ROMA 1
1
1Inê Paulo, na kariana o Kirisito Jesu. God ki ateê, kê aposotolo, ma ki hagatorê, kê tarohenia na Taroha Koro iana.
2I nago vê noga God ki bani surua na Taroha Koro, matena i tamasi i harata na poropete iana, ma ka segea so igê na Buka Apuna. 3Na Taroha Koro ngekê ki tamasi renia o Karena God, na Araha iaka o Jesu Kirisito. Renia ngaia ki enoni, ngaia ki na raraha iana o Tavite. 4Ma suria ngaia ki râ me tenia God, God raramohaga hunia ki hagabângenia, vi ngaia ki no Karena, suria ngaia ki hagamêria aporo tenira na enoni, ga bani me. 5God ki katoa o Kirisito, ki ateê, kê aposotolo, hanana gê tarohenia o Kirisito, ma kê bêngenira na enoni hato i maveta, ka tongesuria ma ka têtê viteana. 6Ngekê ki vi, vi igamu nikâ mu oga i Roma, renia God ki bani ategamu, kamu vora re na kariana o Jesu Kirisito.
7Tahema inê kê segesege tangagamu hato i Roma. God ki takuigamu, ma ki bani ategamu, kamu vora re na kariana.
Inê kê nungirerua God Vaemaka ma na Araha o Jesu Kirisito, karu korokoro tangagamu, ma karu vategamu na marapeha.
O Paulo ki visia koro God
8Hoita, igê na raramohana o Jesu Kirisito inê kê visia koro God renigamu hato, renia na enoni hato i maveta ka rongoa, vi igamu kamu tongesuri. 9God ki girara, vi na marâ, gê visia, ki monari. Inê kê tagara tanga God igê na mêrihaku hagenani, suria gê ateate renia na Taroha Koro renia o Karena. God ki girara, vi inê kê takusigamu tare, 10i na ara ni mateni gê nunginungi. Inê kê nunginungi, hanana God ki hagamarumungeniê, kê vatugigamu, manga vi obania. 11Renia inê kê barigia bâraha, vi ve vatugigamu, hanana ve vategamu ta na votovoto iana na Higona Apu, hanana mu nganganihaga igê na tongesuriha. 12Se igia, igamu menê, ka henganingani: na tongesuriha iaku ki nganinganigamu igamu, ma na tongesuriha iami ki nganinganiê inê.
13Goaku igê na tongesuriha, i ararigamu, vigamu girara na tarana ikê: hagarako inê kê bani uhungia, vi ve vatugigamu, ma ta na marâ ki hagabarasiê tare. Inê kê obania, vi ve katora na enoni i pasimi, ke tongesuria o Jesu Kirisito nikâ, tagenana manga gê bani katora na enoni i pasita na enoni getera, ga pe Siu. 14I tuguhiê, gê tarohenia o Kirisito tangara na enoni hato, tangara na aiasi ma tangara na aitoro, tangara na enoni, ga hagesuri, ma tangara na enoni, ga pe hagesuri. 15Tahema inê kê hagatata, vi gê ateate renia na Taroha Koro tangagamu nikâ, igamu mu oga i Roma.
Na raramohana na Taroha Koro
16Inê kê hagêguritogo ngavê renia na Taroha Koro, suria na Taroha Koro ki asa hagetage, vi ge hagamakiê, suria renia na raramohana na Taroha Koro God ki girara, i hagatahira na enoni hato, ga tongesuri, na Siu ma nikâ na enoni, ga pe Siu. 17Renia na Taroha Koro ki hagabângenia, vi God ki katora na enoni, ka korokoro ma ka ototo i maana renia ngaia getea ma na tongesuriha. Renia na Buka Apuna ki vi, “Na enoni, God i bani katoa, ki korokoro ma ki ototo i maana renia na tongesuriha, ngaia ki page nahunia na morana na mêriha.”
Na eraha i pasita na enoni hato
18I mataha, vi God marena ki hagaitangira na enoni renigi na tasi ma na eraha iata, suria na eraha iata ka hagabarasira na enoni, ga pe girara na monariha renia God. 19God ki hagaitangira, renia i pe bara tangara, vi ge giraragi na marâ, na enoni ka girara ga giraragi renia God. God marena i bani hagabângenigi tangara. 20Haganega tenia na matena, God i hagavora igê na maveta, ki pe bara tangara na enoni, vi ge girara maninga, vi na raramohana God ki gâga tare, ma vi ngaia ki na God monari. I pe bara, vi na enoni ke giraragi na marâ renia God ngegana, suria ngaira ka bâsigi na marâ, God i bani hagavoragi. Tahema i asa hagetage, vi ge vi, vi ngaira ka pe giraragi. 21Ngaira ka girara God, ma ka usi, vi ge rahesia God, manga hanana i tuguhira, vi ga rahesia, ma ka usi, vi ge visia koro. Na takotako iata ngaira ka bekabekaga, ma ka pe takotako, ma ki bono na osuta. 22Ngaira ka vi ma, vi ngaira ka tako mataha, ma ki mareha; ngaira ka bonobonoga hete. 23Vi ge rahesia God, i gâga tare, hete, ma ngaira ka rahesigi ma na nununi na marâ, ga tahegi na enoni, na marâ ga bâ mangara na enoni, ga girara ga meme, se ga mangara na manu, se ga mangara na bo ma ta na marâ vigana, se ga mangara na ma ma ta na marâ vigana.
24Tahema God ki nakara vê, ma ngekana na teniha era i obata ka aharêsira, ma ngaira ka tatagara bera heri. 25Ngaira ka usitenia na monariha renia God, ma ka tongesuria na hagaparunga. Ngaira ka rahesigi ma ka vogasigi ma na marâ, God i bani hagavoragi, ma ka pe rahesia hete God, i bani hagavoragi na marâ ngegana. Ma ki tuguhira hete na enoni, vi ga visia raha tare God. I monari!
26Tahema God ki bani nakara vê na enoni, ma ngekana na teniha era ka aharêsira, ma ngaira ka tatagara bera heri. Na gete nikâ ka tatagara bera i pasita na tamata na gete. Vikana ki era, suria i mareha nga, vi hanana ge katoa. 27I tagenana ma, na mane ka naka, vi ge oga henira na gete, ma ka tenira bâraha ma na tamata na mane. Na mane ka tatagara bera i pasita na tamata na mane. Vikana ki era. Tahema God ki vatera na hagaitangiha, i ararira, suria ngaira ka paronga iera.
28Renia na enoni ka usi, vi ge giraragi na tarani monari renia God, God ki bani nakara vê, ka râ surigi na takotako bera iata. Tahema ngaira ka tanugi na marâ, ga apu tangara, vi ge tanugi. 29Ga aharêsira na ani mavê na eraha ma na tarani ga pe koro. Ngaira ka hagatage ma ka tokorenia na eraha. Ngaira ka hengari ngavê ma ka henahunahu. Ngaira ka heariha ma ka hagahagaparu heri, ma ka uhungia tare, vi ga erasira na enoni getera. Ngaira ka toratora tamasinga, 30ma ka tamasi erasira heri. Ngaira ka ruhia God ma ka guhaguha. Ngaira ka paroparo ma ka tamasi ka kasira akê mareta. Ngaira ka pe têtê viteata na enata. 31Ngaira ka guguruga. Ngaira ka surusuru hagaparu. Ngaira ka pe komanira na enoni ma ka pe takuira. 32Ngaira ka girara, na ramata iana God i vi, na enoni, ga katokato manga ngekana, ki ararira, viga meme. Ma henaka i manga ngekana, ma ngaira ka ama ni tanugi ma na marâ nga ngegana. Ma na marâ i era ngavê, ngaira ka vagevage renira na enoni, ga tanugi nogata na marâ era ngegana.
Currently Selected:
ROMA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific