Éxodo 38
38
Yovetsicaquero altar bronce
(Éxo. 27.1-8)
1Ari yovetsicaque altar intaantapiniteariri virantsipee. Irosati yaaque inchato acacia, ocarataque 2 metro avishimaataque 25 centímetro aisati oquempeyetaca acaquerocapeequi. Impoiji aparoni metro ojenoquitaque avishimaataque 25 centímetro. 2Aisati yovetsicaquero 4 oshevataquipee osorinapeequi, irosati atsicacotanaintsi aisati ipatacacotaquero maaroni bronce. 3Ari yovetsicaque aisati timayetatsineri altariqui: irojocavanetantearori samampo, paarapee, tasopee, teneroripee jero tenazapee ioshitaca bronce. 4Aisati yampitataquero bronce iticaaquerori ishaaviji nianquinaqui altar. 5Aisati 4 iyempitayetaquero osorinapeequi ovecaratapaaca ampitarentsi irisaquiintantearori inchaquii iranatacotantearori. 6-7Iro yovetsicaqueri inchato acacia iranatacotantearori altar, yapinaicantacaro bronce. Ora altar yovetsicaquero taavera ocaaranaquitaque.
Yovetsicaquero chomo bronce
(Éxo. 30.18)
8Aisati yovetsicaquero Besalel chomo, Iro yaaqueri amenaarontsipee yovetsiqueetiri bronce ashi tsinanepee antaveetatsiri iqueantapiniyeetaroriqui Pancotsi irampatotimentanteariri Tasorentsi. Irosati yaaque osavicantanacari.
Yovetsicaquero oyaaraiterite Pancotsi irampatotimentanteariri Tasorentsi
(Éxo. 27.9-19)
9Ari yovetsicaque aisati onticaashiyeteari oyaaraiteritequi. Timatsineri acaqueroca iracosanoriqui, ocarataque 45 metro otsantsataque onticaashiteari tijachari lino. 10Ocarataque iroori 20 ontincamiyetanaqueari aisati 20 bronce oncatiantayetanaqueari, iro plata iyempitayetaquerori aisati iraacotantayetearori. 11Jero timatsineri acaqueroca irampatequi ocarataque 45 metro otsantsataque onticaashiteari. Ocarataque iroori 20 ontincamiyetanaqueari aisati 20 bronce oncatiantayetanaqueari, iro plata iyempitayetaquerori aisati iraacotantayetearori. 12Aisati timatsineri acaqueroca iqueapiniti catsirincaiteri, ocarataque onticaashitanaqueari 22 metro ari nianqui. Ocarataque iroori 10 ontincamiyetanaqueari aisati 10 oncatiantayetanaqueari. Iro plata iyempitayetaquerori aisati iraacotantayetearori. 13Jero timatsineri acaqueroca iquenapai catsirincaiteri ocarataque onticaashitanaqueari 22 metro ari nianqui. 14-15Ocarataque acaquerocapeequi 7 metro onticaashitanaqueari inqueapiniyeetantearoriqui. Ocarati mava ontincamiyetanaqueari aisati mava oncatiantayetanaqueari. 16Maaroni oticaashiropee shonquearoneri oyaaraiterite ioshitaca lino tijachari. 17Ora oncatiantayetanaqueari ontincamiyeteari irointi bronce. Iro plata iyempitayetaquerori jero iraacotantayetearori, irosati plata yapinaicantayetacaro oatiitoyetapaaca ontincamiyetanaqueari oyaaraiterite. Maaroni ontincamiyetanaqueari yoayetaquenero tapoiyetachari plata.
18Ora onticaashiyetanaqueari inqueantapiniyetearoriqui oyaaraiterite, antsitacoyetaca quitioncatsanirori, quisaatsanirori, quitioncatsari quiricatsatachari lino. Ocarataque 9 metro otsantsataque, iro 2 metro ojenoquitaque avishimaataque 25 centímetro aisati oquempetacaro oticaashiro oyaaraiterite. 19Otimayetaque 4 onticamiyetanaqueari aisati 4 bronce oncatiantayetanaqueari. Iro plata iyempitayetaquerori jero iraacotantayetearori, irosati plata yapinaicantayetacarori oatiitoyetapaaca onticamiyetanaqueari. 20Maaroni oaticashiyetanaqueari Irinanteari Tasorentsi aisati oyaraiterite shonquearoneri, ioshitaca bronce.
Ashiroyetatsiri yovetsicantacarori Inantari Tasorentsi
21Ari icantaqueri Moiseshi, yora ishanincapeeni Leví, irimoncaratero maaroni ashiroyetatsiri yovetsicantacarori Pancotsi otimacotantari Icantacantiri Tasorentsi. Irio jivatacantirori Itamar, itomi Aarón, antaveetiniriri Tasorentsi.
22Yora Besalel itomi Urí, icharine Hur ishanincapeeni Judá, imataquero maaroni icantaqueriri Tasorentsi Moiseshi iranteri. 23Irio Aholiab itomi Ahisamac, ishanincapeeni Dan, amitacotaqueriri, iotasanoti yovetsicayetiro ashiroyetatsiri, itijayeti aisati yoavimaoyetiro quitioncamaonirori, quisaamaonirori, quitioncamaori jero lino jentamaotasanotatsiri.
24Icarataque yapatoanaca oro yovetsicayetaqueri 965 kilo yavishimaataque 30 gramo moncaratainchari moncaramentotsiqui. Iriotaque yamayetaqueneriri Tasorentsi irovetsicantearori Irinanteari.
25Yora plata yaayetaqueri isanquenatacojeitantacariri ishanincapee icarataque 3,319 kilo yavishimaataque 25 gramo imoncarataqueri moncaramentotsiqui timatsineri Irinanteariqui. 26Maaroni sanquenatacojeitainchari moncarayetaquerori 20 irosarentsite icarajeitaque 603,550 shiramparipee. Aparopeeni yamayetaque 5 gramo plata ari nianqui moncaratainchari moncaramentotsiqui timatsineri Irinanteariqui. 27Aisati icarataque plata 3,300 kilo yovetsicayetaqueri oncatiantayetanaqueari otincamiaropee Irinanteari Tasorentsi aisati ashi oticaashiro. Maaroni plata irotaque yovetsicaqueri 100 oncatiantayetanaqueari, icarataque aparopeeni plata 33 kilo yovetsicayetaqueri. 28Yora plata timaarantapaintsiri, irotaque yovetsicayetaqueri iyempitayetaquerori aisati iraacotantayetearori otincamiaropee jero ompashicantanaqueari jenoqui.
29Ocarataque iroori bronce yamayetaqueri 2,336 kilo avishimaataque 400 gramo, 30irotaque yovetsicayetaqueri oncatiantayetanaqueari ashitacoro Pancotsi irampatotimentanteariri Tasorentsi aisati altar jero ampitatashiro aisati maaroni timayetatsineri. 31Aisati maaroni oncatiantayetanaqueari jero oaticashiyetanaqueari shonquearoneri oyaaraiterite Irinanteari aisati oncatiantayetanaqueari ashitacoro oyaaraiterite.
Currently Selected:
Éxodo 38: cni
Highlight
Copy
Compare
Share
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
