Levítico 3
3
Intayeteri virantsi iraacameetsatantajeariri Tasorentsi.
1“Intimerica amenarine ivira, iriorica ivacate shirampari, iroorica tsinane, intaimenterori naacameetsatantajeariri, eiro yamashitaritsi amashitachari. 2Yora ashitariri ocameetsati iroanqueteneri iraco iitoqui, irosati iroantaqueari piqueapinitiroca Pancotsiqui papatotimentantanari. Irioquea antaveetatsiri tsiquirijantayetearone iriraja altariqui acaquerocapeequi.
3-4“Yora amaqueriri ivira intaimenterori naacameetsatantajeariri, ocameetsati iramaquenari, intaantearori ireji manacotirori iramporetsapee, aisati iranatarequiniri intsipataquero ishonquepeopee. 5Yora antaveeyetanari intayenaro maaroni ocapee altariqui, intsipataqueri ivatsapee, noneacameetsajencatasanotantearori.
6“Intimerica amenarine irovishate intaimenterori naacameetsatantajeariri, ocameetsati iramena shirampari, iroorica tsinane, eiro yamashitaritsi amashitachari. 7-8Iriorica iramaquena ovishajaniqui, ocameetsati iroanqueteneri iraco iitoqui, irosati iroantaqueari piqueapinitiroca Pancotsi papatotimentantanari. Irioquea antaveetatsiri tsiquirijantayetearone iriraja altariqui acaquerocapeequi.
9“Yora amaqueriri ivira intaimenterori naacameetsatantajeariri, ocameetsati iramaquenari intaantenariri. Ora ireji maaroni ichomequi itotaqueri, jero ireji manacotirori, iramporetsapee, 10apiiteroqueti ishonquepeoqui, jero ireji manacotirori jero aisati itepoquiquiniri intsipataaquero ishonquepeopee. 11Irosati intaantaquero antaveeyetanari maaroni ocapee altariqui, oquempeta oanarontsi pitaapinitanari pimpicatsatantanari.
12-13“Iriorica iramena chiivo intayenari, ocameetsati iroanqueteneri iraco iitoqui, irosati iroantaqueari aca Novancoqui. Irioquea antaveeyetatsiri tsiquirijantayetearone iriraja altariqui acaquerocapeequi.
14“Yora amaqueriri ivira ocameetsati iramaqueri intaantenariri maaroni irejipee manacotirori iramporetsa, impincatsatantenari, 15apiiteroqueti ishonquepeoqui, jero ireji manacotirori, jero aisati itepoquiquiniri intsipataaquero ishonquepeopee iranatarequiniri. 16Irosati intaantaquero antaveeyetanari maaroni ocapee altariqui, oquempeta oanarontsi pitaapinitanari pimpicatsatantanari.
17“Irotaque oca nocantacantiri oncantaitatiyempani ontime. Ocameetsati irimoncarajeitero pishanincajeitajeari aisati intomintajeitajeari iriori. Jaocarica pisavicajeiteri, eiro poarotsi ireji aisati iriraja.”
Currently Selected:
Levítico 3: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
