KI 107
107
NA RIMATA NA BUKA
(KI 107—150)
Visia raha God renia na korohana
1“Visia koro na Araha, suria ngaia ki koro!#1 Ch 16.34; 2 Ch 5.13; 7.3; Ezra 3.11; Ps 100.5; 106.1; 118.1; 136.1; Jr 33.11
Na takuiha tarema iana ki asa, vige page hato!”
2Igamu na enoni hato, i bani hagatahigamu na Araha,
mu hagarahasia nga vikana,
suria i bani hagatahigamu tenira na merongami.
3Ngaia ki bani toregamu aporo
tenigi na agua, mu mamahuara igê.
Ngaia ki bani toregamu aporo
tenigi i kerekê ma i kereso,
i kere ataha ma i kere banu.
4Tani ka ata ni kumu ma vê igê na masusu hêga,
ma ki bara tangara, vige tarahua na tara
tanga ta na hinua raha, hanana vige goga igê.
5Ngaira ka magê ma ki mamata na riota,
ma ka hagêguri era.
6Ma igê na mamasiaganiha iata
ngaira ka avarasia na Araha,
ma ngaia ki hagatahira tenigi na bagabevoani.
7Ngaia ki bêngenira suria na tara oto
tanga ta na hinua raha, vige goga igê.
8I tuguhira, viga visia koro na Araha
renia na takuiha tarema iana tangara
ma renigi na mena, i bani tanugi tangara.
9Ngaia ki hagatonomira na enoni, i mamata na riota,
ma ki hagamasura na ani, ga magê,
renigi na marâ koro.
10Tani ka anumanuma ma ka goga igê na roto hono,
igê na mamasiaganiha,
igê na ruma ni hagaitangiha.
11Renia ngaira ka pe marupegi na ramata iana na Araha
ma ka pe tê viteana God raramohaga hunia.
12Ngaira ki meme na apeta renigi na tagaraha, ga higa.
Ngaira ka votavota,
ma ki mareha na enoni, vige tamanira.
13Ma igê na mamasiaganiha iata
ngaira ka avarasia na Araha,
ma ngaia ki hagatahira tenigi na bagabevoani.
14Ngaia ki toregi vê na anumanumaha ma na roto hono tenira,
ma ki musigi na seni tenira.
15Ki tuguhira, viga visia koro na Araha
renia na takuiha tarema iana tangara
ma renigi na mena, i bani tanugi tangara.
16Ngaia ki kumukumugi na maa ni ruma,
ga upupuga ma ka nganganihaga,
ma ki barugigi na aeani igê na mabaha.
17Tani ka maeha renigi na tasi iata,
ma ka hatamigi na mamasiaganiha renigi na erahata.
18Ngaira ki mamâga na obata renigi na ngêra,
ma ka haga ni me renia.
19Ma igê na mamasiaganiha iata ngaira ka avarasia na Araha,
ma ngaia ki hagatahira tenigi na bagabevoani.
20Ngaia ki tamasi ma, ma ngaira ka komaga.
Ngaia ki hagatahira tenia na matahu.
21Ki tuguhira, viga visia koro na Araha
renia na takuiha tarema iana tangara
ma renigi na mena, i bani tanugi tangara.
22Ki tuguhira, viga visia koro renigi na vogasiha.
Ki tuguhira, viga kirigi na ki ni vagevageha
ma ka visigi na tauhana hato.
23Tani ka tagetage i asi igê na haka,
igê na haka ni tagaraha i asi.
24Ngaira ka rigigi na tagaraha iana na Araha,
na mena iana igê na matava tara.
25Ngaia ki bonasia na roga, ki rogaroga raha,
ma ki hagakirokiroa na asi.
26Na navo ka ragegi ngavê na haka
ma ka rahutenigi.
Na mane igê na haka ka oga igê na perenga,
ma ka hagêguri era.
27Ngaira ka tapasu ma ka tariahehu,
mangara na mane ga aripo na maata renigi na tonoha,
ma ngaira ka tugupu.
28Ma igê na mamasiaganiha iata ngaira ka avarasia na Araha,
ma ngaia ki hagatahira tenigi na bagabevoani.
29Ngaia ki hagamanapua na roga raha,
ma ki hagapiova na asi.
30Ngaira ka vagevage, renia i piova.
Ma ngaia ki hagatahira,
suria ga ata igê na sugu, ga tabea.
31Ki tuguhira, viga visia koro na Araha
renia na takuiha tarema iana tangara
ma renigi na mena, i bani tanugi tangara.
32Ki tuguhira, viga kasia akê,
matena ga hakuhaku na enoni.
Ma ki tuguhira, viga hagarahasia
i maata na maneraha, matena ga hekarigi.
33Na Araha ki hagamamatarigi na ve oto
ma na ve banga nikâ.
34Ngaia ki katoa na mako ango, ki vora na masusu hêga,
suria na enoni i ngekana ka era na parongata.
35Ngaia ki katogi na masusu hêga, ka vora na rano,
ma na mako avagavaga ka vora na ve banga.
36Ngaia ki nakara na enoni, ga magê, ka oga i ngekana,
ma ngaira ka tagarahia na hinua raha, ga goga igê.
37Ngaira ka hasigi na mu ma na pariki na vaini,
ma ka hungu ma ka ganora bâkoro igê na ngêra.
38Ngaia ki koro tangara na kariana ma ki hagarakonira,
ma na totoha ni puruka ka rakorako nikâ.
39I ta na mateni na merongata ka teharira na kariana na Araha,
ka hagamakira ma ka hagamamasiaga apeta bâraha,
ma ka hagarugu obata.
40Ma God ki merongasira na merongata,
ma ki katora, ka ata ni kumukumu ma vê
igê na bagamasusu raha, i hêga.
41Ma ngaia ki hagatahira na enoni, ga baguru,
tenigi na mamasiaganiha iata.
Ngaia ki hagarakonira na ahemata iata,
mangara na totoha ni sipi.
42Na enoni, ga tê viteana God, ka bâsia na tarana ngekê,
ma ka obakoro renia.
Ma ngaia ki hagamunira na enoni hato,
ga pe tê viteana.
43Na enoni, ga tako mataha, ki ararira,
viga takusigi na tarani ngegê
ma na takuiha tarema iana na Araha.
Currently Selected:
KI 107: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
