KI 106
106
Na Araha ki korokoro tangara na kariana
1Ka hagarahasia na Araha!#1 Ch 16.34; 2 Ch 5.13; 7.3; Ezra 3.11; Ps 107.1; 118.1; 136.1; Jr 33.11
Visia koro na Araha, suria i takuigia.
Na takuiha iana ki asa, vige page hato.
2Ti ki girara i tomanigi na tagaraha raha hato iana?
Ti ki girara i hagarahasia maniga?
3Ga babarisi na enoni, ga marupegi na ramata iana,
ma ka paronga koro ma oto tare.
4Gu takusiê, Araha, matena go tamanira na kariamu.
Gu hagatahiê nogaku henira.
5Gu haganahuniê nogaku renia na ramana
henira na kariamu.
Gu hagakoro obaku nogaku henira,
ma ku katoê, be ageage nogaku henira na kariamu.
6Igia ka bani tasi mangara na uvarika.
Igia ka bani tanugi na marâ,
ga pe koro ma ka pe oto.
7Matena na uvarika ka oga i Esipito,#Ex 14.10-12
ngaira ka pe aitangisigi na mena iana na Araha.
Hagarako teha ngavê
God ki bani hagabângenia na takuiha iana tangara,
ma ngaira ka pe takusigi.
Ngaira ka guguruga tanga God raramohaga hunia
igê na Asi Memera.
8Ma ngaia ki hagatahira, manga i bani surua,
hanana i hagabângenia na raramohana raha.
9Ngaia ki bonasia na Asi Memera, ma ki mamata.#Ex 14.21-31
Ngaia ki bêngenira na kariana,
ka râ igê na tara mamata.
10Ngaia ki hagatahira tenira na enoni, ga kitenira.
Ngaia ki hagatahira tenira na merongata.
11Ma na asi ki buhira na merongata, ka me hagetage,
ma ki pe tahi na hitangita.
12I ngekana na kariana ka tongesurigi na suruha iana,#Ex 15.1-21
ma ka ki ka hagarahasia.
13Ma ngaira ka hata ni bonotenigi na tagaraha iana,
ma ka pe toto suria.
14Igê na bagamanihê raha na teniha ki angarira.#Nu 11.4-34
Ma ngaira ka uhungia God na Araha.
15Vikê ngaia ki vatera na marâ, ga nungigi,
ma ki hagaitangira nikâ renia na ringa raha.
16I ngekana igê na masusu ngaira ka hengarirerua o Moise#Nu 16.1-35.
mo Aroni, na mane ni vogasiha iana na Araha.
17Ma na ano ki avaga ma ki taku pusia o Tatano,
ma nikâ o Abiramo ma na ahemata iana.
18Na gi ki agorata hurira na kariata
ma ki ngaura na enoni era ngegana.
19I Sinai ngaira ka vogasia igê na kere puruka mane,#Ex 32.1-14
na ataro iata, ga bani tagarahia renia na golo.
20Ngaira ka urusia God raramohaga hunia
renia na nununa na marâ, i ngêngê go ma.
21Ngaira ka bonotenia God, i bani hagatahira
renigi na tagaraha raha iana i Esipito.
22Na mena iana ka rako ma ka raha teha!
Na tagaraha iana i Asi Memera ka hagamakuku ngavê.
23Matena God ki obania, i hagaerasira ngavê na kariana,
o Moise na kariana ki vi pusia God,
ma na mangariaganiha iana ki pe erasira.
24Ma hemuri ngaira ka usitenia na agua bâkoro,#Nu 14.1-35
suria ga pe tongesuria na suruha iana na Araha.
25Igê na ruhu iata ngaira ka tamasi ngurunguru
ma ka pe tê viteana na Araha.
26Vikê ngaia ki kanukanura ma ki tohe,
vi ngaia ki page hagamesira igê na masusu hêga.
27Ngaia ki tohe, vi tokorenira#Lv 26.33.
i pasita na enoni ahuroto,
hanana ga mamahuara ma ka meme i ngegana.
28Ma hemuri na kariana God ka hakunira na enoni,#Nu 25.1.13
ga vogasia na ataro o Bala i Peori.
Ngaira ka ngaugi na vogasi,
ga sungigi tangara na ataro,
na nununi na marâ purua.
29Ngaira ka hagamangaria na Araha renigi na tauhata,
ma na ringa raha ki tarahura.
30Mo Pinehasi ki hagaitangira na enoni,
ga vogasia na ataro,
ma na ringa ki hato.
31Haganega tenia i ngekana, mataro me i ngekê, ki bê ki arâ,
na enoni ka vi, vi na tarana ngekê ki hagabângenia,
vi o Pinehasi ki na mane koro.
32Igê na ve banga i Meriba#Nu 20.2-13.
na enoni ka hagamangaria na Araha
ma ka hagamamasiaga apena o Moise.
33Ngaira ka hagaera obana bâraha,
ma ngaia ki pe tamasi takotako.
34Ngaira ka pe nahuira ke me na enoni ahuroto,#Jg 2.1-3; 3.5-6
manga i bani bonasira na Araha.
35Ma ngaira ka auragi hetarênge henira,
ma ka râ surigi na tauhata ahuroto.
36Ngaira ka vogasira na ataro.
Vikê ngaira ka maratorana na manu,
i tu igê na basu.
37Ngaira ka vogasira na ataro i Kanani#2 K 17.17.
renira na kareta mane ma na hehene.
38Ngaira ka nahuira ka me na kareta,#Nu 35.33
ga pe tanugi rârâ ta na marâ era,
ma na gaputa ka mamuaga i hinua iata.
39Ngaira ka era renigi na tauhata.
Ngaira ka paronga manga na êrâ,
suria ga pe toto suria God na Araha.
40Vikê na Araha ki mangariaga tangara na kariana,#Jg 2.14-18
ma ki kitenira ngavê.
41Ngaia ki nakara vê tangara na enoni ahuroto,
ma na merongata ka marungira.
42Na merongata ka hagamamasiaga apeta,
ma ki asa ngavê, vige gavatenira.
43Hagarako na Araha ki hagatahira na kariana,
ma ngaira ka guguruga tanga,
ma na eraha ki ama ni aharêsira nga.
44Naka ma i manga ngekana,
ma na Araha ki rongora,
ma ki aganarira, matena ga avarasia.
45Ngaia ki takusia na suruheri iana henira,
tahema i tamanira ma ki tako rugu renira,
suria i takuira bâraha.
46Ngaia ki katora na merongata, ga hagamamasiaga apeta,
ka obarugu renira.
47God Araha iamami, gu hagatahigami.#1 Ch 16.35-36
Gu megami aporo tenigi na agua,
mi totoko surigi.
Megami kami page visigo koro
ma kami page hagarahasia na atamu
ma kami page rahesigo.
48Ka visia raha na Araha,
God na Isiraelita ka rahesia.
Ka visia raha i ngekê,
ma tare, ki bê ki arâ.
I koro na enoni hato ka vi, vi: “Monari!
Ge hagarahasia na Araha.”
Currently Selected:
KI 106: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
