OBATIA 1
1
1Igê na marâ, na Araha God ki hagagirara o Obatia renigi, hanana i visigi mataha renira na ai ni Etome.
Na Araha ki page hagaitangia i Etome
Na Araha ki bani hagatorangenia
na mane tora tamasinga iana
tangara na enoni, ga pe Siu.
Igia ka bani rongoa, i vi:
“Nanê, ma ke râ,
ke meraheariha na ai ni Etome!”
2Na Araha God ki tamasi, ki vi:
“Ai ni Etome, i bara tangagamu.
Na merongami ka page teharigamu.
Na enoni hato ka page ruhigamu.
3Na paroparoha iami ki bani hagabekasigamu.
Na hinua raha iami ki manga na hê meo
ma ki nganganihaga igê na hungana.
Igamu kamu tamasi paroparo, kamu vi,
‘Ti ki page teharigia?’
4Naka ma mu tagarahia na hinua iami
i haha i na agua i aheahe igê na ahetaronga,
se i vavearo i berarogani na higu,
inê nga kê okegamu vato!
Ngaia kani gê visia, inê na Araha.
5“Matena na mane hanago se na manero
ka hogegi na ruma igê na bungiana,
ngaira ka hanagogi ma na marâ, ga tenigi.
Matena na enoni ma ka hanehane na ni,
ngaira ka husigi ma ta guani.
6Ma igamu, Etome, na merongami
ka page mutegamu ngavê.
Etome, na raraha iana o Esau,
naka ma na ruruguha iami mu bani pinihigi,
na merongami ka page tarahugi ma ka page hanagogi.
7Na agua, ga suru, viga tamanigamu igê na hearihatana,
ka page hagaparugamu,
ma ka page paigamu hura tenia na apanena iami.
Na enoni, ga komanigamu,
ka page teharigamu igê na henahuita.
Na tamami, mu merabêrihu,
ka page sutasuta karigamu.
Ngaira hato ka page manavatenigamu, ka vivi,
‘E, mu vi gamu, vigamu girara bâraha,
ma i he ngaigi?’”
8Na Araha ki tamasi, ki vi:
“Na matena gê page hagaitangia igê i Etome,
inê kê page hagamesira na enoni tako mataha igê,
ma be hagamagahurugi na takoha mataha
tenia na agua ni barani ngekana.
9Na mane ni hearihatana i Temane
ka page bunubunuga ngavê,
ma na ara ni mane ni me i Etome
ka page mutemute ngavê.
10Suria mu nahuira ka me na goami,
na raraha iana o Jakobo,
ma kamu hanago tenira,
tahema ga page hagamakigamu ngavê
ma ka page mutegamu.
11Igê na matena na merongata na goami i Juta
ka hogegi na maani para ni hinua,
ka banu i Jerusaleme,
ka henahuraura na goami,
ka toregi vê na nahuninga iata
ma ka tonganigi,
ma igamu kamu ura,
kamu borebore ma.
Mu era ngavê mangara na mamahuara ngegana.
12I pe oto ngavê tangagamu,
vigamu makimaki tenira vigana
na goami i Juta,
suria i tarahura na bagabevoani.
I era ngavê na parongami!
I pe oto ngavê tangagamu,
vigamu vagevage vigana,
suria na merongata ka hagasuhia na hinua iata.
I era ngavê na parongami!
I pe oto ngavê tangagamu,
vigamu manavatenira vigana
igê na matena na mamasiaganiha iata.
I era ngavê na parongami!
13I pe oto ngavê tangagamu,
vigamu banu vigana
i hinua iata na kariaku,
hanana vigamu manavatenira
ma kamu hanagogi na nahuninga iata
igê na matena na mamasiaganiha iata.
I era ngavê na parongami!
14I pe oto ngavê tangagamu,
vigamu ahehi hekarigi vigana
igê na matangani na tara,
hanana vigamu ranguira na enoni,
ga gavagava tenia na hinua.
I era ngavê na parongami!
I pe oto ngavê tangagamu,
vigamu tagarenira vigana
igê na mamasiaganiha iata
tangara na merongata.
I era ngavê na parongami!”
Na ai ni Juta ka page teharira na merongata
15Na Araha ki vi:
“I hagarangi me noga na tangiana
inê nga na Araha kê page surira igê
na enoni hato i maveta.
Igamu na ai ni Etome,
na tarani mu katogi
ka page paririgi aporo me tangagamu.
Na marâ mu haganegagi
ka mama aporo ma me tangagamu.
16“Kariaku, ai ni Isiraele,
igê na hungana apuna iaku i Sione
inê kê bani hagatonomigamu
igê na kâkâ ni hagaitangiha raha.
Ma bâ, na enoni i maveta, ga merongasigamu,
inê be hagatonomira nogata
igê na kâkâ ni hagaitangiha,
i teharia na animi na hagaitangiha.
Ma i murina na hagaitangiha
ngaira hato ka page anu râ.
17“Na kariaku ka page tahitahi
i hungana i Sione,
i page vora aporo na agua apuna.
Na raraha iana o Jakobo
ka page nahunia aporo
na mako iata mareta.
18Na raraha iaterua o Jakobo mo Josepo
ka page mangagi na gi.
Ma na raraha iana o Esau
ka page mangagi na go, i maria.
Na gi ki page ngaugi hato na go.
Na raraha iana o Esau
ki page mamata ngavê.
Ngaia kani gê visia, inê na Araha.”
19Na Isiraelita ka page meraheariha na merongata,
ma ka page taugi na mako i Negeve,
na hungani kere banu i Etome,
na bena kereso i Sefela,
ga oga igê na ai ni Pilisitia.
Ma ngaira ka page nahunia nikâ
na hinua raha i Samaria
ma na mako i Eperaimi.
Na raraha iana o Benamino
ka page nahunia aporo kerekê i Gileata.
20Na ai ni Isiraele, ga bani henahuraura,
ka page aporo me i pasita.
Ma na mane ni me iata ka page meraheariha
na ai ni Punisia,
ma ka page parênia na mako iata
ki tariha i Sarepata.
Na enoni i Jerusaleme,
ga bani henahuraura tanga i Sefarata,
ka page aporo me nogata,
ma ka page parênigi na hinua i Negeve.
21Na mane ni me i Jerusaleme,
ga bani tehateha tare,
ka page teharia i Etome nikâ,
ma ka page marungia.
Ngaia getea nga na Araha
ki na marungiha.
Currently Selected:
OBATIA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific