LUKA 1
1
Na tamasinga tanga o Teopilo
1Teopilo koro. Rako na enoni ka bani uhungia, viga segea na sihonga renigi na tarani, ga bani akê me noga i pasimami. 2Ngaira ka bani segegi so na tarani, gami rongogi tenira na enoni, ga bani bâsigi na tarani ngegana, matena ga haganega, ma ka ateate renia na taroha koro. 3Ma inê mareku kê bani garigi maninga na tarani hato ngegana tenigi na haganegani. Vikana inê kê takusia, vi i koro, be segegi so tatage tangago, maneraha. 4Inê kê kato vikana, hanana igo ko page girara bâkoro, vi na tarani hato, go bani rongogi ngegana, ka monari.
Na angelo Gabiriele ki tamasi tanga o Sakaria
5Igê na matena iana o Herote i marungia i Galilea, ki oga i ngekana ta na mane ni vogasiha, o Sakaria na atana. Ngaia ki na hitangita na haku na mane ni vogasiha iana o Abia. Na gete iana kani ka Elisabete. Ngaia ki na gete tenia na raraha iana na mane ni vogasiha nikâ. 6Na parongaterua ki koro i maana God. Ngairerua karu râ surigi maninga na ramata hato ma na tamasinga iana na Araha. 7Ngairerua karu pe apara kare rârâ, suria ka Elisabete ki gomara, ma ngairerua o Sakaria ma ngaia karu gemêa ngavê.
8I ta na tangiana o Sakaria ki tanua na tagaraha ni vogasiha i maana God i Ruma ni Rotu, renia ki na matena iana i tanua igê na vogasiha, ga tanua i na ara ni tangiana. 9Suria na tauhata na mane ni vogasiha ngaira ka kasikasi pepa, hanana vi ga girara, o ti ki sungia na marâ, i sigini koro, igê na bea ni vogasiha. Mo Sakaria ki ura. Vikê ngaia ki banu igê na kiboru apuna i na Ruma ni Rotu iana na Araha. 10Ma ngaia ki sungia na marâ, i sigini koro, matena na hakuta na enoni ka nunginungi i Ruma ni Rotu.
11Ma na angelo iana na Araha ki vora me tanga, ma ki ura i otona na bea ni vogasiha, ga susungia igê na marâ, i sigini koro. 12Matena o Sakaria ki bâsia, ngaia ki gasuga ma ki magu. 13Ma na angelo ki vi tanga ki vi: “Sakaria, siana ko magu! God ki aganaria na nunginungiha iamu, ma ka Elisabete, kaniamu, ki page apara na kare mane tangamurua. Go hêtana nga vi o Joane. 14I page koro ngavê na obamu ma ko page vagevage bâraha, ma na enoni rako getera ka page vagevage bâraha renia, matena i voravora me. 15Ngaia ki page maneraha i maana God. Ngaia ki asa iana, vi ge tono na vaini se ta na marâ, vi ge ruguhia na enoni. Ma na Higona Apu ki page angaria, haganega tenia na matena, i voravora me igê. 16Ma ngaia ki page horogi na aitangihata rako na Ai ni Isiraele, ka aporo tanga na Araha God iata. 17Ngaia ki hagananê renia na Araha, ki ramoramo ma ki raramohaga manga o Elia na poropete. Ngaia ki page hagahakura aporo na bani enoni ma na kareta. Ngaia ki page horogi na aitangihata na enoni, ga guguruga, hanana ga paronga aporo mangara na enoni, ga râ suria na tamasinga iana God. Ngaia ki page hagarêra na kariana God tanga na râha me iana na Araha.”
18O Sakaria ki hagatea na angelo, ki vi: “Manga i he kanigê page girara, vi na tarana ngekana ki page voravora me monari? Inê kê merahaga ngavê, ma na gete iaku nikâ ki gemêa.”
19Na angelo ki arami, ki vi: “Inê ki no Gabiriele. Inê na kariana God, gê tagara tanga. Ngaia ki hagatorê, kê tamasi tangago ma kê hagarongogo renia na taroha koro ngekê. 20Ma igo ko haritohea na tamasinga iaku, i page voravora me monari igê na matena tanga. Suria igo ko haritohea, hoi, i bara tangago, vi gu page tamasi; igo ko page bibi, mataro me na tangiana i voravora monari igê na suruha iaku tangago.”
21Igê na matena ngekana na enoni ka naasia makira o Sakaria, ma ka hehagateri, ka vi: “Tanu hega kani oga arihu igê na kiboru apuna i Ruma ni Rotu?” 22Na matena i hura me, ngaia ki bara tanga, vi ge meratamasi. Tahema ngaira ka girara, vi ngaia ki rigia ta na marâ igê na kiboru apuna i Ruma ni Rotu. Ngaia ki hagarari ma tangara na enoni renigi na rimana, suria i bi.
23Bevoana ga hato na tangiani iana, i hagarahe igê na Ruma ni Rotu, o Sakaria ki aporo i pasina. 24I ta na matena i muri ka Elisabete, na gete iana, ki atui, ma ki goga ma i ruma surigi na hageha gi rima. 25Ngaia ki vi: “I ngekê na Araha ki takuiê igê na tarana ngekê. Ngaia ki tamaniê, ma ki hato, vi na enoni vi ge visiê, vi gê gomara!”
Na angelo Gabiriele ki tamasi tanga ka Maria
26Matena ka Elisabete ki obara noga surigi na hageha gi ono, God ki hagatora na angelo Gabiriele ki râ i Nasarete, i ta na hinua i Galilea. 27Ngaia ki tora tamasinga tanga ta na kere gete tatara, ga bani atengenia tanga ta na mane. O Josepo na atana na mane ngekê. Ngaia ki na raraha iana na maneraha o Tavite. Na atana na kere gete kani ka Maria. 28Na angelo ki banu me i pasina ma ki vi: “Oi, Maria, gete koro! Na Araha ki oga henigo ma ki bani hagakorogo teha!” 29Ka Maria ki tako bâraha renia na tamasinga iana na angelo, ma ki tako i obana, ki vi: “Tanu hega kani tamasi tangê vikana?” 30Ma na angelo ki vi tanga, ki vi: “Maria, siana ko magu, renia God ki bani hagakorogo. 31Igo ko page atui, ma ko page apara na kare mane, ma ko hêtana nga vi o Jesu. 32Ngaia ki page araha, ma na atana ki no Karena God na Araha raha teha. Ma na Araha God ki page hagêguria, ki maneraha manga o Tavite na êvarina. 33Ma ngaia ki page marungira tare na raraha iana o Jakobo; ma na arahanga iana ki asa hagetage, vi ge page hato!”
34Ka Maria ki vi tanga na angelo, ki vi: “Inê na gete tatara. Manga i he kanigê girara, vi voravora me na tarana vikana?”
35Na angelo ki arami, ki vi: “Na Higona Apu ma na raramohana God kani garu page angarigo. Tahema na kare, go page apara, ki apuna, ma ka page visia, vi o Karena God. 36Takusia keogamu mêri, ka Elisabete. Na enoni ka vi, vi ngaia ki gomara. Ma ngaia nogana ki bani obara noga surigi na hageha gi ono, henaka i gemêa ngavê, 37suria i mareha rârâ ta na marâ, vi ge bara tanga God.” 38Ma ka Maria ki arami, ki vi: “Inê na kariana na Araha. I koro ma, i voravora me tangê na marâ, go visia.” Ma na angelo ki râ pania.
Ka Maria ki vatugia ka Elisabete
39Igê na kere matena i muri ka Maria ki hagarurugu susu, ma ki tavoraha tanga ta na hinua igê na hungani i Jutea. 40Ngaia ki banu i ruma iana o Sakaria, ma ki tarahua ka Elisabete ma ki visia koro. 41Matena ka Elisabete ki rongoa na tamasinga iana ka Maria, na kare ki gusure i obana. Na Higona Apu ki angaria ka Elisabete. 42Ma ka Elisabete ki tamasi raha, ki vi: “Go hagâvo teharira na gete hato! Ma ki hagâvo nikâ na kare, go page apara! 43Inê kê kone. Tanu hega kani tarahuê na tarana raha ngekê. Kenana na Araha iaku ki vatugiê. 44Bâ, matena gê rongoa na tamasinga iamu, na kare i obaku ki gusure, suria i vagevage. 45Igo ko koro era, suria igo ko tongesuria, vi na tamasinga iana na Araha tangago ki page voravora me monari!”
Na ki iana ka Maria
46Ka Maria ki vi:
Inê kê visia raha na Araha
i maurihaku hagenani.
47Inê kê vagevage igê na aitangihaku
renia God na Hagamauri iaku.
48Bâ, inê na gete purua ma kê tagara tanga,
ma ngaia ki takusiê!
Ma haganega tenia i ngekê
na enoni hato ka page visiê koro.
49Renia God raramohaga hunia
ki tanugi na marâ raha tangê.
Ma ki koro na enoni hato
ka rahesia.
50Ngaia ki takuira tare, ki bê ki arâ,
na enoni hato, ga hanetasia.
51Ngaia ki hagabângenia na raramohana raha hunia,
ma ki tokorenira na enoni paroparo
henigi na katoha iata.
52Ngaia ki kasira so na maneraha
henigi na raramohata.
Ngaia ki kasira akê
na enoni purua.
53Ngaia ki votogi bâraha na marâ koro
tangara na enoni, ga matareha.
Ngaia ki hagatorangenira vê baguru
na enoni ruruguha.
54Ngaia ki hagamonaria
na suruha iana tangara na êvarika.
Ngaia ki tamanira
na raraha iana o Isiraele.
55Ngaia ki pe bonotenia,
vi ge takuira tare o Abaramo
ma na raraha hato iana.”
56Ka Maria ki oga na ararina na hageha gi oru i pasina ka Elisabete, ma hemuri ki kahu aporo i pasina.
I vora me o Joane Batisita
57I râ me na matena, i riki igê na gerina ka Elisabete, ma ki apara na kare mane. 58Na enoni i hinua iana ma na goana ka rongoa, vi God ki koro era tanga, ma ngaira hato ka vagevage henia.
59Matena na kere kare ki hato huria na tangiani ge varu, ngaira ka râ me, vi ga retea râ na gavona na varana. Ngaira ka obania, vi ga hêtana renia vi o Sakaria, na atana o vaemana. 60Ma kenana na kare ki vi: “Mareha, mareha! Na atana ka no Joane!”
61Ma ngaira ka vi tanga, ka vi: “Se, ma igo ko pe nahunia rârâ na ata ngekana igê na raraha iamu!” 62Ma ngaira ka hagarari tanga o vaemana na kare, ka hagatea renia vi na ani ta na ata kani obania, vi hêtana renia na kere mane.
63O Sakaria ki nungia ta na marâ, vi segesege igê, ma ki segea, ki vi: “O Joane ngekê!” Ma ngaira hato ka panga renia bâraha. 64Ki parama o Sakaria, ma ki girara i kahu tamasi aporo nikâ, ma ki haganega ki visia raha God. 65Na enoni hato i hinua ka konekone bâraha, ma na enoni hato i na ara ni hinua igê hungani i Jutea ka rongogi na tarani ngegana. 66Na enoni hato, ga rongoa, ka takoha renia ma ka hehagateri renia, ka vi: “Na kere kare ngekana ki page voravora renia na ta?” Suria i monari, na Araha raramohaga ki anumasia.
Na ki iana o Sakaria
67Na Higona Apu ki angaria o Sakaria, o vaemana o Joane, ma ki katoa o Sakaria ki tamasi ki vi:
68“Ge visia raha na Araha,
na God iata na Isiraelita!
Suria ngaia ki râ me,
hanana i tamanira na kariana
ma ki rupasira.
69Ngaia ki vategia na Hagamauri raramohaga,
i râ me tenia na raraha iana o Tavite,
na kariana.
70I nago vê noga ngaia ki bani surua na marâ ngekana
igê na tamasinga iata na poropete koro iana.
71Ngaia ki bani surua, vi hagatahigia tenira na merongaka
ma tenia na raramohata na enoni hato,
ga kitenigia.
72Ngaia ki bani vi, vi takuira na êvarika
ma ki hagamonaria na suruheri apuna iana.
73Ngaia ki bani naka na suruha tanga o Abaramo,
na êvarika.
Ma ngaia ki tohe renia ma ki suru gatagata,
74vi ngaia ki hagatahigia tenira na merongaka,
hanana igia ka rahesia puruguni.
75Ge paronga koro ma ototo i maana
suria na mêrihaka hagenani.
76Ma igo, kareku, ka page visigo,
vi igo ka na poropete iana God,
na Araha raha i teha.
Igo ko page hagenago tarana na Araha,
hanana go hagarêa na tara tarana na Araha.
77Ma igo ko page hagarongora na kariana na Araha,
vi ngaia ki page hagatahira
ma ki page bonotenigi na tasi iata.
78Suria na God iaka ki takuigia bâraha,
ma ki marupegia bâkoro.
Manga na kahuagana mave ki mavesia na maveta,
ngaia ki page mavesigia
renia na taroha na vuripusiaka.
79Ma ngaia ki page mavesira na enoni hato,
ga magutenia na roto na mera,
hanana i hagaotogia
suria na tara tanga na marapeha.”
80Na kare ki raha, ma ki ramo na apena, ma ki gatagata na takoha koro igê na aitangihana. Ngaia ki oga igê na manihê, mataro me na tangiana i arâ me mave igê i pasita na Ai ni Isiraele.
Currently Selected:
LUKA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific