KI 109
109
Na hagagegeha iana na enoni igê na mamasiaganiha iana#Na ki iana o Tavite.
1God, inê kê visigo raha.
Siana ko ama ni munimuni nga.
2Na enoni era ma na mane ni hagaparunga
ka erasiê ma ka hagaparu reniê.
3Ngaira ka visiê bera,
ma ka tamasi erasiê purua ma, baharamu.
4Naka ma gê takuira ma kê nunginungi tangara,
ma ngaira ka merongasiê.
5Ngaira ka barua na korohaku renia na eraha,
ma na takuiha iaku renia na kiteniha.
6Gu atea ta na mane era, ke suria na merongaku.
Gu naka na hitangita na merongana marena,
ke tuguria hagaparu.
7Vikê ka hagatamasia ma ka suria bera,
ma ka visia, vi na nunginungi iana
ki na marâ tasi nikâ.
8I araria, i meme rêrê,#Ac 1.20
ma ta na enoni ke têgi na nahuninga iana!
9I araria, i meme tenira na karena
ma tenia na gete iana.
10Na karena ka araria, ge bagâgâga ma ke baganunungi.
I araria, ge tarigenira hura
tenia na ruma ahoge iata.
11Na enoni, i kaone tenira, ki araria,
i taugi hato vê na nahuninga iana.
Na enoni mahuara ki araria, ge hanagogi ma ke erasigi
na ara ni marâ hato, i tagarahigi.
12I araria, siana hagetage na enoni, i korokoro tanga,
se vige takuira na kare banogo, i me tenira.
13I koro, ka meme hato na raraha iana,
hanana ga bonotenia ngavê na atana.
14Na Araha ki araria,
ge takusigi na eraha iata na uvarina,
ma ke pe bonotenigi na tasi iana na kenana.
15Na Araha ki araria, ge takusigi tare na tasi iata,
ma ke tako mu renira ma ngaira.
16Na mane ngekana ki asa hagetage,
vige korokoro tangara na enoni.
Ngaia ki merongasira ma ki nahuira ka meme
na enoni matareha ma na ani ga baguru,
ma na enoni, ga hagêguri era.
17Ngaia ki vagevagesigi na guhata.
I araria, na guhata ka tarahua hete.
Ngaia ki pe obanira na enoni,
vige nahunigi na marâ koro.
I araria, na marâ koro ke mu vê tenia.
18Na guhata ki manga na tuguni iana.
Na guhata iana ki araria, ga tarahua so marena,
manga na ve i rarona na apena ma na âvovo na surina.
19Na guhata ki araria, i aruhea manga na gahu
ma ke manga na hogosina.
20Araha, gu hagaitangira vikana na merongaku,
suria ngaira ka guhariê ma ka hagatoraiê.
21Araha God, gu tamaniê, manga go bani surua.
Gu hagatahiê,
renia na takuiha tarema iamu ki koro.
22Inê kê matareha ma kê baguru,
ma kê mamasiaga i mêrihaku hagenani.
23I sugia ma, be magahuru,
manga na mamaru i manurahi ngavê,
manga na rango, ga uhia râ.
24Na buru ni ugaku ka marumarusiga,
suria gê pe ngêngê.
Inê kê rataga ngavê,
ma na suriku ma ka oga.
25Matena na enoni ka bâsia, ngaira ka rurusiê.#Mt 27.39; Mk 15.29
Na merongaku ka babaringe reniê.
26Araha God iaku, gu tamaniê!
Gu hagatahiê renia na takuiha tarema iamu!
27Gu hagagirarara na merongaku,
vi igo nga ko hagatahiê.
28Henaka ngaira ka guhariê,
ma igo ko page korokoro tangê.
Gu teharira na merongaku,
ma inê, na kariamu, be ageage.
29Gu hagamakira bâraha na merongaku,
hanana i nahuira na makiha iata.
30Inê be visia koro bâraha na Araha,
ma be hagarahasia igê na hagarahenga iata na enoni.
31Renia ngaia ki anumasia na enoni matareha,
ma ki hagatahia tenira na enoni,
ga suria ki meme.
Currently Selected:
KI 109: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
