2 PETERO 1
1
1Inê Simone Petero, na kariana ma na aposotolo iana o Jesu Kirisito.
Inê kê sege tangagamu, renia mu nahunia nogami na tongesuriha koro teha manga igami. O Jesu Kirisito, God ma na Hagamauri iaka, ki bani vategia na tongesuriha ngekê, suria ngaia ki koro.
2Inê kê obania, garu tehateha i pasimi na hetamaniha iana God ma na marapeha, renia mu girararerua God mo Jesu na Araha iaka.
God ki ategamu
3God raramohaga hunia ki bani vategia na ara ni marâ, ga obanigi, hanana vi ga mauri renigi suria na obaniha iana God, renia igia ka girara, vi God ki bani unigia, ka haku henia igê na arahanga ma na koroha iana marena. 4Igê na tarana ngekana ngaia ki bani vategia na suruha koro teha ngavê, hanana vi igamu kamu girara mu tahitahi tenigi na teniha era i maveta, suria mu nahunigi na marâ, i bani surugi, ma hanana mu girara nikâ, mu mauri manga God. 5Tahema ki tuguhigamu, vi gamu uhungia maninga, kamu hagatongania na koroha henia na tongesuriha iami. Ma kamu hagatongania na giraraha henia na koroha iami. 6Ma kamu hagatongania na bâsuriana tangagamu maremi henia na giraraha iami. Ma kamu hagatongania na parongami koro henia na togeaganiha iami. 7Ma kamu hagatongania na hekomaniha henia na parongami. Ma kamu hagatongania na hetakuiha henia na hekomaniha iami. 8Ngegê nga nga na girarani na marâ mu obanigi, ma ki manga vi ga akê me koro i pasimi, ngaigi ka page tamanigamu, kamu tagara ramo, ma kamu pe tagara purua ma. Manga ngekana, igamu kamu page aitangisia ngavê na Araha iaka o Jesu Kirisito. 9Ma na enoni, i pe nahunigi na tarani ngegana, ki guruha na maana, ma ki asa, vi ge bâbâ, ma ki bani bonotenia vê, vi na tasi iana i nago ka bani tananigi râ.
10Hoita, goaku igê na tongesuriha, mu ama ni uhungia nga, kamu hagatanga monari renia vi God ki bani ategamu, ma ki bani unigamu. Suria manga vigamu ama ni tanua nga, igamu ki asa, vi gamu page vota. 11Manga mu katogi na tarani ngegana, ki page ototo teha ngavê tangagamu, vi gamu gâga igê na arahanga iana o Jesu Kirisito, na Araha ma na Hagamauri iaka.
12Tahema inê kê page hagatakusigamu tare renigi na tarani ngegana, henaka vigamu bani giraragi, ma kamu bani nganganihaga igê na tongesuriha, mu bani nahunia. 13Inê kê takusia, i tuguhiê, vi gê hagatakusigamu renigi na tarani ngegana, matena gê gâga mênga. 14Renia gê girara, vi i sugia ma vi ve meme, suria na Araha iaka o Jesu Kirisito ki bani visia mataha tangê. 15Tahema inê be uhungia maninga nga be tamanigamu, kamu takusigi aporo tare na marâ ngegana i muriku gê meme.
O Petero ki bâsia na arahanga iana o Kirisito
16Matena mi bani hagarongogamu renia na râha me iana na Araha raramohaga hunia iaka o Jesu Kirisito, igami ki mareha vi gami sihonga purua ma. Igami kami bâsia na arahanga iana renigi na maamami maremami. 17Igami kami oga henia, matena God Vaemana i kasia akê, ma ki hagarahasia, ma na ringena God raramohaga hunia ki vi, “Ikê o kareku hetakui. Inê kê vagevage bâraha renia!” 18Igami maremami kami oga henia igê na hungana apuna, ma kami rongoa na ringena ngekana, i râ me tenia na vavearo.
19Henaka i manga ngekana, ma igami kami tongesuria gatagata na tamasinga iata na poropete. I ararigamu, vigamu karinga maninga. Suria ngaia ki manga na sina, i mave igê na roto hono, mataro me ki tangitangi, na Tangiana Raha, ma na mavetana na higu ni tangi ki mavesigi na obami. 20Igamu kamu takusia na tarana raha ngekê: ki asa ta na enoni, ge girara vi ge hagararingenia marena na tamasinga iata na poropete i na Buka Apuna. 21Renia i asa na enoni, vi ge tamasi poropete renigi ma na obaniha iana. Ma na enoni, ga tamasia na taroha iana God, suria na Higona Apu ki tamasi i harata, renia i angarira.
Currently Selected:
2 PETERO 1: KCB
Highlight
Share
Copy
Want to have your highlights saved across all your devices? Sign up or sign in
© 2011 Bible Society of the South Pacific