YouVersion Logo
Search Icon

Hahnibo 1

1
Jahuen yoshin noque hinantijani
1Mihqui huishamenoxon tah hen Jesusen hahni jatihibi mia yohinihqui, señor Teófilon, jan honanmani rihbi mia yohiquin. 2Hinahihnanoxon caman jan hahpahoni jatihibi tah hen mia yohinihqui. Hinahihnarihyamaxon ta jan caisni jahuen raantibo jaan yohinishqui jascahahbo. Dios Yoshiman shinanmaha jato yohiquin. 3Jihui qui hueonahbo mahuatipish bi cahen jaabaan jisíbo hihquish jato qui sanareneni jahui, jan hahquirihbi jihuetai honanahbo. Cuarenta neten cahen jato betan hihcanahi. Jato nihquihinxon jenquetsahaquin Papan noque jihuemayaxihquin jato honanmaquin.
4Jato betan pixon cahen jato yohiquin:
—Jerusalen jema potabahinaxma janobinahue, Papan yohini nocoyaxahnon caman janobi mananahue. Jaa ta Papan hinanyaxihquiqui hah ta hen mato janiqui. 5Juaman mato jenen nashimani bi ta Papan mato jahuen Yoshin hinanyaxihquiqui nashimaquin hahcajaquin hicha hinanresquin. Jan jascajati nete ta nea pishca sca jaonahiqui —jato jaquin.
Naiho Jesus hinahihnatai
6Jaatian hahqui tsinquirihbixon Jesus yocacanquin:
—¿Noquen caibobi sca hahquirihbi noquen hapo janon min rahmabi noquen nahuabo camatihin, Hihbon? —hahcanquin. 7Yocacahbo jato yohiquin:
—Jaabi hihbo hihxon ta jayaxihquibo Papan yohinishqui. ¿Jahuentian jaticaniquin? ¿Jahua neten jayaxihcanihquin? Man tah man honantimahi. 8Jaa man honantimahi bi ta Dios Yoshiman mato coshi hinanyaxihquiqui mato qui botopaquexon. Coshi bichish tah man hehqui chanicoinyaxihqui Jerusalen jema janin, Judea mai jatihibinco rihbi, Samaria mai janin rihbi, jano nai chibechijaquehtancahuanaiton rihbi —jato jaquin.
9Jascahiton cahen Papan jaa bihinihniquin jaton jisnonbi. Nai cohiman pantehah cahen jisyamascacanquin. 10Jan cahiya nai bejisihnihi nih nichaibaan bi joxo chopaya rabe jato patax nihreneni jahui. 11Nihrenenxon yocacanquin:
—¿Jahua jenquetsahin man naihoh jisichain, Galilea mai mehabaan? Maton jisnon bi jan naihoh hinahihnatai quescaquihrani ta joribiyaxihquiqui, Jesus, jaabi, huetsama —hahcanquin.
Judas xahbanen Matías caisaibo
12Jasca jaabo jaiya cahen Olivo janeya mahchin mehax Jerusalen janin boribicani. Jaa mahchi ta Jerusalen hochoma qui noquen xobo janinhax noquen huai tihixon. 13Nocotax rabe tapoyahpa xoboho bocani bochiquiha chique janin, jano jaabo jihuetai janin. Pedro, Juan, Jacobo, Andres, Felipe, Tomas, Bartolomé, Mateo, Alfeon baque Jacobo, Simon Celador, Jacobon baque Judas. 14Jaabo rahsichin Papa jaayocacanquin jaa shinan huestiya hihxon. Jato betan haibobaan rihbi yocaquin. Jesusen jochicabaan rihbi, jahuen mama Marían rihbi yocacanquin.
15Jano cahen noque huetsabo tsinquicani, ciento veinte rah. Jato tocan mehax huenihihnaxon Pedronen yohiquin:
16—Papan huishamani joi jai quescari ta jahoxqui, noque huetsabaan. Judasen jascajayaxihqui ta Davidinin huishanishqui, Dios Yoshiman shinanmahah. Jesus bihmanoxon ta Judasen Jesus qui jonibo hihuehoxqui. 17Jaa Judas ta noque betan hihpahonishqui, jaa rihbi nea tee hihbomahah. 18Jan hohchaquin cananai coriquinin ta mai marohoxqui. Marohax paqueti behoracareneni pohtoshihcahinax jahuen pocobo napaquehreneni. 19Jan jascajahi jatihixonbi honanxon ta Jerusalen janin jihuetaibaan jaa mai janenishqui Acéldama, jaton join. Jimiyahpa mai hihcatsihqui. 20Salmos quirica janin ta nea joi huishá jaiqui:
Jahuen xobo xahbanscanon tsoabi jano jihueyamascanon
hihqui jaa quirica janin.
Jahuen tee rihbi huetsan hihbojanon
hihqui huetsa quirica janin rihbi.
21-22Jascabi sca janon huetsa sca caisnahue. Noque betan huetsa sca yohinica caisti ta jaiqui. Juaman noquen Hihbo nashimani tian noque betan nihni joni huesti. Noquen Hihbaan noque nihquihinpahoni tian noque betan nihxon rahma caman noque manapahoni joni huesti caisnahue, noquen jisnonbi noquen Hihbo hinahihnanon caman noque manapahoni joni. Jaan ta noque betan noquen Hihbo Jesus rehtehahbo bi hahquirihbi jihuetai yohicointihiqui —jato jaquin Pedronen.
23Jaatian cahen rabe joni naponbi nihmacanquin. Huetsa cahen Matías. Huetsa cahen José, Barsabas hahcaibo. Justo jahuen jane huetsa. 24-25Jaatian cahen Papa yocacanquin:
—Hihbon, mian tah min jatihibi jonibaan shinan honanai. Criston raantibaan tee ta Judasen potabahinhoxqui jano jan cacatsihquiton canoxon. Rabe joni tah non naponbi nihmahi. ¿Jahuemeha min caisain Judasen tee jan hihbojanon? Noque jismahue non honannon —hahcanquin. 26Jascajaquin yocaxon jahuemeha hin honannoxon macan bero borasa qui nanexon chicoxon jiscanquin. Jisxon Matías honanscacanquin. Criston once raantibo betan sca hihnon jaton hahbe raanti janecanquin.

Currently Selected:

Hahnibo 1: kaq

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy