hete i mêrihamu hagenani.
29Siana ko tamasi igê na rogaroga purua ma i maata na enoni.
Go tamasi igê hete na monariha.
30Siana ko hagarahasigo maremu,
i era ma ko vota ma ko maki.
Na Araha ki page ranganigi na marâ ga pinihi igê na aitangihamu
ma ki page hagamakigo i maata na enoni hato i ruma ni sukuru,
suria go pe râ me i ngekana hanana vigu hagahigasia na Araha
ma hete go hagahigasigo igo maremu ma,
suria go obania ma vigo hagabekasira na enoni ka hagarahasigo.
Currently Selected:
SIRAKE 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific