2 ESETARASE 9
9
1Ngaia ki arami, ki vi: “Gu takusigi maninga na tarani hato igê. Matena go bâsia, viga bani akê me tani na girarani, gê bani hagarongogo renia, 2igo ko kahu girara, vi i arâ me noga na matena God raramohaga hunia i page suria igê na maveta, i bani hagavora. 3Ga page akê me na nunu raha, na hemerongeana so i na agua, na hearihatani i berarogani na agua, na gavumane ga heheurisige rêrê tare se ga takotako tugupu. Matena go bâsigi ga akê me na tarani ngegana, 4igo ko kahu tahetara, vi ngaigi ka na tarani God raramohaga hunia i bani visigi hagenago me tenia na matena i hagavorara na ara ni marâ hato igê. 5Na haganegahani ma na hagahatongini na ara ni tarani ga akê me i maveta ikê, ka rongo mataha. 6I tagenana ma nikâ tanga na maveta i haha. Na mena ma na tarani vigana ka hagabângenigi na haganegahani na tarani ga akê me, ma na girarani raha ka hagabângenia na matena ga hatohato igê.
7Tani na enoni ka page tahi tenia na hagaitangiha. Na tauhata koro se na tongesuriha iata ka page hagatahira ngaira hato. 8Ngaira ka page tahi tenigi na bagabevoani gê bani visigi, ma ka page vagevagesia na tahingata igê na agua gê bani naka hagahu me tangê inê mareku. 9Na ani, ga pe bani botage renigi na ramata iaku ma ka kitenigi, ngaira ka page konekone, matena ga tahetara, vi ngaira ka oga igê na mamasiaganiha, i asa vige page hato. 10I berarogata ka page oga nikâ igê na ani ga pe takusiê rârâ, matena ga tahitahi mêngara, henaka vi ngaira ka aganarigi na marâ koro gê vatera renigi. 11Henira na ani ngegana inê kê page hakura na ani ga kitakitagi na ramata iaku igê na matena ga asitatara viga katokato vikana, ma nikâ na ani ga usi vige urisi parongata, matena ga nahunia mênga na matena tanga vikana. 12Na mamasiaganiha, ga page oga igê i murina ga meme, ki page hagagirarara renia na monariha. 13Tahema, o Esera, siana ko hagate nikâ renia na hagaitangiha i page tarahura na enoni erataga. Gu takusia hete, vi manga i he ma i na keta kani page tahitahi igê na enoni koro. Na maveta ki vora tangara ngaira ma ki na anita.”
14Ma inê kê vi: 15“E, inê be visia aporo na tarana gê bani visia. Na ani ga pe tahi, ka rako teha ngavê teharira na ani ga tahi. 16Na ani ga pe tahi ka manga na hêna na navo ma na ani ga tahi ka manga na êsusu gi tage na ve.”
17Ngaia ki arami, ki vi: “Na maani na ngêra, na mane i hasigi i mu iana, na mako ma kani girara; na bâbâhana na mahe na mahe ma kani girara; na korohana na marâ, na mane i tagarahia, na manisingeniha iana ma kani girara; na harisi ga raharaha na tagaraha raha ma iana na enoni kani girara. 18I nago tarana gê hagavora na maveta ikê, se na enoni ga oga igê, ki mareha rârâ ta na enoni vige tamasi pusiê, suria na enoni ka mamêngara vige voravora me. 19Matena gê hagavora hato na maveta, inê kê vatea renigi rako ngavê na ngêra ma na ramata ni morana na takoha mataha, ma na enoni gê bani hagavorara, ka bagatauhata. 20Inê kê bâsia na maveta iaku ma kê tarahua, viga hagaerasia ngavê. Inê kê bâsia, vi na katoha era iata na enoni igê kaniga haganega ka hagaerasia ngavê. 21Matena gê bâsia vikana, inê kê tarahua, vi i bara ngavê tangê, vi ve hagatahira. Henaka, ma inê kê hagatahira ta kereani tangê inê mareku: na guana gi tage na vaini tenia na parana; na apinige gi tage tenia na bagavapuna raha. 22Nakara vê ke me na enoni hato ngegana, ga vora ma me tanga ga pe tahi. Ma be nakara na kariaku hetakui ke oga purunguni, na kariaku gê bani tagara bâraha renira ka koro ngavê.
23Hoi, o Esera, gu oga surigi na tangiani gi pi nikâ ma ki mareha vigu kahu harihari. 24Gu râ igê na bena ni mahe ni bemu, i mareha rârâ ta na enoni vige bani oga igê, ma ku ngêgi ma na mahe. Siana ko ngaugi na ganiani se vigo totono na vaini. 25Gu rahesia God raramohaga hunia suria na metana ngekana. Hemuri inê kê aporo me nikâ ma kê megotamasi.”
NA HETA NA MARUTEHA
Na ramata ga page gâga hagahu
26Inê kê râ suria na bonasiha iana na angero ma kê râ igê na bena ga visia Aratata. Inê kê oga so i ngekana i berarogani na mahe ma kê ngêgi na rauga ngegana. Ngaigi ka arariê gê ngê masu. 27I murini na tangiani gi pi inê kê tâ so igê na go ma kê haganega kê takoha bâraha nikâ. 28Vikana inê kê haganega kê tamasi tanga God raramohaga hunia, kê vi: 29“Araha, igo ko vora tangara na êvarimami, matena ngaira ka aharêvoro igê na bagamasusu raha, ga mareha igê na tara ma ki bêratega, i murina ga bani pania i Esipito. Igo ko vi tangara, ko vi: 30‘Isiraelita, mu karingê. 31Inê kê vategamu na buka ni ramata iaku. Ngaia ki manga na maana na ngêra i akê i berarogami ma ki ganora. Ngaia ki page vategamu na ageageha tare ki bê ki arâ, manga na tarepuri i bêmi.’ 32Na êvarimami ka aganaria na buka ngekana ma ka pe marupegi na ramata igê. Henaka, ma na guani na ramata ki asa vige magahuru. Ngaira ki asa vige hatungia, suria ki na animu. 33Na ani ga aganaria na buka ni ramata, ka mutemute hete, suria ngaira ka pe marupea na maana koro na ngêra igê na aitangihata. 34-35Tarema na baguruna na marâ ki gâga i murina i hatohato na marâ i rarona. Na hagararinga: na maani na ngêra i rarona na mako, na haka igê na asi se na ngêra igê na apira. Ma igami na enoni tasi kami pe manga ngegana. 36Igo ko nakagi na ramata iamu igê na aitangihamami ma igami nga hete kanimi page magahuru, suria mi tasi. 37Na ramata ki asa vige page magahuru. Ngaigi ki gâga hagahu henigi na raramohana hato igê.”
Na maruteha renia na gete i angiangi
38Matena gê tamasi so tangê mareku vikana, inê kê bâ rârâ ma kê bâsia na gete i na apaneku na otoku. Ngaia ki angiangi, ki angi maramara ma ki era ngavê na obana. Na tuguni iana ka taritarisiga ma na rahu i bêna. 39Inê kê nakagi vê ototo râ nga na takoha bâraha iaku ma kê aharia na gete. 40Inê kê hagatea, kê vi: “Hega kanigo angi? Hega kanigo obaera ngavê?”
41Ngaia ki arami, ki vi: “Goaku, gu nakê so, be ama ni angi nga ma be ama ni angi maramara nga. Inê kê obaera ngavê ma ki rugu ngavê na obaku.”
42Inê kê vi: “Na ta kanigo angisia?”
43Ngaia ki arami, ki vi: “Goaku, inê kê bani êragi me surigi na harisi tangahuru gi oru ma kê gomara. 44Surigi na harisi tangahuru gi oru ngegana, i na ara ni tangiani, ma i na ara ni mateni, surigi na tangiani ma na bungiani, inê kê nungia God raramohaga hunia, hanana vi ve apara kare. 45I murini na harisi tangahuru gi oru ngegana, God ki aganaria na nunginungiha iaku. Ngaia ki hatungia râ na makiha teniê, suria i haganahuniê renia na kare mane. Igami hato kami vagevage bâraha, inê, o vaniaku ma na enoni hato i pasimami. Igami kami hagarahasia God raramohaga hunia. 46Inê kê marupea bâkoro ngavê o karemirua ki raha. 47Matena i raha, inê kê atea na gete tanga ma kê hagarêa na hagatakuha tanga.
Currently Selected:
2 ESETARASE 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific