Salmos 38
38
Icoacotiri iramitacoteri Tasorentsi
(Ivampoyeane David)
1Tasorentsi, eiro piquishimentanarotsi nantaqueri,
aisati eiro poasanquetaanatsi ariorica pinquishea.
2Poashinoncaasanotaquena,
oquempetaca piquentaquena nashinoncantacari.
3Piquishimentaquenaro caari cameetsatatsiri nantaqueri,
irotaque nomantsiatantacari catsini.
¡Te ontimeji aparo notonqui tecatsitatsine!
4Ora caari cameetsatatsi nantayetiri, oamaashireaquena,
oquempetacaro noquijaquero tenatatsiri,
te nomatero namavetero.
5Notsataaca nantashiyetacaro oquempetaca te nioteji,
irotaque oshititantacari novatsaaropee.
6Maaroni quitaiteripeequi noashireta,
ocantimonentaquena, te nonquimoshiretajeji catsini.
7Ocatsitacaaquena notapiiqui catsiirentsi
aisati maaroni novatsapeequi.
8Nomaperotasanotaca, te noshintsitanaje.
¡Nocavintsaashiretasanotaca, te namavetanajero!
9Tasorentsi, aviro iotirori maaroni nocoasanotiri,
¡aisati noashiretacotari, tecatsi manimotempine avinti!
10Ora nasancane oshintsiti oshevashevataca,
te aneajero noshintsire.
¡Aisati ocamaraiteacotaquena, te noneantaperotaje!
11Yora notsipavintsataniri neacameetsavetanari
aisati noshanincasanori,
inijantareanaquena, ineaquena nopatsaayetaque.
12Yora coatsiri iroyena yoashiyetaquena,
icoaque incantacantena,
iquenquetsataacavacaajeita intsoncantenari;
icantani iquenqueshiretiro iraacantena.
13Iro cantaincha noquempetacantashitaca te nonquemeriji;
aisati noquempetacantaca masonti,
te catsini noneaveeteji.
14Noquempetacari caari quematsi,
aisati te nomatea noneanateri nojocaacoventanteari.
15Aviro Notasorentsite,
noyeacotiri panqueri avinti.
16Apatiro nocoacotimpi,
eiro pishinetiritsi irishirontimentena,
aisati eiro iveshireimentana irineaquearica iranaacotaquena.
17Queario, irotaintsi omaperotena nojoquiitaca,
te ompeimateaji capichaji nocatsincayetaque.
18¡Nocoaque noncamantacotero caari cameetsatatsi nantaqueri,
tempa oshequi ocantimonentaquena!
19Yora quisajeitanari yoshequianaque;
iquisashitaquena, tecatsi nantavetea.
20Iquisashitaquena naacameetsavetari cameetsa;
ariorica nantiro cameetsayetatsiri, icoashitaca inquishena.
21Notasorentsite, ¡eiro pojocanatsi apaniro!
¡Eiro pinijantareanatsi!
22Notasorentsite, aviro oavisaacotanari.
¡Pimpoque intsipaite pamitacotena!
Currently Selected:
Salmos 38: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
