TAHINGA 16
16
Na Araha ki hagangêra na Isiraelita
1Na Isiraelita hato ka pania i Elimi. Igê na tangahuruta gi tage matare rima na tangiana igê na ruata na hageha i murina ga hura tenia i Esipito, ngaira hato ka ata igê na bagamasusu raha i Sini. Ngaia kani i berogaterua i Elimi me Sinai. 2Igê na bagamasusu raha i ngekana ngaira hato ka hagagege tangarerua igê o Moise mo Aroni, ka vi: 3“Tanu hega na Araha ki pe bani nahuigami vê i Esipito? I ngekana ka aharêsigami igê na ganiani ma na ngêra getigi. Tanu hega igamurua kamuru bêngenigami me igê na bagamasusu raha ikê, kami mesi magêha?”
4Na Araha ki vi tanga o Moise, ki vi: “Hoi, inê be katogi na ngêra ke agorata so me tenia na vavearo manga na rangi tangagamu igamu hato. Na ara ni tangiani na enoni ka ruguni nga na ngêra i araria na tangiana ngekana. Inê kê kato vikana, kê uhungira, hanana gê tarahua, vi ngaira ka marupegi na ramata iaku se i mareha. 5Igê na onota na tangiana ngaira ka ruguni nga na ngêra ki ararigi na tangiani gi rua ma ka hagamako nga igê.”
6Vikê o Moise ma Aroni karu vi tangara na Isiraelita hato, karu vi: “Igê na manurahitana ngekê igamu kamu kahu girara, vi na Araha kani bêngenigamu hura tenia i Esipito. 7Igê na mavorarotana igamu kamu page rigia na raramohana raha na Araha. Ngaia ki bani rongogi na hagagegeha iami tanga ngaia. I monari tanga ngaia, mareha vi tangagamirua igamirua, suria igamirua kamuru arâ surigi ma na tamasinga iana.” 8Ma o Moise ki vi nikâ: “Igê na manurahi ngaia nga na Araha kani page vategamu na ganiani kamu ngaugi, ma igê na mahogotana ngaia ki page vategamu rako ngavê na bereti. Ngaia ki bani rongogi na hagagegeha iami tanga. Matena mu hagagege, ki mareha vi tangagamirua igamirua, ma tanga hete na Araha.”
9O Moise ki vi tanga o Aroni, ki vi: “Gu unira me na Isiraelita hato, ke ura i maana na Araha, suria ngaia ki bani rongogi na hagagegeha iata.” 10Matena o Aroni ki tamasi tangara na Isiraelita hato, ngaira ka ahoro ma ka sira râ igê na bagamasusu raha, ma ki parama ma na bâbâhana raha na Araha ki vora me igê na vaha. 11Na Araha ki vi tanga o Moise, ki vi: 12“Inê kê bani rongogi na hagagegeha iata na Isiraelita. Gu hagarongora, vi igê na manurahitana ngaira ka page ngaugi na ganiani ma igê na mahogotana na bereti ki page aharêsira. Vikana ngaira ka kahu tahetara reniê, vi inê na Araha kê God nga iata.”
13Igê na manurahitana na ruruha raha na manu ka gaha me, ma ka manasia na ano na agua ga oga igê na Isiraelita. Ma igê na mahogotana na kârupu ka oga rihia na agua ga oga igê ngekana. 14Matena ka magahuru na kârupu, ma ta na marâ ga manihinihi ma ka mataku ni maromoromo, ka gahuia na ano igê na bagamasusu raha. Ngaia ki mangagi na poponi na asi. 15Matena na Isiraelita ka bâsigi, ngaira ka bagatatako renigi ma ka hehagateri, ka vi: “Na ta igê?”
O Moise ki vi tangara, ki vi: “Na ngêra ngegana, na Araha ki vategamu, hanana mu ngaugi. 16Na Araha ki bani bonasia na ara ni hitangimi, ki ruguni nga, ki araria na ahemata iana: na kilo gi rua tanga na vere tage.”
17Na Isiraelita ka kato vikana. Tani ka ruguni ki rako ma tani ka ruguni hagarari râ ma. 18Matena ga hagararingenigi, na ani ga ruguni rako, ki ararira so ma, ma na ani ga ruguni hagarari so ma, ki ararira so ma nogata. Na ara ni ahemata ki ruguni hagararira so ma. 19O Moise ki vi tangara, ki vi: “Siana kamu hagahitagi tani tanga i gomaha.” 20Ma tani na hitangita ka pe tê viteana o Moise ma ka hagahitagi tani. Ki tangi me ma ngaigi ki mamaga ma ki mapu. Ma o Moise ki mangariaga tangara. 21I na ara ni mavoraro na ara ni ahemata ki ruguni hagararia so marena. Ma na matena i ahakê na arito, na ani ga hita so i ano ka rono.
22Igê na onota na tangiana ngaira ka ruguni ararirerua na tangiani gi rua: na kilo ge he tanga na vere tage. Ma na enoni raha hato iata na Isiraelita ka hagarongoa o Moise renia. 23Ma o Moise ki vi tangara, ki vi: “Na Araha ki bani naka, vi i gomaha ngaia ki na tangiana apuna ni mamaroha. Ngaia ki na anina na tangiana. I ngekê nga mu hahahi ma kamu hagagobo na ngêra ga ararigamu, ma na ani ga hitahita, kamu nakagi vê tanga i gomaha.” 24Ngaira ka râ suria manga i visia o Moise, ma ka nakagi na ani ga hita tanga i tangi me. Ngaigi ki mareha vige kakaga se vige mamaga. 25O Moise ki vi: “Mu ngaugi i ngekê, suria ngaia ki na tangiana ni mamaroha, na tangiana iana na Araha, ma ki bara vigamu tarahugi na ngauha i metara. 26Mu ruguni nga na ngêra surigi na tangiani ge ono, ma igê na pita na tangiana, na tangiana ni mamaroha, ki mareha igê na ngauha.”
27Igê na pita na tangiana tani na enoni ka hura viga ruguni ngêra ma ka gari makira. 28Vikana na Araha ki vi: “Se, mu guguruga taraha? 29Mu girara, vi inê na Araha kanigê bani naka tangagamu na tangiana ni mamaroha. Tahema inê kê vategamu tare na ngauha ga ararirerua na tangiani gi rua igê na onota na tangiana. Igamu hato ki tuguhigamu, vigamu gâga tonge igê na pita na tangiana. Siana kamu huhura i metara.” 30Tahema na enoni ka pe tagara igê na pita na tangiana.
31Na Isiraelita ka hêtana na ngêra ngekana vi na mana. Ngaia ki bâ mangagi na maani siki na apinige, ma ki ngê mangagi na bereti, ga torarigi henigi na pirui. 32O Moise ki vi “Na Araha ki bonasigia, viga nakanaka tani, hanana i gâga tangara na raraha iaka i muri me, hanana ngaira ka page bâsigi na ngêra, na Araha ki vategia igê na bagamasusu raha, matena i bêngenigia hura tenia i Esipito.” 33O Moise ki vi tanga o Aroni, ki vi: “Gu tavoa na pi na hê, ma ku tugunigi igê na kilo gi rua na mana, ma ko naka igê na agua, i gâga igê na Araha. Vikana na mana ki page gâga tangara na raraha iaka.” 34O Aroni ki râ surigi na tamasinga iana na Araha tanga o Moise. Ngaia ki naka na pi na hê i maana na bokesi na suruheri, hanana i gâga maninga igê. 35Na Isiraelita ka ngêgi na mana surigi na harisi tangahuru ge he mataro me ka ata i Kanani, na agua ga oga hagahu igê. 36(Igê na matena ngekana ngaira ka hagararingenigi na mana igê na apira, i ararigi na kilo tangahuru gi rua.)
Currently Selected:
TAHINGA 16: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
