RAMATA 1
1
NA BUKA NA RAMATA
Na haganegahana na buka ikê
1Igê na buka ikê ka goga igê na ateateha iana o Moise tangara na Isiraelita, matena ga oga igê na bagamasusu raha kerekê i ve i Jotano. Ngaira ka oga igê na maruguna i ve i Jotano, hagarangia i Supu, i berarogani na hinua i Parane i tapanena, ma na hinua i Topele, i Labani, i Gaserote ma i Tisahaba i tapanena. 2(Tenia na hugana i Sinai tanga i Katesi Baranea ki vora na tangiani tangahuru matare tage, manga viga aharêvoro i Etome.)
3Na tangahuri harisi ge he ka bani hato i murina na matena na Isiraelita ka pania i Esipito. Ki na tangiana hagenago igê na tangahuruta matare tage na hageha. Igê na tangiana ngekana o Moise ki hagarongora igê na enoni renigi na ara ni marâ, na Araha ki bani bonasia renigi. 4Ngaia ki tamasi tangara i murina na Araha i teharirerua igê o Sigone na maneraha i marungia i Geseboni, ma o Ogo na maneraha i Basani, i marungirerua na hinua i Asatarote me Eterei. 5Matena na Isiraelita ka oga kerekê i Jotano i na apanena i Moaba, o Moise ki haganega ki ramatenigi igê na ramata ma na hagesuringa iana God.
6Ngaia ki vi: “Matena igia ka oga i hungana i Sinai, na Araha God iaka ki vi tangagia, ki vi, ‘Igamu kamu oga ki arari noga i na hungana ikê. 7Mu aharaga ma kamu râ nga. Mu arâ tanga na apanena huhunganiga iata na Amorita ma tangagi na ara ni apaneni i rihu, tanga na maruguna i Jotano, tangagi na apaneni huhunganiga ma na bena i Negeve, ma tanga na tarasini i kereso. Mu arâ nga tanga i Kanani ma kamu arâ nga tangagi na hungani i Libanone ki tariha igê na ve i Uparatesi. 8Na ara ni agua ngegana ka na agua, inê na Araha kê bani surua, vigê haganahunira na êvarimi o Abaramo, o Isako ma o Jakobo ma na raraha iata renia. Mu râ ma kamu oga parênia.’”
O Moise ki atera na mane ni hagaotonga
(Tahinga 18.13-27)
9O Moise ki vi tangara na enoni, ki vi: “Matena igia ka oga i hungana i Sinai, inê kê bani vi tangagamu, kê vi, ‘Na tagaraha iaku gê bêngenigamu ki higa tangê. I pe araria vi inê geteê. 10Na Araha God iami ki bani hagarakonigamu mangagi na higu i vavearo. 11Inê kê nungia na Araha God, na êvarimi ga rahesia, ke ama ni hagarakonigamu nga hagarehagaro, ma ke haganahunigamu renia na ramana, manga i bani surua. 12Inê geteê ki bara tangê, vi ve hagaotogi na hekorekoreana ma na tarani vigana ga akê me i berarogami. 13Tahema mu atera tani na mane tako, i mataha na obata ma ka aitangi tenigi na ara ni hitangini na varo ninuni tangahuru matarerua, ma be kasira ke hagaotogamu.’ 14Igamu kamu aganaria, vi na tarana ngekê ki na tarana koro. 15Vikê inê kê aganarira na enoni raha, ga tako mataha ma ka aitangi, na ani mu atera, ma kê kasira ka hagaotogamu. Tani ka bêngenira na rehagaro na enoni, tani na tangarê gi tage, ma tani na tangahuru gi rima, ma tani na tangahuru gi tage. Inê kê atera nikâ tani tenigi na ara ni hetangini na varo ninuni, ma kê kasira ka voravora re na enoni raha.
16“I na matena ngekana inê kê hagesurira, kê vi, ‘Mu karingagi na hetuguriha, ga akê me i berarogata na kariami. Mu surigi oto na ara ni hetuguriha, na anita na kariami ma na anita nikâ na mahuara, ga oga i berarogami. 17Siana kamu têtê henira tani. Mu surira oto ngaira tagenata, naka ma o ti. Siana kamu magutenia ta na enoni, suria igamu kamu urusia God, matena mu surira na enoni. Manga vi tani na tarana ma ki bara tangagamu, mu tagarenia me tangê, hanana gê suria. 18Igê nga na matena ngekana inê kê hagesurigamu renigi na ara ni marâ getegi, ga tuguhigamu vigamu tanugi.
Na mane ga râ bâbâ i Kanani
(Tomaha 13.1-33)
19“Igia ka râ surigi na marâ na Araha God ki bonasigia renigi. Igia ka pania na hungana i Sinai. Igia ka aharêvoro igê na bagamasusu raha i hagamamagutaga tanga na apanena iata na Amorita. Matena igia ka tariha i Katesi Baranea, 20-21inê kê vi tangagamu, kê vi, ‘I ngekê igamu kamu ata noga igê na agua huhunganiga iata na Amorita, na agua na Araha God iaka, na God na êvarika ga rahesia, ki sugi haganahunigia renia. Bâ ikana! Mu râ ma kamu oga parênia. God kani bani bonasigamu vikana. Siana kamu tugupu! Siana kamu magu!’
22“Ma igamu kamu râ me i pasiku, kamu vi, ‘Ge hagatorangenira na mane, ke nanago taraka, hanana ge râ bâbâ igê na agua. Vikana ngaira ka girara, ga hagarongogia, vi na ani ta na tara ki ararigia viga arâ suria, ma ka bâ hega na hinua igê.’”
23“Na katoha ngekana ki bâ manga i koro. Tahema inê kê atera na mane tangahuru matarerua, na vere tage tenia na ara ni hitangini na varo ninuni. 24Ngaira ka banu igê na apanena i huhunganiga tariha igê na maruguna i Esekole ma ka râ bâbâ igê. 25Ngaira ka migiaporo me na guani tani apinige, ga tarahugi i ngekana. Ngaira ka hagarongogia, vi na agua, na Araha God iaka ki sugi haganahunigia renia, ngaia ki na agua na mako koro ngavê.
26“Ma igamu kamu aharêngenia na ramata iana na Araha God iami, ma kamu usi, vigamu banu igê na agua. 27Igamu kamu hagagege so maremi, kamu vi, ‘Na Araha ki kitenigia. Ngaia ki bêngenigia hura tenia i Esipito, hanana vi tagarenigia tangara na Amorita, hanana viga nahuigia ka meme. 28Ga arâ nga i ngekana tanga na ta? Igia ka magu. Na mane igia ka kasira ka râ bâbâ, ngaira ka hagarongogia, vi na enoni i ngekana ka ramo ma ka borahu teharigia, ma na para na hinua iata ka akê ngavê i vavearo. Ma nikâ ngaira ka bâsira na mane ga bagararaha ngavê!’
29“Ma inê kê vi tangagamu, kê vi, ‘Siana kamu magutenira na enoni ngegana. 30Na Araha God iami ki page bêngenigamu ma ki page meraheariha pusigamu, manga i bani kato vikana i Esipito, 31ma igê na bagamasusu raha. Igamu kamu bani girara, ngaia ki topegamu rârâ mataro me ikê, manga na mane i topea o karena.’ 32Henaka gê vi vikana, ma igamu kamu ama ni usi nga, vigamu hagêguritogo renia na Araha, 33henaka i nanago tarami tare, hanana vi tarahua na agua koro tangagamu, vigamu taunga igê. Ngaia ki nanago tarami, i manga na u na gi igê na bungiani ma ki manga na vaha igê na tangiani, hanana i hagabâsigamu renia na tara.
Na Araha ki hagaitangira na Isiraelita
(Tomaha 14.20-45)
34“Na Araha ki rongogamu mu hagagege tanga, ma kamu hagamangaria. Tahema ngaia ki tohe, ki vi, 35‘I asa ta na hitangita na eragani nuni, vige page banu igê na agua na mako koro, gê bani surua, vigê haganahunira na êvarita renia, 36nga noga ma o Kalebe karena o Jepune ki page bêbanu igê. Ngaia getea ma ki toto suriê. Inê kê page haganahunira ngaia ma na raraha iana renia na agua, i bani râ bâbâ igê.’ 37Suria renigamu igamu, tahema na Araha ki mangariaga tangê nogaku, ma ki vi, ‘Igo nogamu o Moise ki asa, vigu page banu igê na agua. 38Gu hagaramonia hete na kariamu o Josua karena o Nune, suria ngaia nga kani page bêngenira na Isiraelita, hanana ga gâga parênia na agua.’
39“Ma hemuri na Araha ki tamasi tangagia igia hato, ki vi, ‘I hega, mu pe bani vi vari, vi na merongami ka page raura na karemi tenigamu? Hoi, na karemi ngegana ka pe giraragi vi na ta ki koro ma vi na ta ki era, ngaira nga inê kê page haganahunira renia na agua. Ngaira ka page ogasia. 40Ma tangagamu igamu, mu aharêvoro aporo suri ugami igê na bagamasusu raha tanga na Asi Memera.’
41“Ma igamu kamu vi tangê, kamu vi, ‘Moise, e, igami kami haritohea na Araha. Hoi, igami kami agana, vigami arâ igê na hearihatana, manga i bani bonasigami na Araha God iamami renia.’ Na ara ni hitangimi ki nanê tanga na hearihatana, suria mu takusia, vi mataku ma, vigamu mu henahuraua na agua huhunganiga.
42“Ma na Araha ki vi tangê, ki vi: “Gu vi tangara, siana ka taharia na agua, suria inê ki asa be ngahisira, ma na merongata ka page teharira bê me ngaira. 43Inê kê hagarongogamu renia na tamasinga iana na Araha tangê, ma igamu kamu pe karingê. Igamu kamu haritohea na Araha. Igamu kamu taharia na agua huhunganiga, suria igamu kamu parunigamu ngavê. 44Hoi, na Amorite ga ogasigi na hungani ngegana, ngaira ka huhura me ka taharigamu mangara na ruruha ni mamanivo. Ngaira ka tarigenigamu rârâ ki tariha i Goroma ma ka teharigamu igê na hungani i Etome. 45Vikê igamu kamu avarasia na Araha, ma ngaia ki usi, vige aganarigamu se vige karingagamu. 46Tahema igamu kamu oga borahu i Katesi.
Currently Selected:
RAMATA 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific