TAHINGA 21

Na ramata renira na kare vurivuri

(Ramata 15.12-18)

1“Igê nikâ ka na ramata go nakagi tangara na Isiraelita. 2Manga igo ma ko vuria na kare vurivuri na Isiraelita, ngaia ki tuguhia, vi tagara tangago surigi na harisi ge one. Igê na pita na harisi ngaia ki aharupa, mareha vige vurivuri pusia marena. 3Manga vi ngaia ki na enoni taura igê na matena i voravora re igê na kare vurivuri iamu, ngaia ki pania so nga kaniana. Ma ki manga vi ngaia ma ki bani êragi igê na matena i voravora re igê na kare vurivuri iamu, ngaia ki girara i merâ kaniana. 4Manga vi na avanuna ma ki vatea renia na gete ma ngairerua karu aparara na kare, na mane ma na gete, ngaia na gete ngekê henira na karena ngaira ka na anina na avanuna. Vikê ngaia na mane na kare vurivuri ngegana ki panira so nga. 5Manga vi ngaia na mane na kare vurivuri ma ki vi, vi ngaia ki takuira na avanuna, na gete iana ma na karena ma ki pe obania vige aharupa, 6hoi, na avanuna ki merâ nga igê na ruma ni hagarahenga. Ma i ngekana ki katoa nga ki rêra ngahisia na maani ruma se na u i na akerena na maani ruma, ma ki taketake kurua na vero na karingana. Vikana ngaia ki page voravora re na kare vurivuri mataro me ki meme.

7Manga vi na mane ma ki hagavuringenia ka karena ki voravora re na kare vurivuri, ka karena ngekana ki asa vige rupasia mangara na mane na kare vurivuri. 8Manga vi o vaemana ma ki hagavuringenia tanga tani na mane, i takusia vi auragia, ma ngaia na mane ki usitenia, hoi, ngaia ki hagavuringenia aporo tanga o vaemana. Na avanuna ki apu tanga, vige hagavuringenia tangara na mahuara, suria na parongana tanga ki pe oto. 9Manga vi na mane ma ki vuria na gete na kare vurivuri tanga o karena, ngaia ki tuguhia i katoa manga vi ka karena marena. 10Manga vi na mane ma ki heroga, ki tuguhia, i haganahunia na ani i nago na gete iana renigi na ngauha, na gahu ma ki memêru, tagenana manga i nago. 11Manga vi ngaia ma ki pe katokato vikana tanga, ngaia na gete ki aharupa, mareha vige vurivuri pusia marena.

Na ramata renia na heariha

12“Manga ta na enoni ma ki nahuhunia ta na enoni, hoi, ga nahunahu hunia nogana. 13Ma ki manga vi pe takusia vige nahu hunia ma na enoni akana ki bagararâ me ki me, ngaia ki girara i gavagava tanga ta na hitangini na hinua ni tahinga, gê nakagi. 14Ma ki manga na enoni ma ki mangariaga ma ki takusia vi nahunahu hunia ta na enoni, ma ki nahuia ki me, hoi, ga nahunahu hunia nogana, naka ma i gavagava tanga na bea ni vogasiha iaku, hanana vi tahitahi.

15Manga na enoni ma ki tahurua o vaemana se kenana, hoi, ga nahuia ki meme.

16Manga na enoni ma ki hanagoa ta na enoni, hanana vi hagavuringenia, se i nahunia ki voravora re na kare rakuraku iana marena, hoi, ga nahuia ki meme.

17Manga na enoni ma ki guha erasia o vaemana se kenana, hoi, ka nahuia ki meme.

18Manga vi na vererua ma karu heariha ma na hitangiterua ki tahurua tani renia na hê, se i rupugia ma ki mareha vige nahu hunia, hoi, ga pe hagaitangia. Ma manga na mane i mamari ma ki tâtâ ma i bea, 19ma humuri ki girara i kahu aharaga ma ki rivato rârâ i metara, hoi, na enoni i hagamamaria ki tuguhia, i vuria na matena i tâ i bea ma ki marupea mataro me ki komaga aporo.

20Manga na enoni ma ki tahurua ta na kare vurivuri iana, na mane se na gete, renia na apinige, ma na kare vurivuri ki me ototo râ, hoi, ga hagaitangia nga. 21Ma ki manga na kare vurivuri ma ki oga surigi na tangiani gi tage se gi rua ma ki kahu me, hoi, ga pe hagaitangia na avanuna na kare vurivuri, suria ngaia ki tê tara renia na kare vurivuri iana. Ngaia nga ka na hagaitangiha tanga.

22Manga vi na vererua ma karu heariha, ma na hitangiterua ki tuguia na gete i obara, ma na gete ki hagasiria na karena ma ngaia marena na gete ki pe mamari rârâ, hoi, na ani i tuguia na gete, ki tuguhia i tavoa na êru. O vaemana na gete ngekê ki naka vi gi hita na haga manga vi na mane ni hagaotonga ka aganaria henia. 23Manga vi ngaia marena na gete ma ki mamari, na hagaitangiha ki manga ikê: na mera tanga na mera; 24na maana tanga na maana; na rivona tanga na rivona; na rimana tanga na rimana; na êgana tanga na êgana; 25na noro tanga na noro; na maara tanga na maara; na rupugapu tanga na rupugapu.

26Manga na enoni ma ki tahuru pusi na oruna maana na kare vurivuri iana, na mane se na gete, ma na maana ki guru na enoni akana, ki tuguhia i rupasia na kare vurivuri, na mena na maana. 27Manga vi ngaia ma ki tahuru barugia na rivona ngaia ki tuguhia i rupasia na kare vurivuri, mena na rivona.

Na ta ki tuguhia na avanuni na nahuninga?

28Manga ta na puruka mane ma ki ahura ki me ta na enoni renia na hona, ngaira ka arihahunia nga, ma ki apu vige ngêgi na ahasigona. Siana ka hagaitangia na avanuna. 29Manga vi na puruka mane ma ki tarigenira tare na enoni ma na avanuna ki bani girara ma ki mareha vige purusia, hoi, manga i ahura hunia ta na enoni renia na hona, ngaira ka ariha hunia nga, ma ka nahunahu hunia nikâ na avanuna. 30Hoi, ma ki manga vi ngaira ma ka hagamarumungenia na avanuna ki vurivuri pusia marena, hanana vi hagatahia marena, ngaia ki tuguhia, vi tavoa nga na haga manga ga nungia tenia. 31Manga na puruka mane ma ki nahunahu hunia na kere mane se na kere gete, ka katoa nga vikana nikâ. 32Manga na puruka mane ma ki nahuia ki me na kare vurivuri, na mane se na gete, na avanuna na puruka ki tavoa na tangahuru gi oru na siliva tanga na avanuna na kare vurivuri. Ma na puruka mane ka ariha hunia nga.

33Manga na enoni ma ki gagagatenia na kiru se i oparia na kiru ma ki pe buhia, ma na puruka mane se na tonki ki vota i rarona ma ki me, 34ngaia ki tuguhia i tavotavo haga tanga na avanuna na puruka se na tonki ma ki nahunia na puruka se na tonki akana. 35Manga vi na puruka mane iana ta na enoni ma ki nahuia ki me ta na puruka mane iana na enoni getea, ngairerua ki tuguhirerua garu hagavuringenia na ani i mauri na puruka mane ma karu tongani na haga ma karu tongani nga nikâ na hasigona na ani i me. 36Manga vi na avanuna na puruka mane ki bani girara vi na puruka iana ngekana ki hagamamaguraga ma ki mareha vige purusia, ngaia ki tuguhia i urusia aporo tanga, ma ki girara ma i torea na ani i me.

Currently Selected:

TAHINGA 21: KCB

Highlight

Copy

Compare