TAHINGA 20

Tangahuri ramata

(Ramata 5.1-21)

1God ki tamasi. Na tamasinga iana igê: 2“Inê nga ka na Araha. Inê nga kanigê bêngenigamu hura tenia i Esipito, na agua ni hagamamasiaganiha.

3Siana kamu hagarapea na ataro. Mu rahesiê inê nga hete. 4Siana kamu tahegi na nununi na marâ i vavearo, se i ano, se i ve i ruguhana na maveta, hanana vigamu rahesigi. 5Siana kamu bêtuhia se rahesia na anima na nununa na ataro, suria inê nga ka na Araha God iami. Siana hagetage kamu hagarapera na ataro. Inê kê page hagaitangira na enoni hato ga murisigeê, ngaira ma na apaparaha iata mataro me na oruta ma na heta na apaparaha. 6Ma inê kê page takuira ma kê page korokoro tangara hete na ani ga takuiê ma ka marupegi na ramata iaku, ngaira ma na apaparaha iata i heheuri, tare ki bê ki arâ.

7Siana kamu visia na ataku tangagi na tarani ga pe koro, suria inê, na Araha God iami, kê page hagaitangia na enoni i katokato vikana.

8Mu hagahigasia na tangiana ni mamaroha, ma kamu marupegi na ramata igê. 9Mu girara mu tagara surigi na tangiani ge ono, 10ma na pita na tangiana ki na tangiana nga ni mamaroha ma ki na aniku. Igê na tangiana ngekana ki apu hagetage, vigamu tagara igê, igamu, na enoni vurivuri iami, na togoha iami ma nikâ na mamahuara ga oga i berarogami. 11Surigi na tangiani ge ono inê na Araha kê hagavora igê na maveta, na vavearo, na asi ma na ara ni mara hato igê, ma igê na pita na tangiana inê kê korokoro tangara na enoni, ga hagahigasia.

12Mu hagahigasia o vaemami ma kenami, hanana igamu kamu mauri arihu igê na agua, gê page haganahunigamu renia.

13Siana kamu nahunahu hunia na enoni.

14Siana kamu gamogamo.

15Siana kamu hanago.

16Siana kamu hagatoraia na enoni.

17Siana kamu tenia na ruma iana na enoni. Siana kamu tenira na gete êragi, se na kare vurivuri, se na puruka se na tonki, se na ani mavê na nahuninga iana ta na enoni.”

Na Isiraelita ka magutenia na bâbâhana raha God

(Ramata 5.22-33)

18Matena na enoni ka rongogi na gugusuhia ma na ahuri ma ka bâsigi na marangea ma na hungana i asêsu, ngaira ka tata, ka magu, ma ka ura hagatê râ. 19Ngaira ka vi tanga o Moise, ka vi: “Manga vigo tamasi tangagami, igami kami girara mi karingago. Ma ki manga vi God ma ki tamasi tangagami, igami kami magu vigami meme.”

20O Moise ki aramira, ki vi: “Siana kamu magu. God ki râ me ki uhungigamu ma, ma ki katogamu, kamu ama ni têtê viteana nga, hanana siana kamu haritohea.” 21Ma na enoni ka ama ni ura hagatê mavê, nga noga ma o Moise ki ura râ hagarangia na vaha i puru, na girarana God.

Na ramata renia na bea ni vogasiha

22Na Araha ki hagatora o Moise ki tamasi tangara na Isiraelita, ki vi: “Igamu kamu bani bâsia, manga i he inê na Araha kê bani tamasi me tangagamu tenia na vavearo. 23Siana kamu tagarahigi na nunuta na ataro renigi na siliva se na golo, hanana vigamu vogasira. Mu rahesiê inê nga hete. 24Mu tagarahia na bea ni vogasiha tangê renia na mako ma kamu susu igê renira na sipi ma na puruka iami hagenani, ma kamu vogasi igê renigi na ngauha mu tongani. I na ara ni agua gê nakagi tangagamu, hanana vigamu rahesiê igê, inê be hagagiraragamu reniê mareku ma be korokoro tangagamu. 25Manga mu tagarahia na panga na bea ni vogasiha siana kamu tagarahia renigi na hê mu ninigi, suria na hê mu ninigi renigi na gira, ka mareha vige marisiku inê. 26Siana kamu tagarahia tangê na bea ni vogasiha, ga akê tanga, i era ma ka bâ hagamakigamu, matena mu tagere.”

Currently Selected:

TAHINGA 20: KCB

Highlight

Copy

Compare